ИМҶӀЛЕРГЕ ХАБАЗЫҒ ПОЛАР
15.10.2021
Хабарлар
Чыылығ. Хакасия пазы Валентин Коновалов республикадағы имнег тоғынҷылары профсоюзының кізілерінең тоғасхан
Чыылығда регион пазының орынӌызы Ольга Пономарёва, хазых хайраллаӌаң министр Олег Ананьевский паза имӌілер профсоюзының устағӌызы Татьяна Рыбаченко араласханнар. Тоғазығның ӧӧн сурығлары - республикадағы хазых хайраллаӌаң системаны чахсыландырары, имӌілернің чал ахчазы, имнег учреждениелеріне наа специалисттер киректелчеткені паза социальнай полызығлар.
Имнег учреждениелерінде оптимизация иртіргенде, кічіг имнег персоналы «аннаң пасхазы» категорияа кір парған, че оларның чал ахчазы хайраллал халған. Пу категорияа кірчеткен тоғынӌылар коронавирустаң тоғыр кӱресселер, оларға «ковид» ахчазы тӧлелче.
2019 чылда имнег учреждениелері окладтарны кӧдіргеннер. Амғы туста, чал ахчазын наа оңдайнаң тӧлир пӧгіннең, окладтар хозылары кӧрілбинче.
Таныхтирға кирек, чиит специалисттерні республиказар тартар ӱчӱн, пӱӱл июльдаң сығара имӌілерге паза кӧстегліг чӧптезігӌе ӱгренчеткен студенттерге чахсы социальнай полызығ тимнелген. Пір хати пирілчеткен 150 муң алай 100 муң салковай кӧріл парған; кӧстегліг контрактча ӱгренчеткен студенттернің паза ординаторларның стипендияларына ай сай хоза ахча тӧлелче; чурт арендазы паза коммунальнай полызығлар ӱчӱн ахча пирілче; «Земский доктор/фельдшер» программаӌа пір хати тӧлег позыдылча; служебнай чурт алай пӱдірінерге чир пирілче; чиит специалисттерге 500 муң алай 300 муң салковай тӧлелче.
Чиит имӌілерні Хакасияда чуртирға кӧӧк-тірер ӱчӱн, пазағы чылда пазох наа программа тоғынар. 2022 чылға республика бюджедінең имнег тоғынӌыларына 41 квартира 100 миллион салковайға алылар, 2023 чылға - 58 квартира 178 миллион салковайға.
Ідӧк республика бюджедінде тың киректелчеткен пӧзік квалификациялығ специалисттерге служебнай чурт аларға ахча кӧрілче. Пӱӱнгі кӱнде 39 служебнай квартира пар, анда имӌілер чуртапчалар.
- Правительство хазых хайраллаӌаң системада сығысчатхан ағырсымнығ сурығларны пӧгерге тимде, ол пістің республикаа тың кирек, - таныхтаан Хакасия пазы Валентин Коновалов. - Республиканың хазых хайраллаӌаң министерствозына, профсоюзтарнаң паза муниципалитеттернең хада-пірге тоғынып, имнег тоғынӌыларына наа социальнай полызығлар тимнеп, чуртасха кирерге чахып салғам.
Автор :
Валерия АГАФОНОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы