Чылығ пирҷең магистраль тоғындырылды
22.11.2021
Хабарлар
Пӱӱн Хакасиязар тоғыс чорығынаң Россияның энергетика министрi Николай Шульгинов кил парды. Аның тоғыс чорығында республиканың нинҷе-де предприятиезiнде пол килерi кӧрiл парған. Иң пастағызын Николай Шульгинов Ағбандағы ТЭЦ-сар парған. ТЭЦ-сар тоғыс чорығында iдӧк “СУЭК” АО-ның ööн директоры Степан Солженицын, «СГК» ООО-ның ӧӧн директоры Герман Мустафин, пуох компанияның техдиректоры Олег Петров, "СУЭК-Хакасия" ООО-ның ӧӧн директоры Алексей Килин паза СГК-ның Ағбандағы филиалының директоры Андрей Аплошкин араласханнар.
Пӱӱнгi кӱнде Ағбандағы ТЭЦ Харатас городха чылығ пирерге тимненче. Аның ӱчӱн Ағбандағы ТЭЦ-ты паза городтың чылығ пирҷең сетьiн пiрiктiрчеткен магистраль тартылған. Пӱӱн Хакасия пазы Валентин Коновалов паза «СУЭК» АО-ның ӧӧн директоры Степан Солженицын Россияның энергетика министрi Николай Шульгиннең хада Харатас городсар чылығ пирҷең магистральны тоғындырҷаң кнопканы пазыбысханнар. Харатасчыларға пу кӱн уғаа танығлығ полар. Городта чылығ пирерiнҷе сидiксiнiстер пiр ле чыл турбинча, аннаңар кӱстiг предприятиее пiрiккенi мыннаң мындар чылығ ӱзiлбин читiрiлерiне iзенiс пирче. Чылығ кӱстiг предприятиедең пирiл сыхса, харатасчылар городында iдӧк экологияа ӱрег хызырылар – городтағы читi котельнай чабылар. Ағбандағы ТЭЦ-таң чылығ Харатастағы 500 азыра тураа паза 60 социальнай пӱдiрiге читiрiлер.
Чылығ пирҷең магистраль тузаланысха кирiл парған. Сыныхтағ тоғыстары тоозылза паза чылығ пирерi иптел парза, харатастағыларға Ағбандағы ТЭЦ-таң чылығ паза iзiг суғ читiрiлер. Тоғысты иптирiне iкi неделя парыбызар. Олох туста хысхы тоозылғанҷа сидiксiнiстер сығызарынаңар сизiндiрчелер чылығ пирчеткеннер. Ол чылығ пiлдiрте кӱстiг предприятиедең читірiлерiнең палғалыстығ.
Чоохтирға кирек, 2,5 миллиард салковай турчатхан СГК-ның килкiм инвестиция проектiн Россияның энергетика министерствозы паза ЖКХ реформазын иртiрерге хабасчаң чыынды чуртасха кирерге хабасханнар. Харатас городтаң Ағбандағы ТЭЦ-сар чылығ пирҷең 12 километр магистраль тартылған, город iстiнде чылығ пирҷең 30 километр трасса нааҷылалған паза пӱдiрiлген. Соонаң пу магистраль полызиинаң Ағбан пилтiрi аймааның ааллары хара тас котельнайларының тоғызынаң хыйа парарлар.
– Харатас городтың чуртағҷылары iзестiг паза чахсы полызығ аларлар. Тиксi алза, проекттiң чуртасха кирiлгенi Хакас-Минсуғ ойымына теелiстi хызырар, ол пiс тынчатхан киинi чахсыландырарға пастағы хаалағ полар, – чарытхан Валентин Коновалов.
СГК эксперттерiнiң сананыстарынҷа киизер сығарылчатхан оолығ ниме-ноо синi чылда 5-6 тоннаа хызырылар.
– Котельнайларны чаап, пiс киизер оолығ ниме-нооларның сығарызын синдiрчебiс, ӱзӱрлирiнҷе кӧзiдiглернi чахсыландырчабыс, иң ӧӧнi, тiзең, чылығ пирерiн iзестiг читiрiп, чуртағҷыларның чуртас синiн чахсыландырчабыс, тилирге паза чурт пӱдiрерге оңдай пирчебiс, - теен Россияның энергетика министрi Николай Шульгинов.
СГК iдӧк Ағбан городтың ӱстӱнзархы-кидеркi сариндағы алынҷа тураларны чылығ пирҷең ӧӧн системаа пiрiктiрерiнҷе проекттi чуртасха кирче, пу тоғыстар iдӧк экологияны чахсыландырарына кӧстелген.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы