ХАЗНА ДУМАЗЫНЫҢ ДЕПУТАТТАРЫ ХАБАЗАРҒА ТИМДЕ
27.10.2021
Хабарлар
Тоғыс чорығы. Хакасия пазы Валентин Коновалов ирткен неделяның тоғыс кӱннерін Москвада иртірген. Ол Хазна Думазының депутаттары Сергей Гавриловнаң паза Михаил Щаповнаң тоғасхан
ЧИР СУРЫҒЛАРЫН ПӦГЕРГЕ
Пастағы тоғазығ Россияның Хазна Думазының собственность, чир паза ис-пай хайызығлары сурығларынӌа комитет кнезі Сергей Анатольевич Гавриловнаң ирткен.
Хакасия правительствозы муниципалитеттер устағӌыларынаң хада-пірге 2019 чылдаң пасти тибіреділбинчеткен ис-пайнаң, кӧзідімге, аал хонии чирлерінең, тузаланарын чахсыландырарынӌа планны чуртасха кирче. 2020 чылда чарғы пастыра тиксі 14,6 муң гектарлығ 630 чир участогына муниципалитет собственнозы киречілелген, 73 участок собственностьха пирілген, 56 участок - арендаа. Пӱӱл 17,1 муң гектарлығ 275 чир участогын тимге сығарары кӧрілче. Анзынаң республикада аал хонии тилізі, инвестиция оңдайларын чахсыландырары, орындағы бюджеттерзер налогтардаң парысты ӧскірері палғалыстығ.
Ээзі чох чирлерні аймахтың собственнозына пирерінӌе сидіксіністер учурапча, олар федеральнай кін чох, федеральнай законнарзар алызығлар кирілбин, пӧгілбинчелер. Аның ӱчӱн республиканың толдырығлығ ӱлгӱзі Хазна ис-пайынаң устирынӌа федеральнай агентствонаң паза Россияның аал хонии министерствозынаң пірге тоғынча.
Сергей Анатольевич Хакасия правительствозына тибіреділбинчеткен ис-пайнаң тузаланарын чахсыландырарынӌа сурығларны пӧгеріне федеральнай синде хабазарға тимде.
БЮДЖЕТТІ ТИҢНИРГЕ
Хакасия пазы Валентин Коновалов Россияның Хазна Думазының депутады Михаил Викторович Щаповнаң, тоғазып, Хакасия бюджедін тиңни тӧстирінӌе сурығларны ӱзӱрген.
Хакасияда 2012 чылдаң пасти хазна ӧдізі ӧскірілген. 2011 чыл тоозылчатханда аның сині 2,1 миллиард салковай полған полза, 2018 чылда 24,6 миллиард салковайға тиңнелген.
2019 чылдаң пасти Хакасия правительствозы пос парыстарын ӧскірерінӌе паза хорадығларны синдірерінӌе планны чуртасха кирче. Анда регионның инвестицияларға килістіре поларын чахсыландырары, килкім ис-пай пӱдіріглерін налогка санға турғызары, тибіреділбинчеткен ис-пайнаң тузаланысты чахсыландырары, республиканың консолидированнай бюджедіне налогтарның кірерін ӧскірері паза пасха кӧстеглер кӧрілген.
- 2020 чылда ниик оңдайнаң налог тӧлирінҷе ставканы ікі хати хызырғабыс. 2021 чылның 8 айына, ирткен чылның олох тузынаң тиңнестірзе, пу налогтарча тӧлеглер 52 процентке хозыл парғаннар, республиканың парыс ӧзені ӧс парған - 6 миллиардча салковайға, организацияларның парысха налогча тӧлеглері, тізең, - 2, 7хати.
Че федеральнай кін араласпаза, бюджет сидіксіністері саңайға пӧгілбес. Бюджетті толдырарын тиңниріне дотацияларны ӱлестірчең амғы оңдайлар хай пірее регионнарның, кӧзідімге, Хакасияның, бюджеттерін тиңнебинчелер паза алызығларны киректепчелер. Піс пу сурығны федеральнай ӱлгӱлер синінде тӧреміл кӧдірчебіс, - таныхтаан Валентин Коновалов.
Россияның Хазна Думазының бюджетче паза налогча комитет кнезінің пастағы орынӌызы Михаил Щапов Хакасияның бюджедін тиңнир паза федеральнай синде республикаа хабазар сурығларӌа прай кӱзінең полызарға молӌаан.
Автор :
Тимнеен Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы