«ЧИТІ ХЫС» - ЧИҢІСЧІ
20.10.2021
Хабарлар
Поғдархас. 15 октябрьда Ағбанда ипчілер аразындағы футболҷа пӱӱлгі сезондағы Хакасия чемпионадының финалы ирткен. Анда тӧрт команда араласхан
Ипчілер аразындағы футболӌа пу чыл сезонының Хакасия чемпионадында тиксі он команда араласхан. Че республика синіндегі марығларның финалына, азынада иртірілген ойыннарның салтарлары хоостыра, тӧрт ле командаа сығып аларға ӱлӱс тӱскен. Олар - «Аталанта» (Абаза город), «Спартак» (Ағбан город), «Читі хыс» (Асхыс аймаа) паза «Ағбан пилтіріндегі спорт школазы» (Ағбан пилтірі аймаа).
Пурнада «Сойан» спорт комплексінің футбол чазызынзар «Ағбан пилтіріндегі спорт школазы» паза «Спартак» командаларның хыстары сыхханнар. Хатығ харбазығ соонда 2:0 саннаң ағбандағылар алнында пол парғаннар.
Ікінӌі чарым финал харбазиина «Читі хыснаң» «Аталанта» сыхханнар. Салтарында абазадағылар 0:10 саннаң утыр салғаннар.
Мындағ оңдайнаң ӱзінӌі орын ӱчӱн матчта Абазаның паза Ағбан пилтірі аймааның спортсмен хыстары устарынаң сынасханнар. Ойын хатығ парған, аннаңар кӧрігӌілер халғанӌы минутаа теере матап чӱрексееннер. Олох халғанӌы минутада Ағбан пилтіріндегілер чиңіс голын кирібіскеннер тиирге чарир. Іди олар Хакасия чемпионадында ӱзінӌі орынға турысханнар.
Че иң чӱрексіністіг - футболист хыстарға даа, кӧрігӌілерге дее - чемпионаттың пастағы орыны ӱчӱн асхыстағыларның паза ағбандағыларның матчы полған, неке.
Чоохтирға кирек, олар Хакасия чемпионадының азынада марығларында тоғасхан полғаннар. Андада Асхыс чирінде ирткен ойынның чиңісчізі Асхыстағы ӱгренӌілер командазы полыбысхан. «Ибде стенелер дее полысчалар», - тіпчелер нооза. Че республика синіндегі чемпионат финалы Ағбанда, «Спартактың» чирінде, ирткен. Аннаңар командаларның кӱстері тиңнел тее парған тиирге чарир.
Пірдең, ағбандағыларға опыттығ футболисттер хозыл парғаннар. Пістің командада, тізең, Ис, Пилтір паза Чоғархы Асхыс ааллардағы школаларда ӱгренчеткен хызыӌахтар араласчалар.
Андағ даа полза, асхыс аймаандағылар ағбандағыларны пастағы таймда 2:0 саннығ, анаң ікінӌі таймда 3:1 саннығ утып алғаннар. «Читі хыс» команданың араласчылары пӱӱл часхызын иртірілген ипчілер аразындағы мини-футболӌа Хакасия чемпионадында чиңісті холға киргеннер. Амды хызыӌахтар улуғ футболда алтын медальға турыстылар! Піс, тренерлері Юрий Аёшин, Валентин Тормозаков, Евгений Мамышев, оларнаң тың поғдархапчабыс паза прай чӱреебіснең мындағ чиңіснең алғыстапчабыс.
Автор :
Евгений МАМЫШЕВ, тренер
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы