Республика чуртағӌыларына - хазна сыйыхтары
28.12.2021
Хабарлар
Улуғ хырлас айының 27-ӌi кӱнiнде Хакасия пазы Валентин Коновалов республика тилiзiне улуғ хозым иткен чуртағӌыларға Россия Федерациязының паза Хакасияның хазна сыйыхтарын читiрген.
- Иң пастап тоғыстарың ӱчӱн алғызым читiрчем. Ол тузалығ паза пiстiң республикаа тилiс ағылча. Пу сыйыхтар сiрернiң профессиональнай чидiглерiң кöзiтчелер, - таныхтаан республика пазы Валентин Коновалов.
Коронавирус чуғынӌах ағырығдаң тоғыр кӱрезерiнде улуғ хозым иткен ӱчӱн Сорығдағы имнег туразының ööн имӌiзiнiң орынӌызы Наталья Лихторовичке Лука Крымскийнiң медальы читiрiлген. Республиканың клиническай онкология диспансерiнiң хирургия пöлиинiң устағӌызы Геннадий Стрижаковха "Россия Федерациязының аарластығ имӌiзi" ат пирiлген. Н.Ф.Катановтың адынаң Хакас хазна университедiнiң ректоры Татьяна Красноваа Россия президентi Владимир Путиннiң Аарластығ пiчии читiрiлген. "Хакасгражданстрой"
ООО-ның директоры Олег Манжулаға "За заслуги перед Хакасией" орден пирiлген. Хакасияның культура тилiзiне улуғ хозым иткен паза кöп чыл тӱзiмнiг тоғынған ӱчӱн саблығ хакас писатель Галина Казачиноваа (Кужаковаа) "Хакас Республиканың чон писательi" ат пирiлген. Россияның социальнай страхование фондының Хакасияӌа пöлиинiң устағӌызы Елена Шерманға "Хакасияның iстенiс сабланызы" медаль читiрiлген.
11 кiзi Хакас Республиканың Аарластығ пiчиин алған. Оларның санында полғаннар: Асхыс аймаандағы "Россияның ДОСААФ-ы" организацияның кнезi Владимир Тохтобин, Асхыс аймаа устағ-пастааның муниципальнай ис-пайы устирынӌа комитеттiң кнезi Эльвира Топоева, "Хакасский" заповедниктiң директор орынӌызы Ирина Санникова, "Хакас Республиканың информатизация паза наа технологиялар кiнi" хазна автоном учреждениезiнiң дворнигi Николай Кочелоров.
Автор :
Оксана Челтыгмашева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы