КИРЕК ПЕ ТРАНСПОРТХА ТЕХОСМОТР?
12.11.2021
Хабарлар
Пос кӧрізі. Россияның автомобилисттеріне ӱр сағаан чахсы хабар искірілді. Чоох парча транспортха техосмотр (ТО) иртірер сурығдаңар. Кирек пе аны иртірерге алай чох па сурығ хас-хаҷаннаң ӱзӱрілче
Пу сурығ Россиядағы полған на автомобиль ээзін сағыссыратча. Аны пӧгер аймах чарадығлар, законнар кӧп алылҷаң, пірееде ТО иртерін хатығлап салчатханнар, пірееде, тізең, нымзат салҷаңнар. Кӧзідімге, ӱр ниместе техосмотрны хазна пирген полномочиеліг, аккредитация алған операторлар ла иртірер праволығ полғаннар. Олар транспорттың тормоз, фаралар, сигнализация, двигатель, руль системалары хайди тоғынчатханын сыныхтирға кирек полғаннар. Ағаа хоза, диагностика иртер алнында паза ирткен соонда, транспортты сомға суурып, аны техосмотр ирткеннеңер пірге искіріг системазына кир саларға кирек полған.
Соонаң ілезіне сығыс килген - хазнада техосмотрны іди иртірҷең оборудованиеліг кіннер чидіспинче. Анда ТО иртерге киректелчеткен автомобилисттер узун теестерде турғаннар. Андағ нимені тӱзедерге киректелген. Анаң ниикке чӧрҷең автомобильлерге, мотоцикллерге, 3,5 тоннаа теере таарлағ тартчаң машиналарға, прицептерге ТО иртпеске чарадығ алылған. Че ол транспорттың сығарылған тузы 4 чылдаң азыра полбасха кирек. Ідӧк ОСАГО идеріне ТО ирткеннеңер диагностика картазын кӧзідерге кирек чох полыбысхан.
Техосмотрны хайди иртірерінҷе алызығлар илееде полған. Че ниме дее полза, транспорттың чахсы тоғызы ӱчӱн аның ээзі нандырығлығ полча. Россияның транспортты тузаланысха кирер чоннар аразындағы оңдайлары Чол чӧрізінеңер конвенцияда кӧріл парған. Аны хоостыра техосмотрны хайди даа иртерге киректер автобустар паза 3,5 тонна азыра таарлағ тартчаң машиналар, ідӧк оларның прицептері.
Мында таныхтирға кирек, пістің хазнада ТО иртері кирек чох нимее хаҷанох айлан парған. Аны иртірер пункттар ахча ла тоғынып алчатханнар, ТО ирткеннеңер диагностика карталары олаңай ла садылчатхан. Мағаа даа ТО иртерге килісчең, оператор, автомобильні кӧрбин дее, диагностика картазын толдырып, ТО ирткеннеңер искірігні пірге искіріг системазына кир салча, ағаа тӧстеніп, страховой компания ОСАГО полизін пирче, ТО иртчеткен пункт, саай пол парза даа, пір дее ниме ӱчӱн нандырығ тутпинча.
Ам ирткен табығлар алнындағы кампанияда прай даа партиялар техосмотр иртірерін чох идер молҷағнаң сыхханнар. Амды, пу сурығны «Единая Россия» холға алғанда ла, кирек орыннаң тибіреенге тӧӧй. Хазна Думазында, иң кӧп кізіліг полып, единоросстар прай киректерні холда тутчалар нооза. Іди, автомобилисттернің кӧп айланыстарын санға алып, Россияның Хазна Думазы 9 ноябрьда пленарнай чыылығда ниикке чӧрҷең автомобильлерге паза мототранспортха хайди даа техосмотр иртірерін чох итчеткеннеңер законопроект-ті пастағы хығырығда алыбысхан.
Пу законның проекті пос холындағы автомобильлер паза мототранспорт ээлеріне ле теелер. Оларға техосмотрны иртерге кирек полар автомобильні санға турғысчатса, транспорт ээзі алысчатса, машина 4 чыл азыра тузаланыста полған полза. Ідӧк машинаның пӱдізін алыстырза, ТО иртерге кирек полар.
«Пу чарадығ кӧп автомобиль ээлерінің чуртазын нииктир. Чоох парча 50 миллионҷа транспорттаңар. Кізілер тартчатхан автобустарға, грузовиктерге паза таксиге пір дее ниме алыспас. Пассажирлерге паза чол чӧрізінің пасха даа араласчыларына хорғыс полдыртпас пӧгіннең, олар мының алнындағыох чіли техосмотр иртерлер», - таныхтаан Хазна Думазының кнезі Вячеслав Володин.
Россияның правительствозы техосмотр иртірерін чох итчеткен законопроектнең чарасхан. Че аны ам даа читіре тоғыныбызарға кирек полар. Хайди страховой компанияларның саннары кӧзітчелер, пол парған саайлар техосмотрны ирткеннең алай иртпееннең пір дее палғалыспинча.
Андағ оңдайнаң, техосмотрны мыннаң мындар автобустарға, таарлағ тартчаң машиналарға паза оларның прицептеріне, таксиге паза служебнай транспортха хайди даа иртерге кирек полар. Анзы пу законопроектті ікінҷі хығырығда Хазна Думазы кӧрчетсе, хайдағ алызығлар, тӱзедіглер кирілерінең палғалыстығ полар. Депутаттар законопроектті пу айда пӱкӱлее алыбызар пӧгін тутчалар. Техосмотрны пос кӧңнінең иртібізерге пірдеезі харығ полбас. Полған на автомобилист позының транспортын чахсы тоғындырарынаңар сағыссырапча. Пірдеезі аны машинаңны чахсы кӧр тіп кӱстебес.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы