Орғаннар саны хызырылча
30.12.2021
Хабарлар
Хакасияда халғанӌы суткада коронавируснаң хоза 88 кiзi ағырыбысхан, 48 кiзi имнег тураларынзар чатырылған, ағырығдаң 10 кiзi ӱреен. 1308 кiзi ибде имненче. Ағырчатханнарнаң пiр чирде полған 2444 чуртағӌы имӌiлер хайиинда тудылча.
Коронавируснаң ағырчатханнарны имнирiне пӱӱн республикада 909 орын пар, 398-i (44%) пос турча. Кислородтығ 717 орғанның 398-i (56%) хуруғ турча. Суткада кислород ортымахти 4 тонна хорадылча. ИВЛ-да - 48 кiзi.
Хакасияның хазых хайраллаӌаң министерствозының танығларынаң, республиканың имнег туразында "ковид" орғаннар саны 50 % хызырылча, 130 орын артызылар. "Ковид" пöлiктерi республиканың теер-чуғынӌах ағырығлары паза Хубачардағы имнег тураларында чабылар. Наа чыл ӱлӱкӱннерiне пос турчатхан орғаннар саны 20 % артызылар.
Коронавирустаң тоғыр вакцинаның 1-ғы дозазы тиксi 258340 кiзее турғызылған, 2-ӌi - 190571 кiзее. Регионда пу вакцинацияӌа план 68,1 % толдырылған.
Пу кӱнге грипптең прививка олғаннарның 81,4 %-iне, улуғларның 64,4 %-iне, тойлығ ипчiлернiң 100 %-iне турғызылған. Киӌее федеральнай оперштаб чыылиинда Хакасия грипптең тоғыр вакцинацияӌа иң чахсыларның санында адалтыр.
Хакасияның ööн имӌiзi искiрген, наа чылда iстенiс öмелерiнде грипптең тоғыр прививканы тоғыр тоғынӌыларның 70 %- iне турғызыларға киректелер. Прививканы турғыстырбаан кiзi тоғыстаң хыйа даа идiлер. Пу прививканы хазна служащайларына хайди даа турғыстырарға кирек полар.
Вакцинация пункттары Наа чыл ӱлӱкӱннерiнде 1, 2 паза 7 январьда ла тоғынмастар.
Автор :
Инора Боргоякова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы