АННАҢ АНДАР НИМЕ ПОЛАР?
19.11.2021
Хабарлар
Пу неделяда тиксі Россияның чуртағҷыларын санға аларының пастағы чардығының салтары иділче, статистика службазының органнары, тізең, ікінҷі чардығына кірібіскеннер
Пір ай Россияның чуртағӌыларын санға аларынӌа тоғыс апарылған, кічіг хырлас айының 14-ӌі кӱніңде пу тоғыс тоозылған. Вторникте, кічіг хырлас айының 16-ӌы кӱніңде, чуртағӌыларны санға аларының пастағы чардығының салтарын Росстат идібіскен. Устағӌы Павел Малковтың искіриинең, чонны санға аларынӌа кӧрілген тоғыстарның 99 % толдырыл парған. Чуртағӌылардаң искіріг тӧрт оңдайнаң, «Хазна полызығлары» порталӌа, санға алӌаң кізі полызиинаң, санға алӌаң участокта паза ӧнетін контингент (чаа частьтары, хариблер) пастыра, чыылған.
Киӌее, тізең, Хызылчарстаттың устағӌызының орынӌызы Татьяна Шаршова Хакасияда тиксі Россияның чуртағӌылары санға алылғанының пастағы чардығы хайди ирткенінің салтарын брифингте чарытхан. Аның искіриинең, тоғыстар ідӧк 99 % толдырылған, че толдыра искіріг республиканың 85 % чуртағӌызынаң на чыылған. 17 муң чуртағӌы переписьте аралазарға ынабаан. Олардаңар искірігні орындағы пос устаныс органнары пирер. Санға алылбаан чуртағӌыларның, переписьтің пасха араласчыларының чіли, ады-солазы таныхталбинча, полы паза тӧреен чылы ла кӧзіділче. Пілдістіг, андағ чуртағӌының сурас-тырии толдыра нимес. Аның ӱгредии, хоных хонғаны, пала саны, чурт оңдайлары, национальнозы, пілчеткен тіллері, тӧреен тілі санға алылбинча.
Татьяна Владимировнаның таниинаң, хазнада тоғынмаӌаң кӱннер чарлалғаннаңар, чуртағӌыларның санға алыларында араласчаң кӧңні тӱс парған. Аннаңар мында статистика органнарына хабарлар таратчаң оңдайлар, ол санда «Хакас чирі» газета, сығарған искіріглер паза волонтерлар чӧрімі чахсы полысхан.
- Волонтерлар чӧріміне тиксі Россияның чуртағӌыларын санға аларында аралазарға чапсых полған, - чарытхан «Санға аларының волонтерлары» региондағы штабтың устағӌызы Оксана Трусова. - Килкім мероприятиелерде, ол санда хазна синіндегі табығларда, волонтерлар 2014 чылдаң ала аралас парирлар, аннаңар опыт пар. Че наа араласчыларға, оларның аразында 18 час толдырғалах олғаннарға, санға аларынаңар искіріг- чарыдығлығ тоғыста аралазарға тузалығ полған.
Оксана Витальевнаның таниинаң, волонтерлар республика чуртағӌыларының саннығ технологияларға тың киртінминчеткеніне хайығ айландырғаннар. Чочынчалар. Ноға «Хазна полызығлары» портал ізестіг паза нимезінең ол тузалығ? - пу сурығларға нандырығ пирерге кӱстенгеннер пос кӧңнінең полызарға хынчатхан чииттер. Ідӧк олар чонны санға аларының пӧгіннерінеңер паза .тузазынаңар чарытханнар. Ӧӧн тоғысты олар тасхар, орамаларда, апар турғаннар.
Хакасияда санға аларын иртірерінӌе пӧлік пастығының орынӌызы Тамара Стельмах чыылған искірігнең тоғынчатханда, нинӌе-де чапсых танығлар иткен: республикада кізі чуртабинчатхан ааллар пар, Хакасияда ӧӧн орыс паза хакас чоннарынаң пасха кумыктар, цахурлар, табасараннар, даргиннер паза лезгиннер, ӧӧнінде Дагестан Республиканың чоннары, чуртапча. Россия чуртағӌыларының тиксі саны 2022 чылның кӱрген айында искірілер, чонны санға алғанының толдыра искірии, ол санда нацияларӌа, 2022 чыл тоозылғанӌа тимде полар.
Пӱӱл чонны санға алары алында чонны санға алғанынаң пасхалалча. Саннығ технологиялар кирілгені чыылған искіріглернең тоғыстарны айныдар. Амды 3-4 чыл парыбысчаң тоғысха пір чыл чидеріне ізенчелер специалисттер. Ағаа хоза, чонны санға алғаны Россияның «Аврора» операционнай системазын тоғыста сыныхтирға полысхан. Санға алӌаң кізілер планшеттернің тоғызына чӧпсінгеннер.
Ідӧк санға алӌаңнарның сидік оңдайларда тоғынғаны паалалған. Республикада 1000 азыра кізі тоғысха тартылған. Прайзы коронавирусты хаптырарынаң, тоғыста кинен пол парарынаң страхование иттірген. Іди 57 кирек санға алылған: 42 кізі ковидке хаптырған, пасхазы, иблеп чӧрчеткенде, чуртағӌыларға сохтырған, адайға ызыртхан. Росстат прай андағ киректерні хайығда тутча. Ідӧк санға алӌаңнарға ай тоозылғанӌа чал ахчазын тӧлеп пирерге молӌапчалар. Татьяна Шаршованың таниинаң, санға алӌаңнар ара-зында аймах кізілер тоғынған-нар: тынағдағылар, ӧӧн тоғыс-та отпусктағылар, студенттер, ибде одырчатханнар паза пасха-зы. Оларның аразында кӧрілген синні, 550 кізіні сурастырарын, ӱс хати артых толдырғаннар пар. Пір 70 частығ пенсиядағы ипчі велосипедтіг тоғынтыр. Оларны хайди даа алғыстас пічиинең таныхтирға молӌаан Хызылчарстаттың устағӌы орынӌызы Татьяна Шаршова. Ол ідӧк Хакасияның экономика тилізіне паза орындағы пос устаныс органнарына чӧптіг тоғынған ӱчӱн алғызын читірген.
Амды тиксі Россияның чуртағӌыларын санға алары 2030 чылда ла иртер. Росстат устағӌызының ухаанӌылазынаң, ол саннығ ла оңдайнаң иртер паза аны полған на чуртағӌы иртерге кирек полар. Кӧрербіс, хайди наа технологиялар 10 чыл аразына тилир паза пістің чуртазыбысты алыстырар.
Автор :
Наталья БОРГОЯКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы