ХАРАТАСХА ЧЫЛЫҒ НАА ЧОЛҶА ПОЗЫДЫЛДЫ
24.11.2021
Хабарлар
Инвестиция проекті. Хакасиязар Россияның энергетика министрі Николай Шульгинов кил парды. Аның тоғыс чорығында республиканың нинҷе-де предприятиезінде пол килері кӧріл парған
Иң пастағызын Николай Шульгинов Ағбандағы ТЭЦ-сар парған. Тоғыс чорығында ідӧк «СУЭК» АО-ның ӧӧн директоры Степан Солженицын, «СГК» ООО-ның ӧӧн директоры Герман Мустафин, пуох компанияның техдиректоры Олег Петров, «СУЭК-Хакасия» ООО-ның ӧӧн директоры Алексей Килин паза СГК-ның Ағбандағы филиалының директоры Андрей Аплошкин араласханнар.
Пӱӱнгі кӱнде Ағбандағы ТЭЦ Харатас городха чылығ пирерге тимненче. Аның ӱчӱн Ағбандағы ТЭЦ-ты паза городтың чылығ пирңең сетьін піріктірчеткен магистраль тартылған. Кічіг хырлас айының 22-ҷі кӱнінде Хакасия пазы Валентин Коновалов паза «СУЭК» АО-ның ӧӧн директоры Степан Солженицын Россияның энергетика министрі Николай Шульгиновнаң хада Харатас городсар чылығ пирҷең магистральны тоғындырҷаң кнопканы пазыбысханнар. Харатасчыларға ол кӱн уғаа танығлығ полар. Городта чылығ пирерінҷе сидіксіністер пір ле чыл турбинча, аннаңар кӱстіг предприятиее піріккені мыннаң мындар чылығ ӱзілбин читірілеріне ізеніс пирче. Чылығ кӱстіг предприятиедең пиріл сыхса, харатасчылар городында ідӧк экологияа ӱрег хызырылар - андағы читі котельнай чабылар. Ағбандағы ТЭЦ-таң чылығ Харатастағы 500 азыра тураа паза 60 социальнай учреждениелерге читірілер.
Чылығ пирҷең магистраль тузаланысха киріл парған. Сыныхтағ тоғыстары тоозылза паза чылығ пирері иптел парза, харатастағыларға Ағбандағы ТЭЦ-таң чылығ паза ізіг суғ читірілер. Тоғысты иптиріне ікі неделя парыбызар. Олох туста хысхы тоозылғанҷа сидіксіністер сығызарынаңар сизіндірчелер чылығ пирчеткеннер. Ол чылығ пілдірте кӱстіг предприятиедең пирілерінең палғалыстығ.
Чоохтирға кирек, 2,5 миллиард салковайға турчатхан СГК-ның килкім инвестиция проектін Россияның энергетика министерствозы паза ЖКХ реформазын иртірерге хабасчаң чыынды чуртасха кирерге полысханнар. Харатас городтаң Ағбандағы ТЭЦ-сар чылығ пирҷең 12 километр магистраль тартылған, город істінде чылығ пирҷең 30 километр трасса нааңылалған паза пӱдірілген. Соонаң пу магистраль полызиинаң Ағбан пилтірі аймааның ааллары хара тас котельнайлары тоғызынаң хыйа парарлар.
- Харатастың чуртағҷылары ізестіг паза чахсы полызығ аларлар. Тиксі алза, проекттің чуртасха кирілгені Хакас-Минсуғ ойымына теелісті хызырар, піс тынчатхан киині чахсыландырарға пастағы хаалағ полар, - чарытхан Валентин Коновалов. СГК эксперттерінің сананыстарынңа, киизер сығарылчатхан оолығ ниме-ноо сині чылда 5-6 тоннаа хызырылар.
- Котельнайларны чаап, піс киизер оолығ ниме-нооның сығарызын синдірчебіс, ӱзӱрлир кӧзідіглерні чахсыландырчабыс, пу ӧӧні, тізең, чылығ пирерін ізестіг читіріп, чуртағчыларның чуртас синін кӧдірчебіс, тилирге паза чурт пӱдірерге оңдай пирчебіс, - теен Россияның энергетика министрі Николай Шульгинов.
СГК ідӧк Ағбан городтың ӱстӱнзархы-кидеркі сариндағы алынҷа тураларны чылығ пирҷең ӧӧн системаа піріктірерінҷе проектті чуртасха кирче, пу тоғыстар ідӧк экологияны чахсыландырарына кӧстелген.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы