Валентин Коновалов: "Чылны чахсы салтарларнаң тоосчабыс"
27.12.2021
Хабарлар
Хакасияның пазы Валентин Коновалов орындағы пос устанысты тилiдерiнӌе чöптiң пу чылдағы халғанӌы чыылиин иртiрген.
- Кiзi хайда даа чуртаза, ол турыстығ чуртирға сағынча, - таныхтаан республика пазы, чыылығны азып. - Аалдағыларның чуртазын чахсыландырар ӱчӱн прай ӱлгӱ системазы пiрге тоғынарға кирек.
Орындағы пос устаныс органнары, тiзең, пу тоғыста иң алнындағы хырығда полчалар. Чуртағӌыларнаң иң чағын олар тоғынчалар. Хакасияның пазы пу чыл танығлығ полғанынаңар искiрген. Республика ӱлгӱлерi орындағы пос устаныс органнарын искеннер паза оларға удур парғаннар. Iди муниципальнай пӱдiстерге алымнарын чабарға ахчалығ полызығ пирiлген.
Валентин Коновалов орындағы пос устанысты тилiдерiнӌе чöптiң тоғызына чахсы паалағ пирген.
- Сiрерге прайзыңарға алғызым читiрчем, - теен Хакасия пазы. - Пiс пу чылны чахсы салтарларнаң тоосчабыстар.
Мының соонаң чыылығның тоғызы пасталған. Салтарлығ чыылығда аймах сурығлар ӱзӱрiлген, норматив-право акттарын законға килiстiре тӱптестiрерiнең, социальнай контракттарға хайығ саларынаң пасти хакас тiлiнең палғалыстығ сидiк киректi чахсыландырарына теере.
Халғанӌы, хакас тiлiн хайраллирынаң паза тилiдерiнең палғалыстығ, сурығӌа Хакасияның ӱгредiг паза наука министрiнiң орынӌызы Юрий Сагалаков чоох тутхан. Аның таниинаң, халғанӌы чылларда школаларда хакас тiлiн ӱгренерiнӌе кирек чахсылан сыххан. Че школа алнындағы ӱгредiг сферазында пу кирек уйан парчаттыр. Прай ла нимес олған садтарында хакас группалар пар. Ööн сидiксiнiс - хакас тiлiне ӱгретчең специалисттер чидiспинчеткенi. Мындағ сидiксiнiске ööнiнде алтынзархы аймахтар (Орджоникидзе паза Шира аймахтары) урунчаттырлар.
Валентин Коновалов хакас тiлiн хайраллир паза тилiдер ӱчӱн республикада пӱӱл алынӌа программа алылғанын таныхтаан.
- Пiс ағаа ахча кöр салғабыс, - теен Хакасия устағӌызы. - Пасха сурығ хайди пу кöстегӌе тоғыс апарылары.
Чыылығның тоғызы сыйыхтаснаң тоозылған. Алынӌа кöстеглерӌе иң чахсы тоғыныбысхан муниципальнай пӱдiстерге Аарластығ пiчiктер читiрiлген.
Автор :
Альберт Толмашов
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы