ХГУ-да - ТУРИЗМ КИРЕЕНЕҢ АЙҒАСЧАТХАН КІН
29.10.2021
Хабарлар
Тегілек стол. Н.Ф.Катановтың адынаң Хакас хазна университедінде туризм киреенде наука-ӱгредігліг кін тӧстелгеніне чарыдылған чыылығ ирткен
Тегілек столда ӱлгӱ, наука-ӱгредігліг пірігістернің кізілері паза туризмнең айғасчатхан идінӌектер араласханнар. Чоох парған кін хайдағ пӧгіннең тӧстелгеннеңер, кемнер андар кірер паза Хакас хазна университеді туризмні тилідеріне хайдағ хозым итчеткеннеңер.
Н.Ф.Катановтың адынаң Хакас хазна университедінің ректоры Татьяна Краснова мындағ кін хайдағ пӧгіннең тӧстелгеннеңер чоохтаан.
- Пӱӱнгі кӱнде туризмде, инфраструктура сидіксіністерінең пасха, ідӧк пӧзік пілістіг тоғынчылар чидіспинчеткені таныхталча. Пу киректіреспублика правительствозынаң, туризмнең айғасчатхан идінчектернең, ӱгредіг пірігістерінең, пірігіп, хада-пірге тоғынза, чахсыландырып аларға чарир. Туризм киреенде наука-ӱгредігліг кіннің площадказы Хакас хазна университедінде орнығар. Мында прай ведомстволар, туриндустрияның, ӱгредіг организацияларының паза наука пірігістерінің кізілері чыылызарлар. Амғы туста Хакас Республиканың тиліс стратегиязы тимнелче, аннаңар прай пастағларны піріктірібізерге киректелче. Піс тархында мындағ танығлығ кирек тузында чуртапчабыс, аннаңар туризмге кирек тоғынӌыларны тимниріне прай ондайларны піріктірібізерге кирекпіс, - таныхтаан Татьяна Краснова.
Амғы туста пасха даа регионнарда мындағ кіннер тӧстелчелер. ХГУ туризм киреенде наука-ӱгредігліг кін тӧстелген пастағы 25 регионның санына кір парған.
Пӱӱнгі кӱнге туризм киреене тоғынӌылар тимнепчеткен ӱгредігліг нинӌе-де организация пар: Н.Ф.Катановтың адынаң Хакас хазна университеді, Саяногорсктағы СТЭМИ техникум паза Олимп резервінің училищезі.
Татьяна Краснова Хакас хазна университеді туризм киреене хайдағ программаларӌа тоғынӌылар тимнелчеткеннеңер чарытхан. Оларның санында тӧрт чыллығ «Туризм» бакалавриат программазы, улуғ кирексініснең тузаланчатхан «Тархын паза археология» бакалавриат паза магистр программалары, ідӧк «Тархын-культура туризмі», «Тархын чир-суғ ӱгренері паза музей тоғызын апарары», «Чонның хоос культуразы» паза «Чонның хоос чайаачызы» программалар. Университет «Туризм» кӧстегӌе паза хоза программаларӌа 10 азыра чыл тоғынӌыларны ӱгретче.
Халғанӌы ікі чыл аразына туризмге тоғынӌылар тимнирінӌе нинӌе-де ӱгредігліг программа тимнелген. Оларның піреезінӌе ӱгредіг ырахтын ирткен. Анда пасха даа регионнарның чуртағӌылары ӱгренгеннер. Ӱгредіг улуғ нимес ӧмелернең пу кӧстеглерӌе апарылған: тілбесчі, музей паза турист тоғызын апарары, туризм киреенде экскурсия паза тілбесчі тоғызы, экскурсия тоғызында Хакас Республиканың регион оңдайлары, экскурсия апарары, туризмнің ӧӧні, Хакасияның паза Хызылчар крайының ӱстӱнзархы чирлерінің чир-суғ ӱгренӌең тархын-археология экскурсия чоллары. Ікі чыл аразына 350 кізі туризмге теел-четкен курстар иртібіскен.
Татьяна Краснованың таниинаң, Хакас хазна университедінде туризм кӧстегӌе ідӧк наука тоғызы апарылча. Пӱӱнгі кӱнде ікі аспирант кандидат диссертациязын пасча. Университеттің студенттері паза магистранттары тиксі хазнада иртірілчеткен конференцияларда сыбыра араласчалар. Оларның санында Санкт-Петербургта иртчеткен «Чир-суғны ӱгренерінӌе паза туризмӌе колпинсктегі хығырығлар» тиксі Россияның наука-практикалығ конференциязы. Анда Хакас хазна университедінің студенттері 2018 - 2020 чылларда араласханнар. Н.Ф.Катановтың адынаң Хакас хазна университедінде ідӧк студенттернің археология-этнография наука пірігізі паза тархын, археология паза этнография музейі пар.
ХГУ-ның наукаӌа паза инновацияларӌа проректоры Андрей Поповтың чооғынаң, наука-ӱгредігліг кін, программаларны тимнирінең пасха, ідӧк проект площадкаларын тӧстирінең, экскурсоводтарға, гид-тілбесчілерге, инструктор-проводниктерге аттестация иртірерінең айғазар.
Хакасияның экономика тилізі министрі Виктор Богушевич туризм киреенде наука-ӱгредігліг кін тӧстелчеткеніне чӧпсінген паза экскурсоводтарға пірге искірігліг база тимнебізерге кирек тіп чӧп пирген. Аның полызиинаң экскурсиялар иртірілер.
Ідӧк чыылығда туризмнең айғасчатхан идінӌектер постарының сидіксіністерінең ӱлескеннер. Оларның пірсі - тоғынӌылар чидіспинчеткені: экскурсоводтар, проводниктер, ресторан менеджерлері, маркетологтар. Чайғы тусха экскурсоводтар паза проводниктер тоғызына студенттерні алып аларға килісче. Кӱскӱде оларның орнына пірдеезі табылбинча. Ресторан паза гостиница киреенде пасха хан тілін пілчеткен тоғынӌылар чидіспинче.
Чыылығның халғанӌызында Хакас хазна университедінің археология паза этнография наука-істезігліг институдының директоры Леонид Ерёмин чоох тутхан. Аның таниинаң, туризм киреенде наука-істезігліг кін регионның кирексіністерін піліп аларға, наа проекттер чуртасха кирерге полызар паза Хакасиядағы туризмні тилідерге оңдай пирер.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы