ХООСЧЫ ХЫЗЫҶАХ
22.12.2021
Статья
Орджоникидзе аймаандағы Копьев аалда 12 частығ чайаачы хызыӌах Алёна Ермилова чуртапча. Пӱӱнгі кӱнде ол 6-ӌы класста ӱгренче. Алёнаӌах ӱзінӌі чылы «Тилекей паза кізі» студиязар хоостирға чӧрче. Ӧӧнінде ол Хакасияның чир-чайаанын, кӧллерін паза ағын суғларын, хыри-пазы чох тағларын, арам тоғасчатхан аң-хустарны, аймах чахайахтарны паза артастарны хоостирға хынча. Ағаа хоза хызыӌах футбол ойнирға паза музыканаң айғазарға хынча. Ол Копьевтағы искусство школазында фортепиано клазында 5 чыл ӱгренген.
Пос туста Алёна хоостапча паза кинделер хығырча. Школада саңай тӧрт-писке ӱгренче. Алёнаның пабазы Николай Сергеевич Копьевтағы искусство школазында олғаннарны паза чииттерні гитаранаң паза баяннаң ойнирға ӱгретче. Іӌезі Оксана Александровна (хыс фамилиязы Саражакова) олох школада олғаннарны театр искусствозына ӱгретче.
Чайаачы хылии-оңдайынаң іӌе-пабазына кӧктеен хызыӌах школаның, аалның паза аймахтың халых чуртазында ӧткін араласча. Позына тӧӧй хыйғаӌах палаларнаң хада «Беркут» чайғы лагерьінде тынанған. Алёна чыл сай математика, орыс тілі, биология паза тархын предметтерӌе олимпиадаларда араласча, сыбыра чиңісчі полыбысча. Ідӧк Орджоникидзе аймаандағы паза республикадағы чайаачы марығларда сыйыхтығ орыннарға удаа турысча.
Алёна, ӧс парза, Копьёвтағы искусство школазында олғаннарны гитаранаң ойнирға ӱгредерге сағынча. Ізенчебіс, чайаачы хызыӌахтың хынған сағызы хайди даа толар.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы