«САЯНЫ» КОМАНДАА КИРТІНЧЕБІС
26.11.2021
Хабарлар
Меспектіг хоккей. 23 ноябрьда Пӧзік лиганың командалары араз тиксі Россиядағы марығлар пасталыбысханнар
Марығның I чардығы 2022 чылның 28 февральына теере иртер. Анда 23 хоккей командазы кӱзін сынапча. Прай командаларны тӧрт ӧмее чарыбысханнар. Кибір хоостыра «Саяны» тӧртінҷі ӧмеде ойнапча. Хоккеисттерібіс пус чазызында «Енисей-2» (Хызылчар), «Сибсельмаш-2» (Новосибирск), «Байкал-Энергия-2» (Иркутск), «Кузбасс-2» (Кемеров), «СКА-Нефтяник-2» (Хабаровск) паза «Восток» (Арсеньев) командаларынаң тоғазарлар.
Пастағы матчтар 23-24 ноябрьда ирткеннер. Кемеровта «Енисей-2» паза «Кузбасс-2» ӧмелер удур-тӧдір ойнаан ползалар, Новосибирскте - «Саяны» паза «Сибсельмаш-2» командалар. Чоохтирға кирек, чайғызын «Саяныда» алызығлар пол парған. Ӧмедең алты кізі парыбысхан, оларның санында Евгений Ткачук, Тимофей Ващук, Дмитрий Бутаков, Андрей Осипенков. Ойнирға килгеннердең Роман Козулинні, Егор Егорычевті, Евгений Нероновты, Матвей Пантыкинні паза Иван Касаткинні таныхтирға кирек. Прайзы Суперлигада ойнаан спортсменнер. Халғанҷы хоккеистті бендиге хынчатхан улус таныпча полар. Иван Касаткин «Саяны» ӱчӱн турызарға маңнанған. Роман Козулин Ағбанзар Кировтаң кӧскен, Матвей Пантыкин - Новосибирсктең, Егор Егорычев - Иркутсктаң, Евгений Неронов - Сыктывкардаң.
Августта «Саяны» команда хабарҷыларға азых тренировка иртіргенде, устағ-пастағ опыттығ спортсменнер хоккей ӧмезін чиңістерге ағыларлар тіп ізенізінең ӱлескен. Че хайди пістің чонда тидірлер, ізенген тағда киик полбинча. Октябрьда «Саяны», Михайло Волковтың Кубогында аралазып, сигіс команданың аразында тӧртінҷі ле орынға сығып алған. Пу неделяда «Сибсельмаш-2» ӧменең ирткен матч пазох ӧріндірбеді, че аннаңар алғыда.
23 ноябрьда ойын пасталарға даа маңнанмаан, пістің Алексей Севрюков Александр Захваткиннің полызиинаң 17 секундада «ыырҷының» хаалхазынзар меспекті кире сабысхан. Пастағы чидіг хоккеисттернің кӧңнін кӧдірчетпес пе. Олар пуста уламох ӧткін хайын сыхханнар. Новосибирсктегілер «Саянының» хазыр ойынына алаң ас парғаннар тиирге чарир. Че «Сибсельмаш-2» команданың хаалха хадағҷызы Владимир Ковалев, пір меспекті иртірібізіп, паза чідірінмеен. Пастағы таймда ол пис хати меспекке чол туйухтаан. Аның кӱстенізін кӧріп, таң, «Сибсельмаш-2» атакаа пар сыххан. Салтарында тайм 1:2 саннаң тоозылған. Новосибирсктегілер алнында.
Тоғазығның ікінҷі чардығында сайбағлар кӧп полған. Чарғыҷылар хоккеисттерні ойыннаң сығарарға ла маңнанминчатханнар. Сайбағлар иткеннер санында опыттығ Роман Козулиннең Егор Егорычев. 59-ҷы минутада сан 1:3 пол парғаңда, «Саяны» тайм-аут алған. Че тренерлернің чӧптері Хакасияның командазына полыспааннар. 70-ҷы минутада пістің хаалхазар пазох меспек учух килген. «Саяны» 1: 4 саннаң утыр салған.
24 ноябрьда ікінҷі матч ирткен. Пастағы таймда пазох новосибирсктегілерге оң полған. 7-ҷі минутада «Саяныға» голны Иван Кондратьев кире сабысхан, 35-ҷі минутада - Никита Терёхин. Пістіңнер удурластырлар, че кӱстеністері тикке парған. Ікінҷі таймда хаалхалар чарым час хуруғ турғаннар. Че 76-ҷы минутада Евгений Неронов Константин Жадановтың полызиинаң «ыырҷының» хаалхазынзар меспекті кире сабысхан. Сан - 1:2. 83-ҷі минутада пазох гол. Анзы Михаил Селедковтың чидии. «Сибсельмаш-2» тайм-аут алып алған. Че салтарлар андағох халған. Ойын 2:2 саннаң тоозылған. Марығлар оңдайларынҷа чиңіс ӱчӱн командаа 3 сан пирілче, тиңни ойнабысса - 1 сан, утыр салза - 0 сан. «Сибсельмаш-2» хоккей ӧмезі матч тузында 4 сан чыып алған, «Саяны» - 1 сан.
27-28 ноябрьда «Саяны» Кемеровтағы «Кузбасс-2» ӧменең тоғазар. Ағбанда матчтар пазағы айда иртерлер. 6-7 декабрьда хоккеисттерібіс «СКА-Нефтяник-2» команданаң ойнирлар, 10-11 декабрьда - «Востокнаң», 18-19 декабрьда - «Кузбасс-2» ӧменең. 22-23 декабрьда пазох Новосибирскгегі «Сибсельмаш-2» команданаң тоғазар. Пастағы ойында «Саяны» позын турыстыра кӧзіт полбады. Че піс хоккеисттерібіске киртінчебіс. Сынап команданың ӱчӱн «ағырчатсаң», аннаң хада чиҷістерінең дее, хомзыныстарынаң даа ӱлезерге кирек.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы