РЕСПУБЛИКАДА ПАСТАҒЫ ЧОН ПИСАТЕЛЬІ!
17.12.2021
Хабарлар
Сыйыхтас. 15 декабрьда Хакасияның культура министерствозында 2021 чылда пайрамнығ чазын толдырған писательлерні чеестееннер
ПУ ТОҒАЗЫҒДА ИҢ ӦРЧІЛІГ ХАБАР ПОЛҒАН ПОЛАР, ХАҶАН ПРОЗАИК, КИБЕЛІСЧІ, ДРАМАТУРГ ПАЗА ХАКАС РЕСПУБЛИКА КУЛЬТУРАЗЫНЫҢ САБЛЫҒ ТОҒЫНҶЫЗЫ ГАЛИНА КАЗАЧИНОВАА ПАСТАҒЫ НОМЕРЛІГ «ЧОН ПИСАТЕЛЬІ» АТ ПИРГЕНІ. АЛЫНДА «ЧОН ПИСАТЕЛЬІ» ААРЛЫҒ АТТЫ ИҢ ТӰЗІМНІГ ТОҒЫНЧАТХАН ЧАЙААЧЫ УСХА ПИРЕРДЕҢЕР ЧООХТА ЛА ПОЛҒАН. АМДЫ ПУ СЫЙЫХТЫ ЧИТІРЕРІ ОРНЫНАҢ ТИБІРЕП ПАРДЫ!
Галина Григорьевна Казачинова пу кӱннерде тоғылах чазын толдырғанда, ағаа пай чайаачы тоғыстары ӱчӱн мындағ сыйых читірілген. Ағаа хоза Хакасияның Чайаачылар туразының абахай хыстары ағаа сіліг ӧңніг хакас кӧгенеен кизірткеннер.
Пӱӱл ідӧк пайрамнығ тӧреен кӱннерін таныхтааннар Хакасиядағы писательлер пірігізінің кнезі Альбина Курбижекова, «Алтынай» хакас ипчілер пірігізінің устағҷызы, Россияның саблығ артизі Татьяна Майнагашева, филология наукаларының докторы, литературовед Виктория Карамашева, прозаик Ольга Зелеева, публицист Олесь Грек. Оларға прайзына сыйыхтар пирілген.
Хакасияның культура министрі Светлана Окольникова Хакасия пазының 2021 чылдағы Н.Г.Доможаковтың адынаң сыйиин писатель Юрий Черчинскийге паза М.Р.Баиновтың адынаң сыйиин кибелісчі Юрий Ивановха читірген. Амғы чуғынҷах ағырығ тузында хай пірее писательлерні иблерінде паза тоғыс орыннарында аарлығ сыйыхтарнаң таныхтааннар.
Хакасияның Чайаачылар туразының тоғынҷылары халых-чарыдығлығ тоғыстарында ӧткін полысчатхан кізілерге «Лучший доброволец» медальға тӧӧй значоктар сыйлааннар. Олар кибелісчілер Юрий Иванов, Сибдей Том, хабарҷы Наталья Табакова паза ученай Наталья Таскаракова.
Пу орта кирек тіп сағынчам. Іди пос кӧңнінең тоғынчатхан кізілерні пірее оңдайнаң таныхтап турарға кирек. Улуғ стол кистінде чей ісчеткен туста культура министрі Светлана Окольникова чайаачы устарға мыннаң мындар тӱзімніг тоғынарға алғаан.
Автор :
Илья ТОПОЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы