Пландағы имнег айландырылча
06.01.2022
Хабарлар
Республикада коронавирус чуғынӌах ағырығ тарапчатханынаң тоғыр кӱрезерiнӌе штабтың пӱӱл пастағы чыылии ирткен.
Халғанӌы суткадағы танығлардаң, республикада коронавирус чуғынӌах ағырығнаң 28 кiзi ағырыбысхан. Хазыхтанып алғаннарның саны 84 кiзее тиңнелче. Имӌiлер хайиинда 1666 кiзi, олар ағырчатхан кiзiнең палғалыста полғаннар. Ибде наа чуғынӌах ағырығдаң имненчеткеннернiң саны 1004 кiзi. Стационарларда имненче 395 пациент, 8 кiзi ИВЛ-да. Чыл пасталғанынаң коронавирус диагнозтығ 47 республика чуртағӌызы ӱреен, халғанӌы суткада - 4 кiзi.
Пӱӱнгi кӱнде республикада коронавирустаң тоғыр вакцинаның пастағы чардығын 259279 чуртағӌызы турғыстырып алған, iкiнӌi чардығын - 191394 кiзi. Республикада коронавирустаң паза кискектең тоғыр вакцинация мыннаң мындар апарылча.
Хакасияның хазых хайраллаӌаң министрiнең искiриинең, республиканың имнег тураларында коронавируснаң ағырчатханнарны имнирiне 734 орын пар, оларның 465 орғанда кiзi чатча, 269-зы пос турча. Аннаңар республиканың имнег тураларында "ковид" орғаннары iкi хатап хызырылары кöрiлче. Имнег учреждениелерi, тiзең, пландағы имнег полызиин пирерiне айландырылчалар.
Iдöк оперштабта таныхталған, тиксi республикада ОРВИ-наң ағырчатханнарның саны 50%-ке хызырылған паза коронавирус чуғынӌахнаң ағырчатханнарның саны синче.
Хакасия пазы Валентин Коновалов республика чуртағӌыларына паза аалӌыларына Роспотребнадзорның чахығларына пос салынмин тудынарға чахаан.
Автор :
Наталья Тюкпеева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы