ВАЛЕНТИН КОНОВАЛОВ: «ТОҒЫС САЛТАРЛАРЫН ЧОН ПААЛИР!»
18.10.2021
Хабарлар
Хакасия пазы Валентин Коновалов пӱӱн иртен «Хакасия» хабарлар агентствозына интервью пирген. Чоохтазығның ӧӧн ӱс таниин пирчебiс.
ПАЛҒАЛЫС ТЫЫДЫЛЧА
Республика ӱлгӱлерiнiң федеральнай кiннең палғалызы Хакасия чуртазын алыстырарына пiлдiрте теелче.
- Пiс уғаа ӧткiн хада-пiрге тоғынчабыс. Табылғанында турғысхан пӧгiн – федеральнай программаларда аралазарын ӧскiрерi – толдырылған. Аннаңар iзестiг чоохтирға чарир. 2017-2018 чылларнаң тиңнестiрзе, пiс араласчатханыбысты iкi хати ӧскiрiп алғабыс. Ахча синiнең дее алза. 2018 чылда федеральнай кiнде араласханы 2,5 миллиард салковайға тиңнелген, 2019 чылда 4 миллиард салковай полған. Пазағы чылларда ол тӧремiл ӧскiрiлче. Ол федеральнай министерстволарнаң, правительствонаң хада-пiрге тоғынғаны, президент пiстiң прай даа айланыстарыбысха удур парча. Пiрге тоғынчабыс, пiстi исчелер, ағаа хоза полысчалар, - нандыриинда таныхтаан Хакасия пазы Валентин Коновалов.
Аннаң пасха республика устағҷызы федеральнай кiннең пiрге тоғыстың ӧӧн салтарларының пiрсiне хайығ айландырған: Хакасияның хазна ӧдiзiнiң пис миллиард азыра салковайы коммерческай кредит бюджет кредидiне алыстырылған.
НАА ХАЗНА ДУМАЗЫНА УЛУҒ IЗЕНIСТЕР
Хакасияның Хазна Думазы пастыра пӧкчең сурығлары илееде парынаңар чоохтар табығлар алнында даа, соонда даа апарылған. Хакасиядаң Россияның Хазна Думазынзар Сергей Сокол табылғанда, оларны чуртасха кирерiнҷе хоза сағыссырастар тӧреен. Пу сурыға Валентин Коновалов мындағ нандырығ пирген:
– Хазна Думазынаң хада-пiрге тоғыс алында даа чахсы апарылған. Наа пӱдiснең iдӧк ӧткiн тоғынарбыс. Пiлчезер, мин Сергей Михайловичнең хада тоғасхамох. Наа пӱдiсте КПРФ фракциязы алғып парған, пiрее депутаттарнаң мин iдӧк тоғыс хоостыра тоғасхам. Хада-пiрге тоғынарбыс, пiстiң Хазна Думазының депутаттарынаң хабазығ киректепчеткен налог, бюджет законнарын тимнирiнҷе паза пасха кӧстеглерҷе кӧп сурығлар пар. Пiреезiн пiр саңай пӧк полбассың, че чонда чоохтапчалар, пiр тамҷых тасты чiтiтче. Депутаттар, комитеттер пiске программаларға кiрерге полысчалар. Ол саринаң пiс чӧптiг тоғынчабыс.
ОЛАҢАЙ ЧООХ-ЧААХ
Пу сурығны, тiзең, оппозициядағылар тӧремiл кӧдiрчелер. Валентин Коновалов Хакасия пазына турғызылғаннаң сығара тӱрчедең ӱс чыл полар, че амғы тусха теере аны тӧремiл тоғыстаң суурчатханнаңар чоохтар сығарчалар. Пу наада андағ «хабар» РБК-да, хабарлар таратчаң иң килкiм тирiглернiң пiрсiнде – сыххан. Республика пазы Валентин Коновалов андағ хабарларға хайди хайчатханнаңар чоохтапча паза сынында кирек хайдағ полчатханын чарытча:
– Сынап таа минi отставкаа 2018 чылның кiчiг хырлас айынаңох ызып пастааннар. Сiрер минiң кӧрiзiмнi сурчатсаңар, мағаа хаҷанох пасхазы чоғыл. Мин тоғынчам, республика чуртағҷылары, президент минiң алнымда турғысхан пӧгiннернi толдырчам. Нинҷе удаа чоохтанчалар, ол синӧк кӧп кiзi сизiнче – ол олаңай чоох-чаахтар. Минiң полномочиелерiм тузы пар, аның салтарларынҷа кӧрiнер. Паалағны республика чуртағҷылары пирер.
Хакасия пазы Валентин Коноваловнаң толдыра чоохтазығны «Хакасия» ИА-ның сайтында (https://19rus.info/) «Глава Хакасии в эксклюзиве 19rus.info: Мне не стыдно смотреть людям в глаза» материалда хығырыңар.
Автор :
Тимнеен Наталья Субракова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы