Локдаунның салтары кöрiнче
12.11.2021
Хабарлар
12 ноябрьда коронавирустаң тоғыр кӱресчең оперштаб чыылиин Хакасия пазының орынӌызы Ольга Пономарева иртiрген.
Халғанӌы танығлар хоостыра пӱӱнгi кӱнге Хакасияда COVID-19 ағырығны хаптырған он пiр кiзiнiң ӱреенi киречiлелген. 57, 60, 61, 68, 70, 74 частығ ипчiлер паза 37, 61, 65, 75, 82 частығ иреннер ӱреен. Чыл пасталғаннаң республикада пу ағырығдаң тиксi 1078 кiзi ӱредi. Пӱӱн Хакасияда «коронавирус» диагнозтығ 631 кiзi имненiп алған.
12 ноябрьда наа чуғынӌах ағырығны 206 кiзi хаптырып алған, ол санда: Ағбанда – 79, Саяногорскта – 36, Харатаста – 20, Алтай аймаанда – 16, Ағбан пилтiрi аймаанда – 14, Асхыс аймаанда – 11, Абазада – 8, Шира аймаанда – 7, Таштып паза Пии аймахтарында – тöртер, Сорығда паза Орджоникидзе аймаанда – ӱзер, Боград аймаанда – 1.
Кискектеп, имнег туразынзар 71 кiзi айланғанда паза 19 кiзi пневмонияа сыныхтанғанда, коронавирусты хаптырғаны сығысхан. Ибдегiлердең 84 кiзi чухтырған, тоғыста – 17 кiзi. Россияның пасха субъекттерiнең паза хырығ озаринаң ағырығны 5 кiзi ағылған.
Чыл пасталғаннаң Хакасияда COVID-19 ағырығны 28908 кiзi хаптырған. Пӱӱнгi кӱнде ағырғаннарнаң хада палғалысхан 4330 кiзi имӌiлер хайиинда. 5824 кiзi ибде имненче, имнег тураларында – 1558 кiзi, ол санда ИВЛ аппарадында 16 кiзi тынча.
Пӱӱнгi кӱнде республикада COVID-19 чуғынӌахнаң ағырчатханнарға имненӌең 1889 орған пар, 1611 орғанда кiзi чатча, 15% пос турча.
– Локдаун тузында республиканың чуртағӌылары пiр неделя ибде одырғанының салтары кöрiнче. Коронавируснаң аар ағырчатханнарның cаны öспинче. Кискек ағырығ 30%-ке тӱс парған. Че ағырығ амырапча тiп öрiнерге паза пос салынарға ам даа ирте. Имӌiлер, прай кӱстерiн салып, хараа-кӱнöрте тоғынчалар. Чуртағӌыларға вакцинация иртерге, маска режимiне тудынарға, удур-тöдiр оортах чöрерге мыннаң мындар киректер, – таныхтаан оперштаб чыылиинда Хакасияның хазых хайраллаӌаң министрi Олег Ананьевский.
Прививкадаңар чоохтаза, республикада коронавирустаң тоғыр вакцинация öткiн пар сыхты. Ирткен кӱнде прививканы ӱс муң кiзi турғыстырып алған. Чонның пiр иммунитет полар ӱчӱн, Хакасияның 80% чуртағӌызы (322000 кiзi) прививкалығ поларға кирек. Пӱӱнгi кӱнде чуртағӌыларның 61%-i аны иртiбiскен.
Автор :
Татьяна Тютюбеева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы