Тынағ кӱннерi узарадылбас
06.01.2022
Хабарлар
Пӱӱн Хакасия пазы Валентин Коновалов, социальнай сетьтер хоостыра теестегi кöнi эфирге сығып, чуртағӌыларны сағыссыратчатхан сурығларға нандырған.
Чуртағӌыларның сурығларына нандырар алнында кибiрли коронавирус чуғынӌах ағырығ тарапчатханнаңар искiрген. Пӱӱнгi кӱнде республикада 28 кiзi ағырығны хаптырған, 84 кiзi хазыхтанып алған. Коронавирус диагнозтығ 8 чир-суғӌыбыс ах чарыхтаң парыбысхан. Хакасияның имнег тураларында коронавируснаң ағырчатханнарны имнирiне кöрiлген орыннар хызырылча, имнег тураларында чуртағӌыларға пландағы имнег полызиин пирерi нааӌылалча.
Анаң Валентин Олегович чуртағӌыларның социальнай сетьтерзер кiрген сурығларына нандырған.
- Наа чыл тынағ кӱннерi узарадылары кöрiлче бе?
- Сағам наа чыл тынағ кӱннерiн узарадарына кирексiнiс парын штаб чыылии кöрбинче. Ағырчатханнарның саны синче паза санитарнай- эпидемиология оңдайлары хомайланмин пiр синде тудылча. Узун тынағ кӱннерi тоозылза, хайдағ эпидемиология кирее поларын кöрербiс, аның сылтаанда чарадығ аларбыс. Сағам каникуллар узарадарынаңар пöгiннер чоғыл.
- Хаӌан Шира аалдағы 18 номер школазын тыхтабызарлар?
- Ширадағы 18 номер школазында тыхтағ тоғыстарын апарарына ахча 2021 чылдох позыдылған. Че хомзынысха, муниципалитет подрядчиктi таппааннаңар тыхтағ тоғыстар апарылбаан. Пӱӱл пу тоғыс толдырыл парарына iзенчем, тыхтағ тоғыстарына асхынах нимес ахча позыдылған.
Кöнi эфирде чуртағӌылар республикада экология кирее хайди пöгiлчеткеннеңер сурғаннар. Валентин Олеговичтiң таниинаң, пу сурыға ӱлгӱлер хаӌанох хайығ айландырчалар. Кии кiрленгенiнiң сылтаан табарына сыныхтағ апарылған.
- Република "Арығ кии" хазна программа кiрерiнӌе тоғыс апарчабыс. Кирек пiчiктер тимде. Пiстiң Ағбан паза Харатас городтар иң кiрлiг киилiг хазна городтарының санына кiр парғаннар. Юридическай лицоларға паза кiзiлерге экология законодательствозын сайбаан ӱчӱн штраф синiн öскiрiбiзерге кирек, - таныхтаан Валентин Коновалов.
Автор :
Наталья Тюкпеева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы