ООЙ НИМЕС ТУСТА ПОС КИРЕЕН ТИЛІТЧЕЛЕР
22.12.2021
Хабарлар
Пос кирее. Улуғ хырлас айының 20-ҷі кӱнінде «Россияның иң чахсы 100 товары» паза «Хакасияның идінҷегі-2021» марығларның чиңісчілерін таныхтааннар
В.Г.ЧАПТЫКОВТЫҢ АДЫНАҢ ХАКАС РЕСПУБЛИКАНЫҢ ФИЛАРМОНИЯЗЫНДА МАРЫҒ ЧИҢІСЧІЛЕРІНЕ КОНЦЕРТ ТУРҒЫЗЫЛҒАН. АНДА ПІСТІҢ РЕСПУБЛИКАНЫҢ ИҢ МАҢНАНЫСТЫҒ ПАЗА ӦТКІН ИДІНҶЕКТЕРІ ЧЫЫЛЫС ПАРҒАННАР. Хакасияның идінҷектері нандырығлығ тоғыстарынаң кӱстеністерінең регионның экономика тилізіне улуғ хозым итчелер. Регионда сығарылчатхан ниме-нооның 20% кічіг паза ортын бизнеске килісче.
Тоғынчатхан кізілернің тӧртінҷі чардығы пос киреенде істенче. Ағаа хоза посха тоғыс таапчатханнарның саны ӧсче. Анзы кізілер, айғасчатхан киректерін санға турғыс салып, хазна алнында нандырығ апарарға тимде полчатханын кӧзітче.
Аарлығ идінҷектер, ӧткін тудынчатханнарың ӱчӱн сірерге алғызым читірчем. Республикаа, хазнаа, тиксі тилекейге мындағ аар туста сірер пос киреен тилідерге кӱстенчезер. Пӱӱнгі кӱнге пик ле хылыхтығ кізілер хайдағ даа сидіксіністең сығып алар оңдайлар таапчалар. Тиліске наа оңдайлар хаҷан даа пар полча. Сірерге кӱс паза сӧбіреңернің хабазиин алғапчам. Пос киреен тилідеріне сӧбіреңернің полызии хайди даа кирек. Киректерің ӧңнензін! Хазых паза талааннығ полыңар! - алғыстаан идінӌектерні республика пазы Валентин Коновалов.
Амғы туста Хакасияның идінҷектеріне аймах хазна хабазии кӧріл парған. Пос киреенең айғасчатханнарға льготалығ кредиттер пирілчелер, «Минің пос киреем» кін паза Хакасияның тиліс фонды тоғынчалар. Ағаа хоза, пылтыр идінҷектерге налог сині ікі хати хызырыл парған. Валентин Коноваловтың чооғынаң, пӱӱл кічіг паза ортын пос киреене хабазарына республика бюджедінең 131 миллион салковай позыдылған, 2024 чылға теере пу кӧстеге 650 миллионҷа салковай кӧріл парған.
Валентин Коновалов «Россияның иң чахсы 100 товары» марығның алынҷа сыйиин - «За достижение в области качества» аарлығ танығны - «Хакасияның бентониді», «Алгоритм» ООО-ларға паза идінҷек Татьяна Пудоваа читірген. Саяногорск город пазы Михаил Валовха паза Ағбан пилтірі аймаа пазы Елена Егороваа кічіг паза ортын пос киреене кӧп хозым иткеннері ӱчӱн Хакасия пазының алғыстас пічіктері читірілген.
Республика пазының орынҷызы Ирина Войнова идінҷектерні алғыстирға килген.
- Пістің прай чуртазыбыс бизнеснең палғалыстығ. Хакасия правительствозы пос киреене хабазарға кӱстенче. Пандемия пасталғанда, федеральнай бюджеттең хоза хабазығлар пиріліп пасталған.
Пӱӱл пастағызын на «Хакасияның идінҷегі-2021» марығны иртірерін чарадыға алғабыс. Пӱӱн пістің спонсорларыбыс финалисттерні таныхтирлар паза чиңісчілерге сыйыхтар читірерлер. Сірерні алғыстапчам! - теен Ирина Ивановна.
Анаң ол «Россияның иң чахсы 100 товары» марығның лауреаттарына дипломнар читірген. «Ас-тамах» номинацияда «Саянмолоко», «Вдоволь», «Елисей» ООО-лар таныхтатханнар, «Чонға промышленность товары» номинацияда - «Хакасияның бентониді» ООО, «Чон паза хоос чайаачызы» номинацияда - идінҷек Татьяна Пудова, «Чонға полызығлар пирері» номинацияда - «Восточный полигон Логистика» ООО.
Хакасияның экономика тилізі министрі Виктор Богушевич, идінҷектерге наа паза чахсы проекттерні чуртасха кирерге маңнаныс алғаан паза «Россияның иң чахсы 100 товары» марығның регион чардығының чиңісчілерін таныхтаан. Оларның санында «Ас-тамах» номинацияда талған сығарчатхан идінҷек Павел Боргояков паза ит консервалары сығарызынаң айғасчатхан Константин Аёшин полғаннар. Ол ідӧк «Турист сувенирі» тиксі Россия кӧзідіг мариинда 1-ғы орынны утып алған. «Чонға полызығлар пирері» номинацияда идінҷек Елена Бурнакова чиңісчілер санында. Ол марыға хакас ас-тамаан сығарған. Елена Бурнакова пу марығда чыл сай араласча паза удаа чиңісчі полыбысча.
Идінҷек полуфабрикаттар, халас сығарызынаң паза чонны азырирынаң айғасча.
«Хакасияның идінҷегі-2021» марығ 7 номинацияҷа ирткен. Чиңісчілерге спонсорлар сыйыхха 100-ер муң салковай читіргеннер. «Чыл стартабы» номинацияда пір чылдаң асхынах тоғын салған идінҷектер араласханнар. Рекламанаң айғасчатхан идінҷек Наталья Королёва 1-ғы орынға турысхан. «Чыл тилізі» номинацияда 1-ғы орын идінҷек Михаил Захаровха пирілген, «Паарсах кирек» номинацияда - Александр Ивашкинге, «Тӧлдең тӧлге парчатхан бизнес» номинацияда - «Хакасияның чейлері» ООО-ға. «Пір хаалаға алнында» номинацияда 1-ғы орынға «Людвиг-Инвест» ООО турысхан, 2-ҷі орынға - «Бизнес-отель Саяногорск» ООО, 3-ҷі орынға - идінҷек Константин Аёшин. «Посха тоғыс таапчатхан» номинацияда 1 -ғы орын Юлия Кууларға пирілген, «Городтағы нимес бизнес» номинацияда - Тойымдағы паза Расцветтегі аал чӧптеріне.
Пу марығда аралазарына 84 сурыныс пічии кірген. Араласчылар аразында идінҷектер, предприятиелер, посха тоғыс таапчатханнар паза аал чӧптері полғаннар. 21 араласчы финалға сығып алған. Марығ спонсорлар ахчазына иртірілген.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы