ТІС ПРОТЕЗІН ТУРҒЫЗАРЫ ХООСТЫРА АЛЫЗЫҒЛАР
10.11.2021
Хабарлар
Чыылығ. Регион пазы Валентин Коновалов льготанаң тузаланчатхан чуртағҷыларға тіс протезін тикке турғызары хоостыра республиканың законодательстволарынзар алызығлар кирердеңер чыылығ иртірген
Ӱзӱрігде Хакасияның хазых хайраллаҷаң, істеніс паза социальнай тиліс министерстволарының кізілері араласханнар.
Амғы туста иргі законнарны хайди даа алыстырарға кирек. Анзы чуртағҷыларға тіс протезін турғысчаң тус сӧӧ тартылчатханынаң палғалыстығ. Ағаа хоза, хазна имнег учреждениелері пу тоғыснаң айғассалар, андада ахча республика бюджедінде хал турар.
- Чағдапчатхан 2022 чылда тіс протезін турғызары хоостыра законнарзар алызығлар кирілчеткеннеңер, піс аймах-городтарда ол тоғыс хайди апарыларын сыныхтаабыс, - чоох тутхан чыылығда хазых хайраллаҷаң министр Олег Ананьев-ский. - Алтай, Пии паза Ағбан пилтірі аймахтарында хазнаның имнег учреждениелері андағ тоғысха тимде нимес, оларның лицензиялары чоғыл. Аннаңар Ағбан пилтірі аймаандағылар тіс протезін турғыстырарға Харатассар чӧрерлер, Пии аймаандағылар - Саяногорсксар, Алтай аймаандағылар - Ағбанзар.
Тіс протезін наа оңдайларнаң турғызар тоғысты 2022 чылның 1 январьынаң пастир ӱчӱн, Хакас Республиканың тӧрт законынзар алызығлар кирерге киректелче: ол - «Чазы хоостыра страховой пенсияа сыххан чуртағҷыларға хоза социальнай полызығ пирердеңер» 15 № Закон, «Ветераннарға социальнай полызығ пирердеңер» 84 № Закон, «Ахталған паза политика репрессияларына хаптырған кізілерге социальнай полызығ пирердеңер» 85 № Закон, «Хакас Республиканың Аарластығ кізізі» аттаңар» 132 № Закон. Пу адалған законнарзар алызығлар кирңең проект тимде.
Таныхтирға кирек, республикада хай пірее имнег полызығлары тикке пирілбинче. Анзы имнег страхованиезінең палғалыстығ. Амды наа алызығлар хоостыра Хакасияда тикке имнег полызии алғыдылар. Чуртағҷыларға ол чахсы полар. Тіс протезін турғыстырҷаң кізілер саны хозылар.
- Тіс протезін тикке турғыстырҷаң льготанаң тузаланчатхан чуртағчылар айланыстарны пурнада істеніс паза социальнай арачыланыс министерствозынзар пасчалар. Андағы специалисттер тимде списокты хазых хайраллаҷаң министерствозар ысчалар. Піс ол кізілерні позыбыссар хығыртчабыс, - чарытхан Олег Ананьевский.
- Наа алызығлар хоостыра ведомстволар аразындағы пічіктерні тимнирі ӱрге сӧӧ тартылбасха кирек, - теен регион пазы Валентин Коновалов.
- Я, анзы наа чарадығда чарыда пазылых, - нандырған министр.
- Ведомстволар аразындағы пічіктерні тимнечең тус кӧзіділерге кирек. Тіс протезін турғызарға позыдылчатхан ахчаны чыл тоозылғанҷа толдыразынаң тузаланарға кирек. Иртер сессияа законнарзар кирілген алызығларны тимнеп саларға. Пазағы чылдаң тоғыс наа оңдайнаң парар. Кізілер пу алызығларны чахсы саринаң кӧрерге кирек, - чыылығны тоосхан Хакасия пазы В.Коновалов.
Автор :
Татьяна ТЮТЮБЕЕВА
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
