ХАТЫҒЛАСТАР КИРІЛГЕН
29.10.2021
Хабарлар
Кӧні эфир. Хакасия пазы Валентин Коновалов социальнай сетьтерде чуртағҷыларның сурығларына нандырған
Чуртағӌыларның сурығларына нандырар алнында Валентин Олегович республикада наа хатығластар кирілчеткеннеңер чарытхан. Хайди таныхтаан регион пазы, сағам республикада коронавирус эпидемиязынаң кирек уғаа сидік. Амғы туста коронавируснаң ағырчатханнарның кӧбізінің ағырии сидік оңдайнаң иртче, аар ағырчатхан пациенттер кӧп. Чуғынӌахтың тарапчатханын тохтадар ӱчӱн, Россия президент хазнада тоғынмас кӱннер кирердеңер чарадығ алған. Тынағ кӱннерінің пасталғанын паза тоозыларын регионнар эпидемия кирее хоостыра орнында чарадығ алчалар.
- Тынағ кӱннерінде кізілернің палғалызын, пір чирде полчатханын тохтатпаза, пу тынағ кӱннері туза ағылбас. Республика экономиказына ӱрег иділче, анзын піс алыстыр полбаспыс. Андағ ӱреглерге кіріп, ағырығның тарапчатханын тохтадарға хайди даа кирекпіс, - таныхтаан Валентин Олегович.
Андағ оңдайнаң Хакасия правительствозының 102-ӌі чарадиинзар алызығлар киріл парғаннар. Кирілген алызығлар 28 октябрьдаң 7 ноябрьға теере полар.
Кӧп чон чӧрчеткен транспорттың чӧрізі тохтадылча - Ағбанда, Харатаста, Саяногорскта. Республиканың олған садтары, школалар, ортын профессиональнай паза хоза ӱгредіг учреждениелері 27 октябрьдаң 7 ноябрьға теере каникулларға сығыбысханнар.
Ідӧк садығ туралары, кафе-рестораннар, чонға полызығ пирӌең паза ӱтертістіг учреждениелернің тоғызы тохтадылча. Че аптекалар, чиис паза кізее чуртасха киректелчеткен ниме-нооны сатчатхан садығ тураларына паза чиис тимнеп сығарӌаң оңдайнаң тоғынчатхан кафелерге тоғынарға чарадылча. 60 час ас парған улусха ибдең сыхпин одырарға киректелер. Республиканың прай даа чуртағӌыларына ибдең сыхпин тудынарға кирек. Ідӧк 22.00 частаң 6.00 часха теере комендант чазы кирілче. Хатығластарға теелбинчелер ол ла оңдайда, хайзы Хакасия правительствозының 102-ӌі чарадиинда кӧріл парған. Устағӌылар, кемнің тоғысты тохтатчаң оңдайы чоғыл, тоғынӌыларын 50 %-тең асхынах нимес ибдең сыхпин тоғынар оңдайға кирерге киректер.
- Мындағ чарадығ уғаа аар алылған, че пістің пасха оңдай чоғыл. Чуртағчыларның хазиинаңар, чуртазынаңар чоох парча. Чуртағдылар кирілген хатығластарға тудынчатханын сыныхтир ӱчӱн, республика прокуратуразынзар, Роспотребнадзорынзар паза МВД-зар айланып, хайығда тударға чахаам, - искірген Валентин Коновалов.
Хакасия пазы, чуртағӌыларзар айланып, санитар-эпидемиология кирексіністеріне тудынарға чӧп пирген. Имнег масказын кизерге, удур-тӧдір оортах тудынарға. Анаң ол кӧні эфирге кірген сурығларға нандырып пастаан.
- Поликлиникяляр тоғынар ба?
- Хакасияның хазых хайраллаӌаң министерствозынзар кірчеткен имнег учреждениелері тоғынарлар. Соона салдыртпаӌаң паза пландағы имнег полызии алызығлар чох пирілер. Ідӧк чуртағӌыларға тымо-тусхахтаң паза коронавирустаң тоғыр прививкалар турғызылары тохтадылбас.
- Олған садтарын чабарға кирек, палалар ағырчалар.
- Олған садтары чабылар, тӧстелер дежурнай группалар. Ол группаларзар, кемнің узун тынағ кӱннерінде тоғызы тохтадылбас паза палаларын ибде артысчаң кізі чох полза, ал чӧрерлер.
- Хайди поларға, кемнің тоғызы тохтадылбас? Харатастаң Ағбанзар кӧп кізі тоғысха чӧрче, хайди піске чидіп аларға?
- Кӧбізі пу кӱннерде тоғынмас. Мындағ хатығластар ӧнетін кирілчелер, чуртағҷылар, сыхпас режимге тудынып, чуғынҷахты таратпас ӱчӱн. Тоғынчатханнарның кӧбізі ибдең сығара істенче. Тоғысха сығарға килісчеткеннерге пос транспортынаң алай таксинең чӧрерге килізер.
- Харатастағы автобустарда льготалар чох иділер бе?
- Чох, льготалар чох иділбес, че Харатаста, Ағбанда паза Сааногорскта халых транспортының чӧрізі тохтадылар.
- Аэропорт тоғынар ба?
- Самолеттар рейстерінҷе учуғарлар, Хакасиада кирілген локдаун оларға теелбес. Аэропорттың тоғызына ара кірізер пістің правобыс чоғыл. Регионнар аразынца чӧрҷең транспорттың чӧрізін алыстырары алай тохтадары федеральнай синде пӧгілче.
Кӧні эфирде чуртағҷылар кирілген хатығластарға теелчеткен сурығлар пиргеннер. Ӧӧнінде республика чуртағҷыларын узун тынағ кӱннерінде хайдағ учреждениелер паза хайдағ оңдайнаң тоғынары сағыссыратча. Аннаң пасха, кізілер посты хатығластар тузында хайди тудынардаңар паза ниме чарадылчатханнаңар сурғаннар. Валентин Олегович чарытхан:
- Чуртағҷылар, кемге 102 № чарадығҷа істенерге чарир, тоғысха чӧр поларлар. Ідӧк комендант чазы тузында ибзер, гаражсар паза сад чир участоктарынзар парчатханнарға штрафтар салылбас. Чалғыс улуғ частығ туғанзар полызарға, чиис апарарға чарадылча. Іҷе-пабаларға чазы читкелек палаларнаң чуртапчатхан орыннаң 300 метрдең оортах чӧрбин, тасхар поларға чарир. Имнег учреждениелерінзер парарға паза, тасхар сығып, спортнаң айғазарға, сӧп-сап сығарарға паза адайны тасхар сығарып, ибдең 300 метрдең ырах парбин, пас чӧрерге чарадылча.
- Халых транспортының чӧрізі тохтадылғанда, такси паазы уғаа ӧс парар, неке.
- Чуртағҷылар, халых транспорты тоғынмаза, такси-де тоғынчатханнар полызығлар ӱчӱн пааны ӧскірібізерлер тіп чочынчалар. Мин профильліг министерстволарға паза сыныхтағ органнарына пу сурығны хайығда тударға чахығ пиргем. Такси тоғынҷыларын сыныхтирбыс. Таныхтирға кирек, сылтағ чох ниме-ноо паазын ӧскіргені законны сайбапчатханы полча. Оларның тоғызын 7 ноабрьға теере хайығда тударбыс. Мындағ оой нимес туста пасхазын ӱреге киріп, парыстанып аларға итчеткеннерні сизіндірерҷікпін.
- Чоохтап пиріңер, Сбербанк тоғынар ба?
- Республикада кирілген хатығластар банктарға теелбинче.
- ОСАГО-наң айғасчатхан страховой организациалардаңар чоохтап пиріңер.
- Тоғынарға чарадылча, ағаа хоза страховой организациаларның тоғынҷыларына ибдең сыхпин істенер оңдай пар.
- Ветеринар клиникалары тоғынар ба?
- Хатығластар оларның тоғыстарына теелбинче.
- Кӧп полызығ пирчеткен кінзер тынағ кӱннеріңде айланар оңдай полар ба?
- Республикадағы 102 № чарадығ хоостыра МФЦ тоғынҷылары ЗАГС органнарынаң палғалыстығ тоғыстарны апарарлар. Чуртағҷыларның хоных тӧстеенін пічікке кирерлер паза чарылысчатхан сӧбірелерні санға аларлар. Пала тӧрееннеңер паза кізі ӱрееннеңер пічіктер пирерлер. Пасха пічіктер хоостыра 7 ноабрь соонаң айланарға чарир. Ідӧк МФЦ тоғынҷылары тимнел парған пічіктерні пирерлер.
Автор :
Натальа ТЮКПЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде