ЧОННЫҢ ЧУРТАЗЫН ЧАХСЫЛАНДЫРЧАЛАР
17.12.2021
Хабарлар
Марығ салтары. Киҷее Хакасия пазының орынҷызы Ирина Войнова «Чылның иң чахсы социальнай проекті» марығның чиңісчілерін таныхтаан
Пу марығ тиксі хазнада 2015 чылдаң сығара хазнаның экономика тилізі министерствозы хабазиинаң Россияның хазна социальнай университеді иртірче. Ол иң чахсы социальнай практикаларны чуртасха кирчеткен идінҷектерні, кізілерні табарына кӧстелген, хайзылары чонның социальнай сидіксіністерін пӧгерге полысчалар.
«Чылның иң чахсы социальнай проекті» марығда кічіг паза ортын пос киреенең айғасчатханнар, социальнай кӧстегліг коммерческай нимес организациялар араласчалар. 2018 чылда марығда иң кӧп араласчы полған - 85 регионнаң 1055 проект.
2019 чылдаң сығара пістің республикада марығның регион чардығын Хакасияның экономика тилізі министерствозы паза республиканың тиліс фонды иртір сыхханнар. Марығ пастағызын на иртірілгенде, 25 сурыныс пічии кірген, пылтыр - 26.
2021 чылда марыға идінҷектердең паза организациялардаң 34 сурыныс пічии пирілген, ол санда кічіг паза ортын пос киреенің 26 проекті, оларның 17-зі социальнай идінҷектер реестрінең, 6 - коммерческай нимес организациялардаң, 2 - посха тоғыс таапчатханнардаң.
Пӱӱл «Чылның иң чахсы социальнай проекті» марығның регион чардығында 11 проект чиңісчі полыбысхан. «Хазии уйан кізілерге хабазар паза реабилитация киреенде иң чахсы социальнай проект» номинацияда «Ӱс пингвин» олғаннарның имнег кіні» социальнай проектке чиңіс пирілген. Аның устағҷызы Наталья Трапезниковаа проектті чуртасха киреріне 500 муң салковай грант пирілген. «Социальнай полызығлар пирерінде иң чахсы социальнай проект» номинацияда «Каблучок» ателье утып алған. Идінҷек Пётр Лукин ортопедическай ӧдіктер сығарарынаң айғасча. «Олғаннарға ӱгредіг пирер киреенде иң чахсы социальнай проект» номинацияда «Уникальный ребёнок» олғаннарның тилізінең айғасчатхан кін чиңісчі полыбысхан, культура паза ӱгредіг киреенде Саяногорсктағы ботаническай сад чиңіске турысхан, хазых чуртас оңдайын апарарында - «Рыбка» олғаннарны чӱзерге ӱгретчеткен кін, социальнай туризмде - «Инклюзия воды» проект, реабилитация иртер техника оңдайларын тимнирінде - хазии уйан кізілерге тренажёрлар сығарчатхан идінҷек Анатолий Тугунашев.
Сорығ город чуртағҷызы Любовь Янгулова марығ чиңісчілерінің санында. Аның проекті «Шапка рулит» чайаачы мастерскойы» адалча. Ол «Социальнай полызығ кирексіпчеткен кізілерге тоғыс пирері, оларны социальнай кирекке тартары» номинацияның чиңісчізі полыбысхан. Идінҷек кинек кізілерні пӧріктер палғирға ӱгретче, анаң оларны сатча. Іди тоғыс чох, хазии уйан чуртағҷыларға парыстанып аларға полысча.
Чиңісчілер санында коммерческай нимес ӱс организация полған: Ағбандағы «Кристалл» полызығлығ фонд, Саяногорсктағы «Оптима» социальнай служба, Социальнай бизнеске паза коммерческай нимес организацияларға тиксі хабасчаң кін.
Хакасия пазының орынҷызы Ирина Войнова социальнай проект марииның региондағы чардығының чиңісчілерін алғыстаан:
- Социальнай пос кирее - ол бизнес тее нимес, ол танығлығ социальнай пӧгін. Аннаңар сірерге пу тоғыс ӱчӱн улуғ алғыс. Тиксі Россия марии 2015 чылдаң иртірілче. 2019 чылдаң сығара регионнарға социальнай бизнеснең айғасчатхан идінҷектерні таныхтирына федеральнай бюджеттең субсидиялар позыдылча.
2021 чылда пістің республикаа пу пӧгінге федеральнай бюджеттең 19 миллион салковай пирілген. Пӱӱл Хакасиядағы 56 социальнай идінчектің 44-і экономика тилізі министерствозынаң гранттар алып алған. Гранттар ӱлиріне ахча федеральнай бюджеттең позыдылған. 2022 - 2024 чылларға социальнай пос киреене хабазарына федеральнай бюджеттең ахча пирілерӧк.
Ирина Войнова чиңісчі-идінҷектерге дипломнар паза сыйыхтар читірген.
Хакасияның Халыхтар палатазының кнезі Ольга Левченко, социальнай проект марииның чиңісчілеріне алғызын читіріп, таныхтаан:
- Сірер пістің республикаа паза чуртағчыларның чурғас оңдайларын чахсыландырарына улуғ хозым итчезер. Аннаңар Халыхтар палатазының прай кізілері адынаң сірерні чиңіснең чылығ алғыстапчам. Сірернең хада-пірге тоғынарға хаҷан даа тимдебіс. Хазииңар пик ползын паза паарсах киректер чайирына кӧңніңер хаҷан даа чітпезін.
«Оптима» социальнай служба «Паарсах пастағ» проекті ӱчӱн таныхтатхан. Аның директоры Марина Баклажанская пу проект чуртасха хайди кирілчеткеннеңер чоохтап пирген:
- «Паарсах пастағ» проектте аралазарға кӧңніліг илееде кізі полған. Піске «кӱмӱс» волонтёрлар чахсы полыс пиргеннер. Піс хазии уйан палаларға аймах мастер-класстар иртіргебіс. Олғаннар пос холынаң имбирь пряниктерін, капкейктер паза пасха даа тадылығ чиистер тимнееннер. Мастер-класстар Саяногорсктағы «Милосердие» кинектер пірігізінің паза «Альянс» кинопарктың тураларында иртірілгеннер. Проектте 100 азыра пала араласхан. Пістің службаның специализі Татьяна Травина мастер-класстарны хынып иртірче. Ачырғасха, пандемия полып, оларны иртірчең тус чылдырыл парған.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы