ПІР САҒЫСТЫҒЛАРНЫҢ КӰЗІ УЛУҒ
17.12.2021
Хабарлар
Семинар-тренинг. Москвадағы «Институт развития гражданских инициатив» автономнай коммерческай нимес пірігіс Хакасиядағы студенттерге, НКО-лар паза муниципальнай служба кізілеріне аймах проекттер тимнирінҷе семинар-тренинг иртірген
Ағбанда Н.Г.Доможаковтың адынаң национальнай библиотека-да ирткен семинар-тренинг «Сила сообществ» адалған. Аны «Институт развития гражданских инициатив» АНО-ның ӧӧн директоры Елена Григорьева позы апарған.
- Улуғ алғыс Хакасияның устағ-пастаана пісті полған на сай піди чахсы удурлапчатхан ӱчӱн. Піс пеер пастағызын на килбеебіс нооза. Уламох улуғ алғыс Хакасияның культура министрі Светлана Окольниковаа. Ана аның хабазиинаң піске мында теестегі семинар-тренинг иртірерге оңдай пирілді, - чооғын пастаан Елена Валентиновна.
Таныхтирға кирек, пу проект «Православная инициатива-2021» чоннар аразындағы марығның чиңісчізі полча. Аны хайдағ регионда иртірерін тӧстегҷілер постары таллап алар оңдайлығ полғаннар. Че Хакасияның Россия Федерациязы Чӧбіндегі кізізі Александр Жуковтың хабазиинаң олар Хакас чирін таллап алғаннар.
Москвадаң килген специалисттер семинарға чыылысханнарға хазнаның, республиканың халых чуртазында араласчатхан пірігістернің тузазынаңар, пір сағыстығларның улуғ кӱзінеңер чоох апарғаннар. Ідӧк олар, амғы тустағы технологияларнаң тузаланып, социальнай проекттер тимнир опыттарынаң ӱлескеннер. Анаң араласчыларға практика оңдайынаң постарына пірее проект тимнебізерге киректелген. Аймах-пасха темалар пирілген.
Пістіңнернің, тізең, пӱӱнгі кӱнде иң сағыссырастығ сурии чир-чайаан полча. Аннаңар олар семинар-тренингте аннаңох палғалыстығ проекттер чуртасха кирер сағыстарын читіргеннер. Кӧзідімге, Харатастағы халыхчылар городта пабаларға ӧнетін чир кӧр саларға чӧп пиргеннер. Анда олар, тӧреен палаларына чарыдып, ағастар одырт турарҷыхтар. Опыттығ эксперттернің таниинаң, андағ практика чуртасха сынап киріл парза, пір саңай нинҷе-нинҷе пӧгін толдырыл турар - город чир-чайааны чахсылан парар, чон саны ӧзер, тӧллернің кибірлерге тудынар пілінізі ӧзер...
Елена Григорьеваның таниинаң, пір сағыстығларның пірігістері хабазиинаң кӧп чахсы паза тузалығ кирек чуртасха кирерге чарир. Че оларға регион устағ-пастаанаң хабазығ хайди даа поларға кирек. Хакас чон хада хапхан тӧге ниик поладыр тіпче.
- Хакасиядағыларның ідӧк чапсых сағыстар уғаа кӧп. Анзын піс пу семинар-тренингте чахсы кӧрдібіс. Сағынчабыс, оларның пос кӧңнінең тӧстелген проекттерін федеральнай синге дее сығарарға чарир, - теен ол.
Семинар программазы хоостыра хазнабыстың ӧӧн городынаң килген специалисттер ідӧк Таштып аймаандағы Мадыр аалзар чӧр килгеннер. Ол чорыхтың пӧгіні Хакас чиріндегі ас саннығ чоннарның чуртазына, кибірлеріне чарыдылған проект тимнирі полған. Олар анда, ӧӧнінде, православнай киртіністіг орыс чоннаң тоғазығлар иртіргеннер, кибірлерінең, ойыннарынаң танысханнар. Паза аарластығ аалңылар Мадырдағы тигірибде полғаннар, ӧнетін хығыртылған абыстар пастағы хакас абыс Иоанн Штыгашевтеңер лекция хығыр пиргеннер.
Ӱс кӱн ирткен мероприятие тоозылғанда, Хакасияның культура министрі Светлана Окольникова Москвадағы коммерческай нимес пірігістің ӧӧн директоры Елена Григорьеваа алғыстас пічиин читірген. «Мындағ хада-пірге тоғызыбыс мыннаң мындар андағох тӱзімніг полар тіп сағынчам», - теен ол.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы