НАА ЧЫЛ АЗЫНАДА ПАЗЫНЫС
29.12.2021
Хабарлар
Аарлығ хығырығҷылар!
Наа чылға ханҷа-да ла кӱн халды.
Прайзы даа, килер чылға чахсы сағыстарнаң тимненіп, маң чохха тӱсче полар. Аннаңар піс сірерзер айланчабыс - ундубаңар «Хакас чирі» чалғыс хакас газетабысха пазын саларға. Ундут салзаңар, наа чылда почтальон даа килбес алай килер, че «Хакас чирін» ағылбас.
Сағынчабыс, туған-чағыннарға газетаа пазыныс Наа чылға чахсы сыйых поларӌых. Таныхтирға кирек, газетабысты чыл ибіре почта пӧліктерінде (индекс ПН447), почтальоннарда, редакцияда (17 каб., тел.: 22-27-49) алай Ағбан город істінде тоғыс орнында аларға паза пістің 2 аймахтағы корреспонденттерібіс пастыра Асхыс (Ан-тон Чертыков, тел.: 8-923-392-60-03) паза Таштып (Тарина Бутонаева, тел.: 8-913-059-24-07) аймахтар кіннеріндегі алынӌа учреждениелерде ниик паанаң пазынарға чарир. Хакас чирінең тастыхти чуртапчатханнарға интернет пастыра газетабыстың электроннай кӧріміне пазынарға чарир (кӧр газетабыстың сайтын).
Полған на пазынған кізі, газетабыстың тилізіне, тілібісті паза тиксі кибірлерібісті хайраллап, чонға тарадарына позының улуғ хозымын итче. Піс хаӌан даа ӧрінчебіс редакцияның аалӌыларына, хайзылары аймах сурығларнаң паза чӧптернең ӱлезерге кірчелер. Ідӧк піс хаӌан даа тимдебіс аймахтарӌа тоғазығларға чӧрерге.
Килер чыл газетабыс 95 чылын таныхтир. Газетабыс республикада иң улуғ частығ паза пай тархыннығ полчатханына піс поғдархапчабыс. Ізенчебіс, пайрамнығ чылда хада поларбыстар паза сірер газетабыстың ӧнетін рубрикаларында ӧткін аралазарзар. Прай пу ас нимес ирткен тус газетабыс хығырығӌыларының сылтаанда чур-тапча. Ол ам даа чалғыс газета, хайзында чо-ныбыстың аймах сурығларына, тархыныбысха, тілібіске, кибірлерібіске паза тиксі пос оңдайлығ культурабысха, ідӧк хакас чонның алынӌа матырларына улуғ хайығ салылча. Пасха СМИ-ларнаң пірее искіріглерібіс, хабарларыбыс тӧӧй дее полза, пір республикадазыбыс нооза, оларның пірдеезінде чоныбысха ол син хайығ салылбинча. Таныхтирға ки-рек, амғы туста хакас тілінең печатнай тоғыс асхынах паза уғаа ас саннығ сыхча. Аннаңар тілібісті, кибірлерібісті, тиксі омабысты хайраллирына паза тилідеріне газетабыстың хозымы улуғ. Че аның кӱзі, чоныбыстың ӱні пазын-чатхан хығырығӌылар санынаң кӧні палғалыстығ. Сірер пос газетазына па-зынзаңар, пос тілінең, хығырып, чоохтассаңар, тілібіс тее чітпес. Тилекейдегі тіл істезіглері пу сағысты чахсы киречілепчелер - тіл чітпинче паза тиліпче, хаӌан ол тілнең печатнай тоғыстар сығарылча паза чонның кӧбізі пос тілінең хығырча паза чоохтанарға кӱстенче. Пу сын танығны пір дее ундубаңар паза чалғыс газетабысха пазыныңар, аарлығ чир-суғӌылар!
Пайрамнығ чылда «Хакас чиріне» - 95 чыл», «Піснең чазыттар» ан-наң даа пасха рубрикалар сығарарбыс паза улуғларға, олғаннарға кӧстег-ліг марығлар иртірербіс. 95 чыл ол олаңай ла газетабыстың чыынды-зы (подшивкалары) нимес, ол чир-суубыстың тархыны, тиксі чуртас ти-лізі, чоныбыстың иреезі паза ӧрінізі, кӧп кізінің газетаа пирін салған чуртас чолы... Сағысха кирӌең, тіл алысчаң аймах темалар кӧп полар. Газетабыстың олғаннарға, чииттерге, чайаачыларға кӧстегліг страницалары ідӧк сых турарлар.
Аарлығ чир-суғҷылар!
Арығ чӱреебіснең алғыстапчабыс чағдапчатхан Наа чылнаң!
Килчеткен чыл наа пӧгіннер, наа сағыстар паза часкалығ хоных ағылзын. Чуртастағы чидіглерің уламох пӧзік ползын, сағынчатхан сағыстарың прай толзын. Хазииңар пик ползын! Ырыстығ, часкалығ, парыстығ полыңар!
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы