ПАСПОРТ ПИР САЛҒАЗЫҢ - ТОҒЫН
12.11.2021
Хабарлар
Брифинг. Хакасия правительствозының паза экономика тилізі министерствозының кізілері, хабарҷыларнаң тоғазып, идінҷектерге турғызылған наа санитар-эпидемиология кирексіністерін чарыт пиргеннер
Кічіг хырлас айының 9-ҷы кӱнінде Хакасия правительствозының паза экономика тилізі министерствозының кізілері «Хакас Республика бизнезінің хатығластар соондағы тоғызы» сурығҷа брифинг иртіргеннер. Республиканың экономика тилізі министрі Виктор Богушевич пу неделяда ас-тамахтаң пасха ниме-нооның садығ тураларына паза аймах полызығлар читірчеткеннерге, ідӧк чонны азырапчатханнарға тоғынарға чарадылчатханнаңар искірген. Че пастап оларға ӧменің иммунитет паспортын толдыр саларға кирек. Хакасия правительствозының сайтында паспорт кӧрімі тынағ кӱннерін ідӧк сығарылған. Экономика тилізі министерствозының тоғынҷылары понедельникте тоғысха сыхханнарында, 200 азыра паспорт кіргенін таныхтааннар. Кічіг хырлас айының 9-ҷы кӱнінде паспорттар саны 400-ке чит парған, ол санда ас-тамахтаң пасха ниме-ноо садығ тураларынаң - 365 айланыс, чонны азырапчатхан предприятиелердең - 42. Тиксі республикадаң 868 пос киреенең паспорт кірерге кирек. Специалисттер оларны чапчаң сыныхтирға паза чарадарға кӱстенчелер, че читпестер учураза, паспорт идінҷекке нандыра айландырылча.
Наа кірген паспорттарның чардығы иргі полтыр, идінҷектер, наа кӧрімні аспин даа, иргі паспортты ызыбыстырлар. Сын нимес искіріг кирілген алай кирексіністерге киліспинчеткен паспорттар идінҷектерге паза юридическай лицоларға нандыра ызылча, оларның тӱзедіглер кирерге пір неделя пар. Ол туста тоғынарға чарир, че, сыныхтағ килзе, паспорт толдырылғанын паза кӧстегліг ӱлгӱ органына ызылғанын киречілирге килізер. Киречілеп полбаза, пос киреенең айғасчатханнарны хатығластар сағыпча: Россияның административнай кодексінде идінҷектерге штраф 30 - 50 муң салковай синінде кӧрілген, юридическай лицоларға - 100 - 300 муң салковай.
- Паспорттарны толдырары сидік нимес, прай ниме пілдістіг паза чарыда тимнелген, - тіпче Виктор Богушевич. - Ӧӧні - ки-рексіністерні толдырары. Мин прайзына тіпчем, піске пір ай хатығ оңдайларда чуртап парыбызарға кирек, ағырығдаң озып алар ӱчӱн. Хайраллаалар позыбысты, сағыналар таңдағызынаңар. Пӱӱнгі кӱнде республиканың хазых хайраллаҷаң учреждениелері уғаа хатығ оңдайларда тоғынчалар. Коронавирусха хаптырғаннар аардаң аар ағырчалар, кислород кӧптең кӧп киректелче...
Виктор Николаевич, чуғынҷах ағырыға хаптырып, ӱрееннер саны ӧсчеткенін таныхтабаан. Кӱннің коронавируснаң ағырған кізілернің ӱрееннерін паза оларның санын кӧрерге изі чох пілдірче. Пу неделяның пастағы кӱннері хомай хабарлар санынаң соона халбинчалар: понедельникте 6 кізі коронавирустаң тоозылғаны киречілелген, вторникте - 10 кізі, средада - 13.
Амды полған на ӧмее позының иммунитедін тӧстир син 60 %-тең 80 %-ке ӧскірілген, ол санға коронавируснаң ағырғаннаң чарым чыл ирткелек тоғынҷылар паза пу чуғынҷах ағырығдаң тоғыр прививка турғыстырғаннар кірчелер. Хазии хоостыра прививка турғыстырарға чарадылбинчатхан пічіктіг тоғынҷылар ол санға кірбинчелер. Аннаң пасха, садығ тураларында тӧрт квадрат метрде пір кізее чӧрерге чарир. Чуртағҷылар, тізең, чон азыраҷаң орынзар, спортзал алай пірее ӱтертіс орнынзар парчатса, коронавирустаң тоғыр прививка сертификадының QR-кодын кӧртізерге тимде поларға киректер. Пу орыннарда аны хайди даа сурарлар.
Хабарҷылар идінҷектер толдырар кирексіністердең пасха, ідӧк республика синінде оларға пирілер хабазығдаңар сурғаннар. Виктор Богушевичтің искіриинең, Хакасия пазы Валентин Коноваловтың чахиинаң кӧстегліг министерство республиканың идінҷектеріне хабазар оңдайны тимнеп салған. Хакасия пазы ол пічікті Москвазар тоғыс чорығы соонаң кӧрер. Килчеткен понедельникте пілдістіг полар, республика идінҷектерге нименең хабас полар. Сағам, тізең, оларға айландырылбас грантнаң тузаланарға чӧптепчелер. Аны Россия президенті ирткен неделяны тоғынмаҷаң кӱннер чарлаанында кирген. Идінҷекке пирілер грант ахчазы анда тоғынчатханнар санынаң паза иң тӧбін чал ахчазы синінең палғалыстығ. 2021 чылда иң тӧбін чал ахчазы 12792 салковайға тиңнелче. Ол син ахча пір тоғынҷаа саналар. Идінҷек ідӧк тоғынҷы санына кірче. Аннаң пасха, ӱреге кірген идінҷектернің тӧбін проценттіг кредиттер алңаң оңдай пар. Оларны алар ӱчӱн, Россияның банктарынзар паза «Хакасияның гарантия чыындызы - кічіг кредит компаниязынзар» айланарға чарир.
БРИФИНГТІҢ ХЫСХА САЛТАРЛАРЫН ИДІБІЗЕРБІС:
- локдаун соонаң идінҷекке паза юридическай лицоға тоғысты пастир ӱчӱн, ӧменің иммунитет паспортын ӱлгӱ органнарынзар, Хакасияның экономика тилізі министерствозынзар алай орындағы пос устаныссар, ызарға кирек. Пічіктерні электроннай почтаҷа ызарға алай посха ағыларға чарир. Пічіктер сыныхталчатхан туста тоғынарға чарир;
- паспортта пӱӱнгі кӱннің кирексіністеріне килістіре искіріг пирілерге кирек, ол санда тоғынҷыларның 80 проценті коронавирустаң тоғыр прививка итірген алай чуғынҷахнаң ағырғаннаң чарым чыл ирткелек поларға кирек;
- паспортта идінҷек, юридическай лицоның устағҷызы хайди даа хол саларға кирек;
- саба алай сын нимес искіріг кирілген паспорттар нандыра айландырылча, аны тӱзедерге пір неделяҷа ла тус пирілче;
- культура, спортучреждениелері, ӱтертіс орыннары паза чон азыраҷаң предприятиелер чуртағҷылардаң хайди даа прививка сертификадының QR-кодын сурарға кирек;
- ӱреге кірген идінҷектерге хоза хабазығдаңар килчеткен неделяда искірілер.
Хоза сурығларҷа Хакасияның экономика тилізі министерствозынзар пу телефонҷа сығдырадарға: 8(3902) 248-200.
Устағҷылар ідӧк, республиканың имнег учреждениелерінің тоғызынаңар сағыссырап, пос чуртазын хайраллап, андар-пеер тың чӧрбин, пір айҷа сыдазарға сурынчалар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде