Кимдегi Сибирь кӧзiдии ирттi
12.11.2021
Хабарлар
Пу кӱннерде Хакасияның улуғ делегациязы Москвада тоғынча. Республика пазы Валентин Коноваловтың устаанаң республика правительствозының кiзiлерi Россияның пасха хан киректерiнҷе министерствозында (МИД) Кимдегi Сибирьнiң кӧзiдиинде араласханнар. «Кимдегi Сибирь» – ол килкiм инвестиция проектi, 2017 чылда ӱс регионнаң пӱткен: Хызылчар крайынаң, Хакас Республикадаң паза Тыва Республикадаң. Килкiм инвестиция проектi пу регионнарның чуртас-экономиказын кӧдiрерiне кӧстелген. Ол Россия синiнде чарадылып, инвестиция проекттерiн чуртасха кирерiне хабасча. Тиксi алза «Кимдегi Сибирьге» ӱс регионнаң 32 инвестиция проектi хазна синiнде чарадыл парған, ол санда Хакасияның 11 проектi.
МИД паза «Кимдегi Сибирьнiң тилiс корпорациязы» пiрiгic, хада-пiрге тоғыс апарып, пасха хан чирлерiнiң Россиядағы дипломаттарына килкiм инвестиция проектiнiң кӧзiдиин тимнеен. Ӱс регионның экономиказының тилiс оңдайлары чарыдылған паза культуразы кӧзiдiлген. Кӧзiдiгде iдӧк Хызылчар крайының губернаторы Александр Усс паза Тыва Республиканың пазы Владислав Ховалыг араласханнар. Кӧзiдiг алнында регион устағҷыларынаң хада Россияның МИД министрi Сергей Лавров тоғасхан.
– Пасха хан чирлерiнiң дипломатическай представительстволарының устағҷыларына Кимдегi Сибирьнiң кӧзiдиинде тоғазығ ирткен, – пасча Валентин Коновалов социальнай сетьтердегi позының страницаларында. – Чоохтазығда ӧӧн хайығ Хакасияда туризм кӧстеенҷе паза тастындағы экономика палғалыстарының тилiзiне айландырылған. Пiстiң республика чоннар аразындағы мероприятиелер иртiрерге чахсы орынға саналча.
Тастындағы экономика палғалыстарын тилiдер кӧcтегнең Хакасияда Экспорттың хабазығ кiнi азылған. Аның пӧгiнi – пос киреенең айғасчатханнарны чоннар аразындағы рыноктарзар сығарарға. Пӱӱнгi кӱнге Казахстанның, Азербайджанның, Японияның, Монголияның паза Вьетнамның идiнҷектерiнең палғалыс пар.
Хакасияа Россия МИД-ының хабазии уғаа кирек, ӧӧнiнде республиказар пасха хан чирiнiң идiнҷектерiнiң чорыхтарын тимнирiнҷе, олар орындағы ӱлгӱ органнарынаң паза пос киреенең айғасчатханнарнаң хада чӧптезер ӱчӱн. Сергей Викторович iдӧк МИД-тың хырығ озариндағы культура проекттерiне Хакасияны кирердеңер сурығны пӧгерге хабазарға тимде.
Кӧзiдiг Россия МИД-ының культура кiнiнiң сценазында ирткен. Аның официальнай чардығын Cергей Лавров асхан. Ол пу проекттiң синiне паза инвестицияларға пай полчатханына, регионнарның экономика оңдайларына, iдӧк чир-чайаан паза культура ис-пайына кӧзiдiг араласчыларының хайиин айландырған. Министр регионнарның хырығ озариндағы партнерларнаң палғалыстарны тилiдерiнҷе, тастындағы палғалыстарны алғыдарынҷа кӱстенiзiн, Россия МИД-ының паза аның субъекттердегi представительстволарының пу сурығларны пӧгерiне хозымнарын таныхтаан.
Хакасиядаңар, аның экономикадағы, туризмдегi паза культурадағы кӱстiг сариларынаң республика пазы Валентин Коновалов таныстырған. Ол «Кимдегi Сибирь» инвестиция проектiнҷе республикада чуртасха кирiлчеткен 11 проекттеңер алғыда искiрген. Оларның тиксi инвестиция пазы – 293 миллиард салковай. Проекттер чуртасха толдыразынаң кирiлген соонаң республикада 7000 наа тоғыс орны тӧстелер. Инвестиция проекттерiнiң ӧӧн экономика кӧстеглерi: аныпчатхан паза тимнепчеткен промышленность, транспорт инфраструктуразы.
Аннаң пасха регионда ӧӧн экономика кӧстеглерiне кӧрчеткен отрасльҷа 18 инвестиция чӧбi тимнелген, ол санда металлургияда, промышленностьта, информационнай технологияларда паза аал хониинда. Тиксi алза, оларны чуртасха кирерге 70 миллиард салковай инвестиция киректелер.
– Хакасия, позының саринаң, пасха хан чирлерiнең аалҷыларны хаҷан даа ӧрiнiснең удурлапча. Ол кӧстеге пicтiң чоннар аразындағы аэропорт, хынығ экскурсия программалары, ол санда чон чуртазынаң палғалыстығ, паза пай археология ис-пайы. Пiс сервистi чахсыландырарынҷа паза турист инфраструктуразының синiн ӧскiрерiнҷе ӧткiн тоғынчабыс, – таныхтаан Хакасия пазы Валентин Коновалов. – Салтарында Хакасияны чоннар аразында паза хазна синiнде пiлiп. TourDom.ru ӧӧн турист порталы республикабысты туристтерге иң килiстiре оңдайлығ 3-топ регион санына кирген.
Мероприятиеде тӧcтелген наа палғалыстар Хакасиязар инвестицияларны тартарға, iдӧк ниме-нооларны чоннар аразындағы рыноктарзар сығарарға полызар. Валентин Коновалов Сергей Лавровты паза Россия МИД-ының представительствозын Хакасияа, «Кимдегi Сибирь» инвестиция проектiнiң партнерларына хайығ айландырған ӱчӱн алғызын читiрген паза республиказар килерге, «Сибирь. Притяжение - 2022» чоннар аразындағы форумда аралазарға хығырған. Форумны 2022 чылныы хосхар айының 27-29-ҷы кӱннерiнде иртiрерi кӧрiлче.
Хакасияның культура ис-пайын кӧзiдерiнде республиканың саблығ ырҷылары паза чайаачы ӧмелерi араласханнар. Ол санда республика филармониязының солисттерi Артур Марлужоков, Александра Черпакова, Юрий Шалгынов, «Алтыр» мода театрының абахай хыстары паза «Кӱн сузы» ансамбльның теелбекчiлерi полғаннар. Тимненiснең устаан Хакасияның культура министрi Светлана Окольникова.
Автор :
Тимнеен Наталья Субракова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы