ЧЫЛДАҢ ЧЫЛҒА КӦП ЧОЛ ТЫХТАЛЧА
28.01.2022
Хабарлар
Нацпроект. Хакасия пазы республикадағы чолларны нааҷылир хоостыра транспорт министрінең паза Ағбан, Харатас, Саяногорск городтар устағчыларынаң чыылығ иртірген
- Пӱӱн піс «Хорғыс чох чахсы чоллар» национальнай проекттің 2021 чылдағы салтарын ӱзӱрербіс, чоллар хоостыра хайди тоғынғаныбыс ты паалирбыс паза 2022 чылға пӧгіннер турғызарбыс, - теен Хакасия пазы Валентин Коновалов.
Регион пазының таниинаң, пылтыр чоллар хоостыра турғызылған пӧгіннерні хай піреезі толдырарға сыданмаан. Пірее объекттерде подрядчиктер тоғынарға тимде полбааннар, хайзыларында муниципалитеттер тоғысты хайығда чахсы тутпааннар. Андағ оңдайнаң сигіс объектте тоғыс тузында тоозылбаан.
Пылтыр чолларны тыхтирына федеральнай, регион паза муниципалитет бюджеттерінең 885 миллион салковай позыдылған. 1 январьға теере ол ахчаның 93 %-і хорадылған. Таныхтирға кирек, алындағы чылларнаң тиңнестірзе, ирткен чылда тоғыс тӱзімніг парған.
Транспорт инфраструктуразы республикаа тың кирек. Ол экономикаа кӧнізінең теелче. Аның полызиинаң регион тиліпче. Республиканың прай аалларынзар паза городтарынзар чахсы чоллар парза, анда-да чуртағҷыларға имненерге, ӱгредіг аларға, культураны тилідерге оой полар. Хакасия правительствозы, транспорт инфраструктуразын чахсыландырар ӱчӱн, федеральнай ахчаны республиказар тартарға кӱстенче, аннаңар чолларны нааҷылаҷаң фонд чылдаң чылға ӧсче.
- Чоллар - ол орындағы администрацияның, аалның, городтың, устағҷының сырайы. Пӱӱл, апрель-майда, оймах-осхыллығ чолларны тӱзедер ӱчӱн, піс контракттарны азынада тимнирге кирекпіс. Андада чол тоғыстары августха теере сӧӧ тартылбас. Пу сурыға прайзы нандырығлығ хайарға кирек, - таныхтаан В.О.Коновалов.
Хайди искірген чыылығда Хакасияның транспорт паза чол хонии министрі Дмитрий Василиади, пылтыр чолларны тыхтирына 533 миллион салковай федеральнай бюджеттең пирілген, 343 миллион салковай - республика бюджедінең, 9 миллион салковай - муниципалитеттер бюджеттерінең. Соонаң Хакасияа федеральнай бюджеттең 183 миллион салковай хоза пирілген.
Национальнай проекттің 67 миллион салковайы ам даа хорадылбаан, че пӱӱл тоғыс узарадылар. 53 миллион салковай Ағбанны ибірчеткен чолға парыбызар. Анда тоғыс толдырыл таа парған, че оң сари читіре тимде нимес. Подрядчик тоғызын тузында толдырарға маңнанмааннаңар, аннаң хада тоғынар чӧптезіг тохтадылған. Амды пасха подряднай организация киректелче.
Тыхтағ тоғыстары тоозылбааннар мындағ участоктарда: Ағбан пилтірі аймаандағы Солнечнай аалзар кірчеткен кизек, Ағбан пилтірі - Чарков - Чорба чол, Ағбан - Саяногорск чолның 19-20 километр кизегі, Ағбанда Крыловтың орамазы.
Хакасияда нааҷылаҷаң чоллар хозыл парғаннаңар, подряднай организациялар андағ кӧп тоғысха тимде полбааннар. Прай объекттерҷе контракттар иділ парғаннар, че подрядчиктер чолларны тыхтирға маңнанмааннар. Оларның техниказы читкіҷе полбаан.
Таныхтирға кирек, тоғыс тузында сығыс килчеткен андағ-мындағ алҷаастары ӱчӱн подрядчиктер штрафтар тӧлееннер. Пылтыр аның сині 18 миллион салковайға читкен. Алындағы чылларнаң тиңнестірзе, пу сан ӱс хати пӧзік.
2022 чылда «Хорғыс чох чахсы чоллар» национальнай проектке 879 миллион салковай позыдылары кӧрілче: 413 миллион салковай - федеральнай ахча, 459 миллион - республикани. Ағаа хоза, Ағбан - Бийск чолны пӱдіреріне 243 миллион салковай федеральнай ахча пирілер. Ідӧк пӱӱл Асхыс - Пирікчул - Тӧӧ пазы чол тыхталар.
Пӱӱл 21 объект нааҷылалар. Ол чоллар хоостыра контракттар тимде. Аннаңар тасхар чылығ кӱннер турыбысса, чолҷылар тыхтағ тоғыстарына тыынарлар.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы