АТТАРҒА ХЫНЫС ЧИҢІСТЕРГЕ АҒЫЛЧА
24.11.2021
Статья
Спорт
Даша Кыштымоваа 13 час. Ол Ағбанның 24 № школазында 7 класста ӱгренче. Ідӧк хызыҷах тӧртінҷі чылы ат спортынаң айғасча. Дашаның чооғынаң, аттарға ол кічігдең хынча. Паба-іҷезін секцияа 6 частығдох пазындыр саларға сурынтыр, че аны спорт школазынзар, 9 час толғанда ла, алғаннар.
Алында атха мӱнмеен пала пір ай аразына чалаң чӧрерге ӱгреніп алған. Мында тренері Олеся Игоревна Мордвинованың хозымы улуғ. Пастағы туста хызыҷах тренировкаларға неделяда ікі-ӱс хати чӧрҷең. Амды ол позырахта ла тынанча. Чоохтирға кирек, ат спорты нинҷе-нинҷе кӧрімге чарылча. Республиканың чалаңнар школазында олимп спорт кӧрімнерін хайығда тутчалар. Олғаннар манежтегі алай сіліг чӧрісте, конкурда паза ӱс аймах кӧрімңе марығда кӱстерін сынапчалар. Манежтегі чӧрісте спортсменге атха мӱніп, аны килістіре чӧргізерге киректелче. Конкур аймах оңдайлығ полча, че мында ӧӧні - аңдарылҷаң хана азыра атығары. Ӱс аймах кӧрімҷе марығ сіліг чӧрістең, конкурдаң паза кросстаң пӱткен. Кросста аралазып, спортсменнерге, аттарының тінін тудып, оймахтар, суғлығ кооптар азыра атығарға килісче. Дашаның хынчатхан дисциплиналары конкур паза кросс полтыр, манежтегі чӧрісте ол сидіксінчеттір.
Хызыҷах марығларда 2018 чылдаң тӧреміл араласча. Андада ағаа 10 час полтыр. Кічіг спортсменнер понилерге мӱніп марығластырлар. Даша азах меетке ӱзінҷізі читкен. Пӱӱл саарбахтың чиңістерге пай чыл. Ол Показ адынаң хада «Часхы кубогы», Хакасияның первенствозында, Хакасияның кубогында чиңістер тутхан. Пастағы марығда Даша манежтегі чӧрісте кӱзін сынаан, первенствода - ӱс аймах кӧрімҷе марығда, Хакасияның кубогында - конкурда. Ағаа хоза, ол «Чиңіс кубогында», А.Б.Мальчевскийнің хумартхызына чарыдылған Хакасия первенствозында сыйыхтығ орыннарға сыххан.
Ідӧк 2021 чылда чир-суғҷыбыс манежтегі чӧрісте Сибирьдегі федеральнай округтың мариинда араласхан. Спортсменнер, пирілген схемаларға тудынып, аттарынаң хада упражнениелер толдырғаннар. Даша паза Показ ат, ӱс чӧрісте устарын кӧзідіп, ікі хати тӧртінҷізі полыбысханнар, пір хати - пизінҷізі. Ағбанда сентябрьда ирткен А.А.Магдалиннің хумартхызына чарыдылған тиксі Россия марығларында хызыҷахха оң полбаан. Кросста ады ханалар азыра сегірерге ынабиндыр. Дашаның чооғынаң, Показтың пырозы чоғыл. Ол хыйға ат. Алында чиит спортсмен, конкурда 70 сантиметрліг ханаларны азып алза, чидіге санаҷаң, Показнаң хада, тізең, 100 сантиметрліг ханаларны азыра сегірче.
Спортта Дашаа тренері Олеся Мордвинова кӧзідім полча. Спортсменнернең олимп чемпионы, конкурист Скотт Браш кӧңніне кірчеттір. Пазағы чылда хакас хызыҷах Сибирь синіндегі марығларда сыйыхтығ орыннарға сығарға пӧгінче.
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы