ПОС ХОЛЫНАҢ ЧАХСЫЛАНДЫРЧАЛАР
20.01.2022
Хабарлар
Ӱгредіг. Ирткен чылда Таштыптағы 16 №ПУ-да килкім алызығлар пол парған, олардаңар училищенің устағҷызы Евгений Сафьянов чарыда чоохтап пирген
- Пастағы хадылда штукатурканы пӱкӱлее алыстырыбысхабыс, ол училище тоғынчыларының холынаң иділген. Иргі штукатурка чарылчатхан, аны кірпистерге теере ходырғабыс. 1973 чылдаң сығара, училище азылғаннаң, стене-потолоктар нааҷылалбааннар. Паза кӧзенектер алыстырылған, пылтыр соохха тооп ирееленҷеңміс, сизінчезер, ам хайдағ чылығ.
Сынап таа, общежитиеде паза ӱгредіг корпузында ӧӧнінде наа пластик кӧзенектер турча, олар чылығ чахсы тутчалар. Аннаң андар Евгений Дмитриевич мині актовай залзар апарча.
- Мында піс октябрь айда ідӧк кӧзенектер алыстырғабыс, мының алнында актовай залда уғаа соох полчаң ам чылығ арах. Пӧзік потолоктығ чарых залда улуғ баннер ілінче, анда сіліг сом хоостал парған - Таштып аймааның тағлары, кӱн чахайахтары чайыл партыр. Пасха сариндағы стенеде Таштып аалның баннер оңдайынаң иділген сомы ілінче.
- Пістің олғаннар иптіг кӧрімніг, чапсыстығ чирде ӱгренерге киректер. Паза мында олар чон аразында чуртирға кӧнікчелер. Ӱгретчілер, воспитательлер оларға паба-іҷе орнына полчалар. Кічіг ааллардаң килген олғаннар киртінҷектер, оларға пастағы туста полызығ киректелче.
Тиксі тыхтағ тоғыстарына ахчаны «РУСАЛ» компания пирген - 1 миллион 380 муң салковай. ПУ-да коридордаң пасха, алты кабинет нааҷылалған. Ідӧк 178 муң салковайға ӧрттеңер искірҷең приборлар общежитиедегі паза ӱгредіг корпузындағы полған на пӧлікте турғызылғаннар. Пылтыр, хорғыс полза сыхчаң ізіктердең соох кірбес ӱчӱн, хоза наа ікінҷі ізіктер турғызылғаннар. Пу тоғыстар ӧрттең тоғыр кирексіністерге пӱкӱлее нандырчалар.
Котельнайдағы труба саңай таттап партыр, ирткен чайғыда аны ідӧк алыстырарға киліскен. 24 метр трубаны Ағбандағы идінҷек Алексей Топоев турғызарға полысхан. Училищенің гаражында, хайда аймах-пасха техника турча паза чон тоғынча, наа хаалхалар турғызылғаннар, анда уғаа сӧрӧн полҷаң. Паза училищенің тоғынҷылары гаражтың хырын алыстырар тоғыстарнаң айғасханнар. Ідӧк Таштып аал чӧбінің пазы Рустам Салимов хабас пирген. Гаражта 8 кізі істенче, оларнаң чиит ус Александр Иванов устапча, Евгений Дмитриевич аны матап махтаан. Кӱстенҷік, ӧткін істенҷілер полған на устағҷының кӧңніне кірче.
Таныхтирға кирек, олох Александр Иванов паза пасха тоғынҷылар чайғызын от тимнирінең айғасчалар, училище маллар ӧскірче. 2016 чылда малларны отха наа ла орназып пастааннар, пӱӱнгі кӱнге 20 пас інек мал саналча паза кроликтер тутчалар.
- Піс фермерге ӱгретчебізӧк, аннаңар оол-хыстар малларнаң айғазып пілзіннер, - чооғын узаратча Евгений Дмитриевич. - Итсе, студенттерге ӱгредіг хынығ иртерге кирек. Ікінҷі курста оларның тракторнаң чӧрҷең водитель удостоверениезін алып аларға оңдай пар, ӱзінҷі курста ниикке чӧрҷең автомобильнең чӧреріне права алып алчалар. Пасха даа категорияларға ӱгренчелер, чуртаста ол уғаа кирексіністіг специальностьтар. Пасха организацияларда водитель категорияларына ӱгренерге кӧп ахча кирек.
Сынны чоохтаза, мин андағ чарых, чылығ училищеде позым даа ӱгренерҷікпін. Ӱгретчілер паарсах. Общежитие училищее чапсыра орныхча, ӱгренҷең тиріглер читкіҷе. Аймах-пасха специальностьтарға ӱгреніп аларға чарир. Кинек олғаннарнаң даа тоғынчалар.
Пылтыр училищенің ӱгренҷілері «Чиит профессионаллар» республика синінде иртчеткен чемпионатта «Пӱдіріг паза чахчаң тоғыстар» площадкада 2-ҷі орынға сыхханнар: Никита Чебодаев паза Валерия Чебодаева. Майя Бурнакова сырлаҷаң кирекче 3-ҷі орын алып алған. Олғаннарнаң улуғ тоғыс апарылча, ол пілістер пирерінең не пӱтпинче, палаларны аймах марығларда, халых чуртаста айғазарға тӧреміл кӧніктірчелер.
«Істіндегі тоғыстар узы» специальностьча ӱгренчеткен 1 -ғы курстың студенті Артём Топоев сағыстарынаң ӱлесче:
- Минің іҷе-пабам Ағбанда чуртапча, мин, тізең, пеер ӱгренерге кіріп алғам. Ӱгредіг тузында общежитиеде чуртапчам, тынағ кӱннерінде удаа Ис пилтірінзер ууҷамзар парыбысчам, ол мині кіҷігдең сығара ӧскірген. Пастағызын тимір хабыстырҷаң усха ӱгренерге хынғам, че ол специальностьча орыннар чох полған. Улуғ пиҷем Снежана мындох трактористке ӱгренче, ағаа 18 час. Ӱгреніс мағаа хынығ пілдірче, пірееде ле иртен турарға сидік.
Автор :
Тарина БУТОНАЕВА
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
