ХЫСХЫ ТОРҒАЙАХТАРЫ
15.10.2021
Хабарлар
17 октябрьда - Чол хонии тоғынӌызының кӱні. Чыл сай октябрь айда чолҷыларның ӱлӱкӱні таныхталча
Таштып чирінде чолларнаң кирек хайди парчатханнаңар аймахтағы ДРСУ-ның устағҷызы Николай Тюгаев хысхаҷахти чоохтап пирген:
- Пістің хоныхсар 400-че километр автомобиль чолы кірче, оларның чарымызы асфальтнаң чабылған. Асхыстаң пасти Абазадағы нефтебазаа теере прай чоллар пістің хоныхха кірчелер. j Заказчик «Хакасавтодор» республиканың хазна учреждениезі полча, аннаң хада піс 2023 чылның 30 июньына теере чӧптезігде хол салыбысхабыс. Чол хонииның пӧгіннері - чол тыхтиры, оймахтар тӱзедері, танығлар алыстырары, чол соонца чыл тооза кӧрері. Чол хонии ӧмезінде амды 86 кізі саналча. Чал ахчазы тузында тӧлелче, чон пісте чахсы тудылча.
Ирткен хысхы республикада порааннығ полған, хар удаа чаап парчатхан. Машина, чолға даа сығарға маңнанмин, харда пат парча, тоғысха орайлатчазың, палаларны олған садынзар, школазар апар полбинчазың. Аалда мындағ кирек пол парза, уламох ирееленістіг, арығлирға маңнанмин халзалар, чуртас тохтап парғанға тӧӧй.
Ааллар істінде аал чӧбінің тоғынҷылары харны тракторнаң кӱрепчелер, оларның аразындағы чолларны, тізең, грейдернең арығлапчалар.
Таштып аймааның чол хонии тоғынҷызы Альберт Албычаков пӱӱл 8 октябрьда грейдернең чӧрерге тіп Ағбанда сыныхтағ тудыбысхан. Улуғ машинанаң чӧрерге ағаа опыды полысча, Альберт Никитович тракторист полып кӧп чыл тоғын салған.
- Андағ килкім «аң» ӱстӱнде одырып чӧрерге хорғыстығ нимес пе?
- Мының алнында «К-700» тракторнаң чӧрҷеңмін, грейдер аннаң тың пасхалалбинча. Чӧріп пілчетсең, аар нимес.
- Пу ӧмеде нинҷе тус тоғын парирзар?
- Мында мин 2013 чылдаң сығара істенчем, тракторист полып пастаам, ідӧк чолларны чылығларда даа, соохтарда даа кировецнең иптеҷең полғам. Позым Асхыс аймаандағы Ылырсы аалдаңмын, Таштып аймаанзар килер алнында, Хубачар аалда чуртап, Ағбанзар ВСК ӧмезінде тоғынарға чӧрҷеңмін.
2010 чылда ВСК-ның устағ-пастаа Альберт Никитовичті Индіркі Хурлығас хыриндағы хыраны тартарға ызыбысхан. Анда тракторист наа хыныс таап алған, хада хонғаны Надежда Туртугешева полча. Ирепчі Индіркі Сир аалда чуртапча.
- Оңдай пар полза, ноға істенмеҷең? Аалда кем тоғынминча, ол іскее табырах кір парча, таңдағы кӱннеңер сағынминча. Пір танызымны чол хониинзар тоғынарға хығырғамох... хынминча. Кічіг аалларда мал ӧскірбезең, итчең ниме чоғыл.
Сын чоох, аалда даа, городта даа пиленге тың одыр полбассың. Иптіг сағыстығ кізі хаҷан даа позын, сӧбірезін азырирға оңдай табар, хайди даа аар полза.
Хысхызын, улуғ хар тӱс парза, Альберт Албычаковха, торғайах чіли, 4-5 час иртен тоғысха сығарға килісче. Чон турғалахха, киректерінңе парғалахха, чол хонии тоғынҷыларына ааллар аразындағы чолларны арығлабызарға маңнанарға кирек. Чыл тооза чол тоғынҷылары автомобиль чолларын ипти тутчалар, аймах-пасха тыхтағлар идіп, экономика тилізіне, чонға аар-пеер табырах чӧрерге чахсы полысчалар. Аның ӱчӱн оларға улуғ алғыс.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде