ӦӦН СУРЫҒ - ХАКАСИЯДА ТУРИЗМНІ ТИЛІДЕРІ
12.11.2021
Хабарлар
Тоғыс чорығы. Хакасия пазы, Москвада полып, Хазна Думазының туризмҷе паза турист инфраструктуразын тилідерінҷе комитеді кнезінең тоғасхан
Хакасия пазы Валентин Коновалов средада Россияның Хазна Думазының туризмҷе паза турист инфраструктуразын тилідерінҷе комитедінің кнезі Сангаджи Тарбаевнең тоғазығ иртірген.
Чоохтазығның ӧӧн сурии Хакасияда туризм отрасльын тилідердеңер полған. Республика туристтернің хайиин улам тартыпча. 2021 чылда Хакасияда наа турист чоллары тӧстелген: Бородинодағы хуйу туристтерні киреріне тимнелген, глэмпингтер тоғысха кирілген, хола чӱс чылның археология орыннарында пастағы туристтер пол килгеннер, Сойан-Сус ГЭС-сар туристтерге чол азылған.
Амғы туста республикада алты ӧӧн турист кластерін тӧстирінҷе тоғыс узарадылча. Туризм индустриязындағы проекттерге гранттарнаң полызары ӧткін тузаланылча.
Саблығ tourdom.ru портал республиканы хазнаның туризмні тилітчең иң чахсы оңдайлығ ӱс субъекті санына кир салған. Хакасия пір ле хати нимес National Geographic Тraveler журнал премиязының лауреады полған.
Туризм отрасльының чапчаң тилізі инвесторлар хайиин тарт сыххан. Амғы туста инвестиция проекттерінің, Хакасия чирінде чуртасха кирілчеткеннернің паза пӧгінде полчатханнарның, тиксі паазы 23 миллиард 900 миллион салковайға тиңнелче, оларның 19 миллиард 700 миллион салковайы - частнай инвестициялар. Чағынғы туста піс «Туризм.РФ» корпорациянаң пірге тоғынардаңар чӧптезіг идерге пӧгінчебіс. Ідӧк Хакасия «Туризм и гостеприимство» нацпроектсер кірерге тимде.
- Сангаджи Андреевич республиканы туризм отрасльын тилідерінче федеральнай хабазығ алар пастағы регионнар санына кирер сурығны пӧгерінче Хакасияа полыс пирерге тимде. Аны хоостыра ӧӧн туризм чирлерінің мастер-планнарын тимнирі кӧрілче, ідӧк киректелчеткен инфраструктура объекттерін пӱдіреріне паза нааҷылирына ахча позыдары, - таныхтаан Валентин Коновалов пу тоғазығның салтарларынҷа.
2022 чылның 27 - 29 апрельінде Хакасия чирінде «Сибирь. Притяжение-2022» чоннар аразындағы турист форумы иртер, хайзының ӧӧн сурии Сибирьде ыраххыдаң килңең туризмні тилідері полар. Хакасия пазы Сангаджи Тарбаевті ол чоннар аразындағы форум хоостыра 2022 чылның апрельінде пістің регионзар ааллап килерге хығырған.
Автор :
Хакасия пазының паза Хакасия правительствозыныц пресс-службазы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы