МЫНДА ХАЗЫХТАРЫН ТЫЫДАРЛАР
12.11.2021
Хабарлар
Танығлығ кирек. Пу кӱннерде Пии аймаандағы Хойбал аалда олғаннарға спортнаң айғасчаң площадка азыл парған
Ол спорт ачығын азарға кил парғаннар Хакасияның национальнай паза территориальнай политика министерствозындағы орындағы пос устаныс органнарынаң палғалыс тутчаң пӧліктің советнигі Ольга Тиде, Пии аймааның пазы Иннокентий Стряпков, Алахтайлар аал чӧбінің пазы Леонид Чаптыков.
Пастыхтар, чоох тудып, хызыл лента хыплааннар. Анаң кізілер, спорт ачығынзар кіріп, андағы тренажерларны холнаң тудып, кӱстерін сынап кӧргеннер. Анда чилеңместер, турниктер, азах-хол тыытчаң тренажерлар турча. Майых парғаннарға одырарға пик сіреелер турғызыл парған.
Алахтайлар аал чӧбінің пазы Леонид Чаптыков олғаннарға тимнелген спорт ачығын хайди пӱдіріп алғаннаңар чоохтап пирген. Пу аал чӧбі Хакасияның национальнай паза территориальнай политика министерствозы муниципалитеттер аразында иртірчеткен аал-городтар чазир марығда тӧреміл араласча. Андағ оңдайнаң спорт площадкалары Алахтайлар аал чӧбіне кірчеткен Ут, Алахтайлар паза Салғын аалларда пӱдіріл парғаннар. Амды Хойбалда андағ ачых парох.
Чаптых аалда ла пӱдірібізерге халған. Пӱӱл пу аал чӧбі республика мариинда ікінҷі орын алған. Утхан ахчаа Хойбал аалда олғаннарға ойнаҷаң орын пӱдірерге пӧгін полған. Ол кирекке прай 500 муң азыра салковай хорадылған. Пу спорт ачығына Алахтайлар аал чӧбінең кӧп чыл устаан Евгений Иосифович Капсаргиннің адын пирерге чаратханнар. Ол пу аалдаң полған нооза. Хомзынысха, чуртастаң ирте парыбысхан.
Кічіг аалларда спорт площадкалары кирек ле. Хойбалда ачыхты азынада арығлабысханнар. Ибіре сиденнебіскеннер. Хости Илбек Ада чаада чат халған чааҷыларға чарыдылған хумартхы тас турча. Соонаң пу ачыхта хоза волейбол, баскетбол ойнаҷаң орыннар полар. Площадка ибіре ағастар одырт саларлар. Чайғы клуб таа пӱдір саларға чарир. Чайғызын аалзар городтаң кӧп олған килче. Пір сӧснең, мында аалдағыларға культура паза тынағ паркы пол парар.
Спорт ачығы азылған кӱн пір улуғ частығ ипчінең чоохтасхабыс. Ады-солазын чоохтирға пір дее хынмаан. Ол ідӧк аал чуртазынаңар хысхаҷахти чоохтап пирген:
- Мында чуртирға истіг. Маллар тударға килістіре чир. Итсе-де, мин хойлар паза сосхалар тутпиныбысхам. Оларның соонҷа чӧрерге аар. Пілбес, че мині хызым Ағбан городсар чуртирға хығырча. Оолғым даа анда чуртапча. Чииттер аалда халарға хынминчалар. Ирістіг тіпчелер. Пархаларым, чайғызын килзелер, ідӧк эрінчелер. Ам, мындағ площадка пӱдір салғанда, олғаннар даа, чииттер дее пеер чыылызарлар. Мин дее кізі кӧрбес аразында мында спортнаң айғазарчыхпын...
Сынап мындағ парктар полған на аалда полған полза, чииттер дее аалдаң городсар кӧспесчіктер. Хойбал аалда чуртирға прай ниме пар: пасталығ школа (нааны пӱдірерге кирек), фельдшер-акушер пункты (тураҷағы хысхызын соох, че имҷі пар), клуб (ідӧк тыхталбин парир). Че аалдағы чон кілебинче, чуртазына хомзынминча, мал тудып, чир тамаан салып чуртапча.
Автор :
Илья ТОПОЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы