АВТОМОБИЛЬЛЕР КӦДІРІМІН СЫНЫХТАҶАҢ ПАСТАҒЫ ПУНКТ
01.12.2021
Хабарлар
Чоллар. Чолларны хайраллап халар ӱчӱн, тиксі хазнаның чолларында аар таарлағ паза килкім транспортты сыныхтапчатхан пункттар турғызылчалар. Пу чағында пістің республикада аңдағ пастағы пункт тоғынып пастаан. Ол Ағбан - Ах тобырах чолның 11-12-ҷі километр кизегінде орныхча
ХАКАСИЯДА АВТОМОБИЛЬЛЕРНІҢ КӦДІРІМІН ПАЗА СИНІН СЫНЫХТАПЧАТХАН ПУНКТТЫ ТУРҒЫЗАРЫНАҢ «РОСТЕЛЕКОМ» ПАО ПОДРЯД ОРГАНИЗАЦИЯЗЫ АЙҒАСХАН. ЧОЛНЫҢ 300 МЕТР КИЗЕГІНДЕ, ИРГІ АСФАЛЬТ АЛЫЛЫП, САЙ УРЫЛҒАН ПАЗА НАА АСФАЛЬТ ТӦЗЕЛГЕН.
АСФАЛЬТТА ТРАНСПОРТТЫҢ КӦДІРІМІН СИНЕПЧЕТКЕН ДАТЧИКТЕР ТУРҒЫЗЫЛҒАННАР, ІДӦК ХААЛХА ОҢДАЙНАҢ ПӰДІРІГ ТУРҒЫЗЫЛҒАН, ХАЙЗЫНДА ТРАНСПОРТТЫҢ СИНІН, ЧӦРІЗІН СИНЕПЧЕТКЕН КАМЕРАЛАР ТОҒЫНЧАЛАР.
Хакасавтодорның директор орынӌызы Юрий Исаевтің чооғынаң, мындағ сыныхтағларны транспорт кӧдірімін сыныхтаӌаң приборлығ ГАЗель иртірче. Ағбан - Ах тобырах чолдағы пункт полызиинаң транспорт кӧдірімін хараа-кӱнӧрте сыныхтир оңдай пар. Ағаа хоза, пу чолның кизегінде иртчеткен прай транспорт сыныхталча паза сайбағдаңар искіріг табырах читірілче.
- Таарлағны тартарынча ӧнетін инструкция пар. Аны хоостыра чолларда хайдағ кӧдірімніг таарлағны тартарға чарадылчатханнаңар пазыл парған. Амғы туста полған на осьха 10 азыра тонна таарлағ килісчеткен автомобильлерге штраф салылча. Часхыда, тізең пір осьха 6 тоннаа теере таарлағ тартарға чарадылча. Ағбан - Ах тобырах чолда таарлағ транспорт кӧп чӧрче, аннаңар пу чолда мындағ пункт турғызарынаңар чарадығ алылған.
Андағох сыныхтағ пункты Ағбан - Саяногорск чолның 12-13 километр участогында пӱдірілче. Пу чолда транспорт ідӧк кӧп чӧрче нооза. Шира аймаанда ӱзінҷі пунктын пӱдірерінче сурығны кӧрчебіс. Амғы туста тиксі хазнада мындағ пункттар пӱдірілчелер, - теен Юрий Исаев.
Транспорт кӧдірімін сыныхтапчатхан пункттың пӱдіриине республика бюджедінең 61,5 миллион салковай позыдылған. Чолны тыхтирынаң «Прогресс-М» подряд организациязы айғасхан. Амды чол хастада сиденнирінӌе тоғыстар халған. Аны ӧӧн подрядчик «Ростелеком» ПАО чаллаан.
Кічіг хырлас айының 25-ӌі кӱнінең сығара пункт тест оңдайынаң тоғынып пастады. Сайбағдаңар искіріг таблода кӧзіділче. Юрий Исаевтің таниинаң, пу чағында пункт толдыразынаң тоғынып пастир.
Чолны тыхтапчатхан туста, автомобиль чӧрімі тохтадылбас ӱчӱн, ӱр нимеске кӧрілген чол пӱдірілген. Пункт толдыра кӱзінең тоғын сыхса, ибіркі чол чабыл парар, аннаңар пу пунктты хыйа иртер оңдай чох полар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы