ӰГРЕДІГЕ - ПІР МИЛЛИОН САЛКОВАЙ
01.12.2021
Хабарлар
Чиңіс. Уғаа ӧріністіг, хаӌан пістің чиит оол-хыстарыбыс Россия марығларында чиңіс тутчалар. Піс аңдағларны саблаңдырарға, олардаңар кӧп пазарға хаҷан даа тимдебіс
Ӱр ниместе ӧріністіг хабар читкен. Пістің чир-суғҷыбыс, Харатастағы механико-технология техникумының 4-чі курстағы студенті Максим Тугужеков, «Большая перемена» тиксі Россия мариинда аралазып, чиңіс тутхан. Дипломнаң пасха, ағаа ідӧк пір миллион салковайға сертификат читірілген! Максим ортын профессиональнай ӱгредіг организацияларын тоосчатхан студенттернің аразында марығласхан.
«Большая перемена» марығ «Ӱгредіг» национальнай проект хоостыра иртірілген. Пӱӱл пастағызын на анда ортын профессиональнай организацияларның студенттері араластылар. Харатастағы механико-технология техникумынаң марығда аралазардаңар 100 сурыныс пічии ызылған, Максим Тугужековнаң Лидия Абдинаға финалда аралазарға оң полған.
Максим «Монтаж, наладка и эксплуатация электрооборудования промышленных и гражданских зданий» специальностьча тӧртінчі курста ӱгренче. Хайди чоохтапча аның кураторы Наталья Борисенок, Максим - чайаачы оол. Ідӧк ол волонтерствонаң айғасча, арғыстарынаң хада олған тураларындағы, интернаттардағы, имнег учреждениелеріндегі олғаннарға пайрамнар, чайаачы марығлар, ӱтертістер иртірче. Ол палаларға уғаа паарсах. Тиктең нимес, неке, анкетирование ирткенде, Максимге чайаачы кӧстег килістіре пол парған. Аннаңар ол марығның «Твори» кӧстеен таллап алған. Марығның полуфиналы Москвада ирткен. Хакасиядаң андар 11 олған чӧрген. Анда олар аймах-пасха чахығлар, кейстер толдырғаннар. Финалға 600 студент сығып алған: 2-3 курстағы 300 студент паза 300 ортын профессиональнай ӱгредіг организациязын тоосчатханнар. Максим Тугужековтың 299 «ыырчы» полған тиирге чарир. Оларның 150 студенті чиңіс тутхан, полғанына ла пір миллион салковайға сертификат читірілген. Ідӧк чиңіс тутханнарға Россияның городтарынҷа поездтіг тикке чӧреріне путевка пирілген.
Сертификатча чииттерге специальнозы хоостыра аннаң андар ӱгренерге чарир алай ба пасха специальность аларға оңдай пар. Марығ соонаң Максим Тугужековтың ӱгредіге, чуртасха сағыс-кӧрізі алыс парған. Ол таңдағызынзар ізеніснең кӧрче, позының алнында улам улуғ пӧгіннер турғысча.
Автор :
Тимнеен Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы