ХАЙДИ ТОҒЫСХА ЧИДІП АЛАРҒА?
29.10.2021
Хабарлар
Оперштаб чыылии. Республикада 28 октябрьдаң 7 ноябрьға теере карантин режимі кирілчеткен туста ӱс городта автобус-троллейбус чӧргізілбес
Хакасия пазы Валентин Коновалов штаб чыылиинда республикада кирілген хоза хатығластар хоостыра нинӌе-де чахығ пиріп пастаан. Сағам ӧӧн пӧгін хайди карантин режимі толдырылчатханын сыныхтиры полча теен ол. Ол 7 ноябрьға теере прай толдырылза, амғы эпидемиянаң палғалыстығ кирек чахсы саринзар алызар.
Республиканың транспорт министерствозына ол тоғынӌыларны тоғысха транспорттығ читірерінӌе сурығны муниципалитеттернең пірге пӧгерге чахығ пирген. 28 октябрьдаң 7 ноябрьға теере ӱс городта - Ағбанда, Харатаста паза Саяногорскта - автобустар паза троллейбустар чӧрізі тохтадылған. Предприятие-организацияларның устағ-пастаана тоғынӌыларын пос кӱзінең тоғысха тарт чӧрерге кирек. Че андағ чарадығны толдыр полбинчатсалар, оларға город администрациязынзар айланарға кирек, нинҷе тоғынҷыны ноо маршрутча тарт чӧрерін кӧзіт саларға. Андада пу сурығны пӧгерге полызарлар.
Хакасияның хазых хайраллаӌаң министерствозына вакцинацияӌа тоғысты узарадарға чахылған. Істеніс паза социальнай арачыланыс министерствозынаң пірге тоғынып, карантинде одырчатхан 60 частый паза аннаң даа улуғ частығларға прививканы иблерінде турғызар оңдайларны кӧр саларға. Улуғ тӧлге коронавирустаң тоғыр вакцинацияны иртірерге мобильнай имнег бригадазы чӧр турар.
Республиканың ӱгредіг паза наука министерствозына тиксі Россиядағы чон фронтынаң (ОНФ) пірге волонтерлар полызиинаң имнерні паза ас-тамахты улуғ тӧлге паза коронавируснаң ағырчатхан кізілерге иблерінзер читір турар сурығӌа тоғынарға.
Пӱӱн илееде предприятиенің тоғызы тохтадылған. Че тоғызы тохтадылбаан предприятие-организацияларның устағӌыларына тоғынӌыларның 50 процентін ибдең сыхпин тоғынар графикче тоғындырарға.
Хайди таныхтаан Валентин Коновалов, мындағ тоғыс чуғынӌах ағырығның тарапчатханын, аннаң ӱрепчеткеннернің санын хызырар ӱчӱн апарылча. Пістің республикада имнег тураларында коронавируснаң ағырчатханнарны имниріне орғаннар чидіспинібізерге айабас. Кӱннің кӧптең кӧп ле кізі имнег тураларынзар чатырылча, че асхынах кізі аннаң ибзер позыдылча, аннаңар орғаннар чыындызын алғыдарға килісче. Пу эпидемиянаң палғалыстығ сидіксіністе имнег киреенің тоғызы саңай турыбызарға айабас. Аннаңар регионда тоғынмаӌаң чарлалған кӱннерде мындағ хатығластар хоза кирілгеннер. Имӌілерге, имнег тоғынӌыларына аар-чӱк артылбасха кирек. Правительствоның пу чарадии уғаа аар алылған, сурығ штаб чыылиинда даа ӧткін ӱзӱрілген. Піс пілчебіс, экономикаа ӱрег иділер, че чуғынӌахтың тарирын тохтадып аларға кирекпіс теен.
Городтарда автобустарны чӧргіспинібіскенінең чараспинчалар Ағбанның паза Саяногорсктың пастары. Ағбан пазы Алексей Лемин республика пазына чӧп пирген, іди транспортты чӧргіспестеңер чарадығны хыйа идерге. Мындағ сидік туста автобус-троллейбустарны кӧп арах чӧргізерге киректелче, андада чон арам одырып чӧрерӌік. Город чуртағӌыларына транспортнаң сидіксініс пол сығар тіп искір-ген. Андағох кӧрізін чыылығда искірген Саяногорск пазы Михаил Валов. Че оларның чӧбінең штабта чараспааннар, транспорт «коллапсы» полыбызар чоохты сағын таап алғаннар тіп нандырғаннар.
Хайди чоохталған, Саяногорск паза Ымай тас аразында, Харатас паза Пригорск аразында автобустар чӧрізі чарадылча. Ідӧк чарадылча аал-городтар аразындағы паза кізілерні пасха регионнарзар тарт чӧрчеткен транспортты чӧргізерге. Че городтарда кізілерні такси службалары тарт чӧрер. Такси водительлерінің вакцинациядаңар сертификат алай наа чуғынӌах ағырығнаң ағырғаннаңар пічік пар поларға кирек.
Пу кӱннерде почта чабылбин тоғынча. Аны хоостыра сурығ ӱзӱрілгенӧк: анда пенсия ахчазын аларға килчеткеннернің теестері пол турар. Россия почтазының Хакасиядағы филиалына чӧп пирерге: пенсия ахчазын пенсионерлерге иблеп чӧріп читірерге. Паза МВД-даң чӧп кірген: Хакасияда хатығластар кирілген туста араға 16.00 ла часха теере садарға чарадарға кирек.
27 октябрьға пирілген танығлардаң, республикада халғанӌы суткада наа чуғынӌахнаң 189 кізі ағырыбысхан, 170 кізі имнег туразынзар чатырылған. Ам коронавирустаң имненчеткеннернің саны - 7097 кізі. Ағаа хоза 4707 кізі - ағырчатханнарнаң пір чирде полған чуртағӌылар. Ағырығдаң 12 кізі ӱреен.
Пу кӱнде наа чуғынӌахнаң ағырчатханнарны имниріне республикада 1824 орған кӧрілген, оларның 203-і (11 %) пос турча. Кислородтығ орыннар саны - 832, оларның 127-зі (15 %) пос. ИВЛ-да - 86 кізі, кислород полызиинаң имненчеткеннернің саны - 600 азыра кізі. Суткада кислород 12 тонна тузаланылча.
Че сағам имнег киреендегілер орғаннар санын алғыдарға пӧгінчелер. Килер субботаа хоза 50 орғанға кӧп полар. Имнер паза вакциналар читкіӌе. СОVID-19-таң тоғыр вакцинаның I чардығын 193 460 кізі турғыстырған (халғанӌы суткада - 1810 кізі), II чардығын - 157692 кізі (суткада - 217 кізі). Вакцина чуртағӌыларның 80 %-іне турғызыларға кирек, сағам вакцинацияны 60 %-і иртібіскен. Тымо-кискектең тоғыр прививка кӧрілген планӌа палаларның 52 %-іне, улуғларның 42 %-іне, тойлығ ипчілернің 82 %-іне турғызыл партыр.
Республикада хатығластар кирілген туста пір дее мероприятиелер иртірерге чарадылбинча. Кӧзідімге, Ағбанда 30 октябрьда паза 4 ноябрьда аал хонии ярмарказын иртірібізерге чарадарға сурынғаннар штаб чыылиинда. Че кизе-тоғыр нандырығ пирілген.
Карантин режимі тузында республикада сыныхтағ мероприятиелері тӧреміл иртіріл турар. Анда араласчалар МВД, Росгвардия тоғынӌылары. Ідӧк МЧС тоғынӌыларын араластырарға сағынчалар. Пу режимні сайбаан ӱчӱн административнай штраф кӧрілче.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы