ӰЗӰРІГДЕ - СПОРТТЫҢ АҒЫРСЫМНЫҒ СУРЫҒЛАРЫ
26.01.2022
Хабарлар
Тоғазығ. Ағбанда Олимп резерві училищезінде Хакасия пазы Валентин Коноваловтың спорт сферазында істенчеткен улуснаң тоғазии ирткен
УЧИЛИЩЕҶЕ ЭКСКУРСИЯ
Мероприятие ікі чардыхтаң пӱткен. Пастап училищенің устағӌызы Сергей Головкин Хакасия пазы Валентин Коноваловха улуғ нимес экскурсия иртірген. Учреждениеде ӱгредіг нинӌе-нинӌе специальностьча апарылчаттыр: физкультура ӱгретчізі, повар-кондитер, туризм сферазының специализі паза даа пасхазы. Улуғ аалӌаа студенттер хайди печенье итчеткенін кӧзіткеннер. Пӧліктер лабораториялар тіп адалчалар. Оларға толдыра татхыннығ чиистің тадылығ чызы чайылчатхан. Кондитер тоғызына ӱгретчеткен специалисттернің ӧӧн поғдархазы наа оборудование полтыр. Аның полызиинаң училищенің студенттері аймах ниме-ноо тимнирге ӱгренчелер.
Лабораториялар соонда прайзы тренажер залынзар чол тутхан. Зал улуғ нимес, че спорт тиріглері читкіӌе. Сергей Николаевичтің чооғынаң, ол хуруғ турбинча. Спортзал училищеде алынча орныхча, че аны кӧріп аларға аалӌыларның тус читпеен. Мероприятиенің ӧӧн чардығы спорт сферазында істенчеткен улуснаң тоғазиина чарыдылған. Кізілер чахсы чыылысханнар. Тоғазығ араласчыларының санында спорт школаларының, федерацияларның устағ-пастаа, саблығ тренерлер, спортсменнер полғаннар. Илеедезі тоғазыға город-аймахтардаң ӧнетін килтір.
ӦӦН КӦСТЕГЛЕР
Мероприятиені Хакасия пазының аппарады устағӌызының тоғызын толдырчатхан Владислав Никонов апарған. Хайди таныхтаан Владислав Анатольевич, республика правительствозы, наа оңдайнаң тоғынарға пӧгініп, профессиональнай пірігістернең тоғазығлар иртірерге чаратхан. Ӱлгӱдегілер ізенчелер: кізілер ағырсымнығ сурығлар кӧдірерлер, тоғысты чахсыландырар чӧп пирерлер, таңдағызына пӧгіннер турғызарға полызарлар. Хакасия пазы полған на тоғазығда аралазарға маңнанмас, неке, че аның орынӌылары, министрлер чоннаң чоох алызарға хаӌан даа тимделер.
АЗЫХ ЧООХТАЗЫҒ
Анаң чоох тутхан Хакасияның спорт министрі Сергей Кочан. Ол залдағы чонны 2021 чылның тоғыс салтарларынаң хысхаӌахти таныстырған. Чылның сан пирізі «Хакас чирі» газетада 21 январьда сых парған. Хоза танығлардаң, ведомство ӧӧн спорт кӧрімнерінің санын ӧскірерге пӧгінче. Амғы туста андар ниик атлетика, дзюдо, стол теннизі паза спорт кӱрезі кірчелер. Министерство оларның санына меспектіг хоккейні, кикбоксингті, ипчілер волейболын, хазии уйаннарның спортын паза боксты кирер тоғыс апарчаттыр. Пічіктер Москвазар ызыл парғаннар. Кирек киліссе, пу спорт кӧрімнерінің тилізіне федеральнай кіннең хоза ахча пирілер.
Чыылған чон пылтыр спорт сферазында илееде тоғыс иділ парғанынаң чарасхан. Кӧзідімге, пӱӱл Хакасияда шахмат клубы тимге сығар. Шахматист Руслан Драгановтың чооғынаң, олар 30 чылӌа пос тура чох ирееленгеннер. Марығларны Хакасияның ӧӧн музейінде, спорт школаларында иртірерге килісчең. Амды шахматисттернің Ағбанда Пушкиннің орамазында алынӌа кін пар, анда тыхтағ тоғыстары иділ парған. Наа оборудование кірерін сағыпчалар. Шахмат клубы апрельде пайрамни азылар. Россияның саблығ тренері Александр Берёзкин ӱлгӱдегілерге спортсменнерге тӧреміл хабасчатхан ӱчӱн улуғ алғызын читірген. Кикбоксерлар аймах-пасха синде иртчеткен марығларда тӧреміл чиңіс тутчалар. Че кикбоксинг олимп спорт кӧрімнері санына кірбинчеткеннеңер, оол-хыстар ахчалығ сыйыхха турыспаӌаңнар. Пылтыр министерствоның пастаанынаң законзар алызығлар киріл парған, пу читпес чох иділді. Хакасия правительствозы кикбоксерларға залнаң полыс пирген полза, уламох чахсы поларӌых.
Сизінгенде, спорт сферазында зал сурии иң ағырсымнығ. Орджоникидзе аймаандағы Копьев аалда аар атлетиканаң айғасчатханнар 43 чыл подвалда штанга кӧдірчелер. Андағ даа оңдайларда тренер Геннадий Свистельниковтың устаанынаң 8 кізі спорт узы нормативін толдырыбысхан. Боград аймаанда пір ле тоғынчатхан спорткомплекс, ол Бородино аалда орныхча. Анда хайди даа тиксі тыхтағ тоғызын иртірерге кирек. Спорт аэробикаӌа тренер Дарья Дементьева секцияда олған санын ӧскірерге тимде, че тренировкалар иртірӌең орын чоғыл. Спорт кӱрезі федерациязының президенті Геннадий Канзычаковтың таниинаң, Хакасияда Россия марығларын иртірер хоза орын кирек. Амғы туста прай нормаларға «Ағбан» спорт-комплекстегі зал ла килісче.
Сурығларға Хакасия пазы Валентин Коновалов нандырған. Ол теен:
- Тоғыс чорығынаң муниципалитеттерде удаа поларға килісче. Пілчем, спорт инфраструктуразы саринаң киректер най уйан Боград паза Орджоникидзе аймахтарында. Оларға полызар оңдай тілирбіс. Спорт министрі Сергей Кочан пір тӧӧй оңдайлығ паза табырах пӱдірілчеткен залның проектінеңер искірген. Азынада сананыстар хоостыра, зал 30 миллион салковайға тур парар. Ізенчем, аның полызиинаң пу сурығ пӧгілер. Хакасияның чуртағҷыларына спортнаң айғазар чахсы оңдайлар тӧстирге кирек.
Таштыптағы спорт школазының устағӌызы Анна Сипкинаны тренерлернің чал ахчазы сағыссыратча. Анна Викторовна сурған: «СМИ-лар пастыра пӱӱл 1 февральдаң чал ахчазы ӧзердеңер искірчелер. Тренерлерге чал ахчазын хозарлар ба?» Хайди таныхтаан Сергей Владимирович, пӱӱл спорт ведомствозы учреждениелернің тоғызын чахсыландырар пӧгіннең муниципалитеттерге субсидияларны ӱс хати ӧскірібіскен. Ахча ол санда тӱзімніг тоғынчатхан тренерлерге кӧріл парған.
Кирилл Жибинов Харатастаң. Ол гиря кӧдірерінӌе тренер полып істенче. Чиит специалист спортсменнерге психолог киректелче теен. Тренер таныхтаан:
- Тренировкаларда ӱгренчілерібістің прай ниме килісче, че марығлар тузында олар гиряны турыстыра кӧдір полбиныбысчалар. Саарбахтарның прай кӧңні тӱс парча. Психолог, чиит спортсменнернең чоох алызып, орта кӧстеен полза, чахсы поларчых.
Ідӧк Кирилл Жибиновты чир-суғӌыларыбыс марығларда чиңіс тутхан чииттерні чахсы таныбинчатханы хомзындырчаттыр. Министр Сергей Кочанның чооғынаң, пӱӱл Хакасияда спортсменнерге имнег кіні тоғынып пастир. Штатта психолог полар. Чидіге читкен спортсменнердеңер республика пазы Валентин Коновалов позының социальнай сетьтері пастыра искірерге тимде. Ағаа хоза пресс-службаларға хоза чахығ пирілер.
Тиксі алза, Хакасия ӱлгӱлерінің профессиональнай пірігістернең пастағы тоғазии тӱзімніг ирткен. Кізілерні ӱзӱріге сығарылған сурығлар хайди даа пӧгілер тіп ізендіргеннер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы