ТӦЛЕГ СИНІ ХОЗЫЛАР БА?
14.01.2022
Хабарлар
Сурғазар - нандырчабыс. Россияның Пенсия фондының (ПФР) специалисттері республика чуртағҷыларының аймах сурығларына нандырчалар
- Мағаа октябрьда, чалғыс іҷее чіли, пір чылға пособие турғыс пиргеннер. Айда 6254 салковай алчам. Чоохтап пиріңер, 2022 чылда ол тӧлег сині андағох халар ба алай ағаа индексация иділер бе?
Лариса Ф., Ағбан пилтірі аймаа
- 8 - 16 частығ палалар ӧскірчеткен чалғыс паба-іӌее тӧлелчеткен пособие регионда палаа турғызылған чуртап парыбысчаң иң асхынах синнің 50 % тиңнелче. Хакасияда пылтыр ол 12509 салковай полған, андағ оңдайнаң пособие сині - 6254 салковай 50 ахча. Чуртап парыбысчаң иң асхынах син чыл сай ӧсчеткенде, пособие дее хозылар. Пӱӱл Хакасияда палаа турғызылған чуртап парыбысчаң иң асхынах син 13009 салковай полар, чалғыс паба-іӌее ай сай тӧлелчеткен пособие 6504 салковай 50 ахчаа тиңнелер. Январь ӱчӱн пособие февральда тӧлелер.
- Чарыт пиріңер, ӧкіс халған ипчее позының пенсиязы орнына ирінің пенсиязын аларына кіріп аларға чарир ба, аиың пенсиязы пӧзік полза?
Пенсионер ипчі, Саяногорск г.
- Азырапчатхан кізізін чідіргені хоостыра страховой пенсиязына кіріп алар право пирілче ӧкіс халған ипчізіне алай иріне, ол пенсия алар часха чит парған алай кинек полза. Че андағ оңдай сыбыра тузалығ полбинча. Азырапчатхан кізізін чідіргені хоостыра страховой пенсияның алыспинчатхан чардығы чазы хоостыра страховой пенсияның алыспинчатхан чардығынаң 50 % асхынах, аннаңар ӧкіс халған пенсионер хада хонғанынаң асхынах тӧлег алар. Кӧзідімге, ӱреен ирінің пенсиязы 19800 салковай полған. Пылтыр аның алыспинчатхан чардығы - 6044 салковай, страховой чардығы - 13756 салковай. Андағ оңдайнаң, азырапчатхан кізізін чідіргені хоостыра пенсия полар: алыспинчатхан чардығының 50 %, хоза - страховой чардығы, пасха оңдайнаң чоохтаза, 3022 салковайға 13756 сал-ковай хозыбызарға кирек. Іди ол 16778 салковайға тиңнелер.
Ағаа хоза, ирінің алай ипчізінің пенсиязына парыбысса, севернай алай аалдағы стаж ӱчӱн тӧлег пирілбинче, ідӧк 80 часха читсе, пенсия хозылбас.
Аннаңар мындағ киректе ПФР-ның специалисттерінең хоза азырапчатхан кізізін чідіргені хоостыра пенсияа кірібізерін чахсы сананып аларға кирек. Іди кірібізері тузалығ полза, сурыныс пічиин пирібізерге халча.
- Мағаа ирткен чылда пенсия нинче алғанымнаңар справка кирек. Хайди аны алып аларға чарир паза ол хай син тус тимнелче?
Юрий Васильевич, Шира аймаа
- Андағ справканы «Хазна полызығлары» портал пастыра «Справкалар. Выпискалар» чардыхта чахыбызарға чарир. Андағы списокта «ПФР-ның тӧлеглерінеңер справкалар» строканы таллап аларға. Алай ПФР-ның сайтында пос кабинеді пастыра «Пенсиялар» чардыхта «Справка (выписка) чахыбызарға: хайдағ-да туста тӧлеглер пирілгеннеңер» сервис полызиинаң. Тыыдылған электроннай хол салыснаң киречілелген пічік анда сах ол туста тӧстел парар, аны компьютерде алай мобильникте хайраллап, кирек полза, электроннай почтаӌа ызыбызарға алай печатьха сығарып аларға чарир.
Ідӧк андағ справканы МФЦ-да алай ПФР-да алып аларға чарир, пос-наң хада паспорт пар ползын.
- Мин чыылчатхан пенсия ахчазын хазнани нимес пір фондтаң пасха фондсар ызыбызарға пічік пир салғам. Ам маңзырабысхам тіп сағынчам, ол ахчаны иргі оңдайда артызарға сағыныбыстым. Пирген пічиимні чох идібізерге чарир ба?
Игорь Ильич, Орджоникидзе аймаа
- Чыылчатхан пенсия ахчазын ызарға пір чыл аразына пирілген пічікті нандыра хығыртып аларға чарир «соопчатхан» туста. Андағ тус 1 - 31 декабрьда тоғынча. Ол 2019 чылда ӧнетін кирілген, кізі алында алған чарадиин алыстырарға сағыныбысса паза ахчазын пасха страховщикке ыспасха чарадығ алза.
Пирілген пічиин нандыра хығыртарға ПФР-зар искірерге кирек полар. Аны электроннай кӧрімде ызарға чарир ПФР-ның сайтында пос кабинедінде «Чыылчатхан пенсия ахчазынаң устиры» чардыхта «Искіріг аларға: кӧрілген пічіктердеңер» сервис полызиинаң. Мындағ искіріге тыыдылған электроннай хол салыс киректелер. Ідӧк ПФР-зар посха айланып, ол пічікті нандыра хығыртып аларға чарир.
Автор :
Тимнеен Николай СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде