Смирновкада – наа ФАП
28.12.2021
Хабарлар
Алтай аймааның Смирновка аалның чуртағҷыларына Наа чылға удур чахсы сыйых идiлдi – «Хазых хайраллирын нааҷылиры» федеральнай программаҷа аалда модульлығ ФАП тимге сығарылған. Пӱӱн ФАП тоғынып пастабысхан. Пастағы тоғыс кӱнiнде ФАП-та Хакасияның хазых хайраллаҷаң министрiнiң орынҷызы Елена Андрейчинкова, Алтай аймаа пазы Татьяна Раменская, Хубачардағы ӧӧн имнег туразының ӧӧн имҷiзi Евдокия Чебочакова паза Хызыл чазы аал чӧбi пазы Олег Султреков пол килгеннер. Оларны ФАП устағҷызы Алефтина Боргоякова удурлаан.
Хакасияда модульлығ ФАП-тар пастағы ла чыл турғызылбинча. Наа оңдайлығ пӱдiрiг позын чахсы кӧзiткен: чарытхы паза чылығ пирерi, суғ сығарары прай иптел парған, аннаңар аалдағы имнег туразына iкi тоғыс орны читкiҷе. Фельдшер кiчiг-улуғ частығ чуртағҷыларға пастағы имнег полызиин читiрче. ФАП туразын арығ тудары уборщиктiң холында. Наа тураның пастағы чардығында оох-теек пӧлiктер паза аптека пункты орныхча, iкiнҷi чардығында – прием апарҷаң пӧлiк, алынҷа прививкалар паза процедуралар пӧлiктерi.
– Смирновка аал чуртағҷыларының имнег полызиин турыстыра орында алар оңдай тӧстелгенi ӱчӱн ӧрiнчем, - кӧңнiнең ӱлескен Татьяна Раменская. – Наа тирiглер алылған паза турғызылған. Тиксi алза, федеральнай бюджеттең ФАП туразына 6 миллион 820 муң салковай хорадылған, республика бюджедiнең ибiркi чирнi иптирiне 592 муң салковай позыдылған, тирiглер аларына – 2 миллион азыра.
Сынап таа стетоскоп, тонометр, термометр тирiглерiнең пасти прай ниме наа алылған. ФАП устағҷызы Алефтина Боргоякова Смирновкадағы ФАП-та 1986 чылдаң сығара тоғын парир. 35 чыл аразына ол иргi ле тураларда тоғынған. Пу чыллар аразына пастағызын на ФАП-ха наа тура пӱдiрiлдi.
- Наа турада уғаа истiг паза чылығ. Алындағы ФАП иргi школа туразында орныххан. Халғанҷы туста аны чылыдып таа аларға сидiк полған. Аалда 149 чуртағҷы саналча, оларның 34-i палалар, 36-зы – 60 час алтабысхан чуртағҷылар, - чарытча Алефтина Георгиевна. – Аалда чииттер халчатханы мыннаң мындар чуртағҷылар саны синмезiне iзенiс пирче.
Андағ оңдайнаң, Смирновкада наа ФАП тимге сығарылғанда, Культура туразын на иптебiзерге халған тiп ӱлесче Татьяна Раменская. Ӏдӧк аалда пасталығ школа, олған сады пар.
Евдокия Чебочакованың таниинаң, Алтай аймаанда килчеткен чылда паза пiр мындағ ФАП турғызылар. Лукьяновка чуртағҷыларына талаан полар. Пӱӱл, тiзең, имнег амбулаторияларына iдӧк хайығ салылған. Кӧк хайадағы паза Аршаннардағы аалларда имнег амбулаториялары тиксi тыхталғаннар.
Автор :
Наталья Субракова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы