Коронавируснаң ағырчатханнарны имнирiне - хоза орыннар
15.10.2021
Хабарлар
Хакасияда коронавируснаң ағырчатханнарның саны öсчеткенде, оларны имнирге орыннар саны алғыдылча. Таңдадаң сығара республиканың имнег туразындағы терапия корпузы ковиднең ағырчатханнарға азылча. Анда 88 орған пар. Паза iди хоза азылӌаң имнег туразы чоғыл. Аннаңар пӱӱн искiрген Хакасияның хазых хайраллаӌаң министрi Олег Ананьевский коронавирустаң тоғыр кӱрезерiнӌе оперштаб чыылиинда.
Сағам регионда коронавируснаң ағырчатханнарны имнирiне тиксi 1416 орын пар, 140 орған пос турча. Халғанӌы суткада чуғынӌахнаң хоза 154 кiзi ағырыбысхан, 139 пациент имнег туразынзар чатырылған, че 10 кiзi ӱреен. Ибде 3780 кiзi имненче. 284 кiзi хазыхтанып алған. Пӱӱл наа чуғынӌахтаң прай 48287 кiзi хазыхтанып алған.
Коронавирустаң тоғыр вакцинаның 1-ғы чардығын прай 182573 кiзi турғыстырған, халғанӌы суткада - 842 кiзi, 2-зiн - 156188 кiзi (156 кiзi).
Iдöк тымо-кискектең тоғыр прививка турғызылча, пӱӱн вакцинацияны улуғларның 29%-i иртiбiскен, олғаннарның - 32%-i.
Чыылығда коронавирус тарапчатхан сылтаанда пу неделядаң сығара кирiлген хатығластардаңар чоох парған. Культура паза спорт учреждениелерiнзер, кинотеатрларзар, мылча-сауналарзар, кафе-рестораннарзар коронавирустаң вакцинацияны ирткеннеңер сертификаттығ ла алай чуғынӌахнаң ағырған соонаң 6 ай ирткелектеңер пiчiктiг кирерге чарадылча. Андағ учреждениелернiң тоғынӌылары клиенттернiң сертификадын сыныхтирға киректер. Чазы читкелектернi андар iӌе-пабаларынаң на хада кирерлер тiп чоохталған.
Автор :
Инора Боргоякова
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде
