АМ ДАА УЛУҒ ТОҒЫС АПАРАРҒА КИРЕК
28.01.2022
Хабарлар
Чыл сан пирізі. Хакасияның юстиция паза региондағы безопасность киректерінҷе министрі Сергей Ромашов республика пазы Валентин Коноваловха ведомствоның 2021 чылдағы тоғыс салтарларынаңар искірген
Министерствоның ӧӧн пӧгіннерінің пірсі - Хакасия пазының, Правительствоның паза аның Президиумының тоғызына правода хабазары. Пылтыр ведомство 1087 нормативнай право актында юридическай паза коррупциядаң тоғыр экспертиза иртірген, 675-інде сайбағлар ілезіне сығарылған. Олар прай тӱзеділгеннер. Халғанҷы ікі чылда прокуратура паза Россияның минюсты тоғыр полған Хакасия правительствозының акттары саны ортымахти 16 % хызырыл парған. 2021 чылда пастағызын на олар чарғыда кӧрілбееннер.
Хайди Хакасия минюстының устағҷызы таныхтаан, ведомство, муниципальнай право акттарында сайбағлар полдыртпас пӧгіннең, орындағы пос устаныс органнарына полызығ пирче. Пылтыр законодательстваа киліспинчеткен документтер саны 2 хати хызырыл парған - 2019 чылда 471 полған, 2021 чылда - 242.
Чахсы саринаң таныхтирға чарир сайбағлар полдыртпас профилактика тоғызы апарылчатханын. Ідӧк ол коррупциядаң тоғыр кӱрезіге теелче. 2021 чылда министерство 21 сыныхтағ мероприятиезін иртірген, парыстардаңар паза хорадығлардаңар 1553 справка сыныхталған. Толдырығлығ ӱлгӱ органнарында аннаңар искіріглер пирілбеені ілезіне сығарылбаан. Сайбағлар саны 473-тең 316-а теере хызырыл парған. Оларның кӧбізін оох-теекке санирға чарир.
Пӱкӱлее алза, пылтыр сайбағларға тоғырланар сферада апарылған тоғыс сылтаанда аар паза уғаа аар сайбағлар саны хызырылған. Іди ӧдірістер саны 28,6 % хызырылған, кізее кӱлгені - 51,1 %, тирігліг тонағ иткені - 15 %, законнаң хыйыстыра наркотиктер айланызы - 13,5 % паза даа пасхазы. Саарбахтар иткен сайбағлар саны 31,1 % кӧріндіре хызырылған (238 сайбағдаң 164-ке теере).
2021 чылда Хакасия пазының чахиинда кӧп чон полчатхан орыннарда санитар-эпидемиология оңдайлары хайди толдырылчатханын сыныхтирына алында хайығ салылған.
- Пылтыр кӱскӱде піс административнай практика пӧлиин тӧстеп алғабыс. Ол уғаа чахсы тоғынған. Ирткен чылда право хайраллачаң органнарнаң, толдырығлығ ӱлгӱ паза орындағы пос устаныс органнарынаң хада 126 муң азыра мероприятие иртірілген. Сайбағларны чачында таныхтирға киліскен. РФ КоАП-ының 20.6.1 статьязынча 4421 протокол пазылған. Чарғыларда 3714 материал кӧрілген. 1597 материалча штрафтар салылған. Пасхазынча - сизіндіріглер. Салылған административнай штрафтар сині ікі миллионча салковайға тиңнелген. Таныхтапчам, мындағ сыныхтағ тоғызы апарылған сылтаанда кізілер, предприятиелер, организациялар санитар-эпидемиология оңдайларынча тудын сыхханнар. Пу кӧстегҷе тоғыс узарадылча, - искірген Сергей Ромашов.
Министр алынҷа мировой юстицияны тилідердеңер чоохтаан. 2021 чылда республика бюджедінің ахчазына Саяногорсктағы чарғы участоктарында тиксі тыхтағ тоғыстары апарылған, Шира аймаанда мировой чарғының туразында чылығ пирҷең система тыхталған паза кӧзенектер алыстырылған. «Искірігліг инфраструктура» федеральнай проект хоостыра мировой чарғыларны Россияның «Правосудие» хазна автоматизированнай системазына, ведомстволар аразында электроннай палғалыс тудар паза видеоконференция палғалыс системазына кирер тоғыс апарылча.
Амды пу тоғыстарның пастағы чардығы толдырыл парған. Ідӧк ирткен чылда мировой чарғыҷыларға техника, мебель паза канцелярия алылған. Іди компьютерлер, архивтерге стеллажтар, офис мебельі паза даа пасха ниме-ноо садызылған. Ағаа хоза, мировой чарғыҷылар аппарадының тоғынҷыларына ай сай пирілчеткен тӧлеглер сині хозылған. 2022 чылда полысчыларның хоза тӧлеглер чох иң асхынах чал ахчазы 36941 салковай полар, хачыларның - 31540 салковай.
Позының чооғында республиканың юстиция паза региондағы безопасность киректерінҷе министр Хакасия пазына ЗАГС органнарының, чон дружиналарының, коллегиональнай координация органнарының тоғызынаңар искірген.
Ідӧк мыннаң мындар хайдағ тоғыс апарары таныхталған. 2022 чылда «Искірігліг инфраструктура» федеральнай проектті паза «Хакас Республикада мировой юстицияны тилідері» подпрограмманы чуртасха кирері узарадылар. Іди Саяногорсктағы паза Харатастағы чарғы участоктарында тиксі тыхтағ тоғыстарын толдырары кӧрілче. Ағаа хоза, Хакасияда экстремизмҷе профилактика тоғызын апарар чӧптезіг органын тӧстир сағыс пар. «Об общих принципах организации публичной власти в субъектах Российской Федерации» федеральнай закон алыл парғаны хоостыра право сферазында улуғ тоғыс апарарға кирек полар. Республиканың 200 азыра нормативнай право актын хати кӧріп, оларға алызығлар кирерге килізер.
- Пӱӱл министерстваа коррупциядаң тоғыр пічіктерче экспертиза иртірерінҷе, республиканың паза муниципалитеттернің нормативнай право акттары федеральнай законодательстваа хайди килісчеткенін кӧрерінче, чонның юридическай пілізін кӧдірерінче тоғысты узарадарға кирек полар. Андағ пӧгіннең орындағы пос устаныс органнарынаң хада-пірге тоғынарын улам тыыдарға киректелче, - таныхтаан Валентин Коновалов. - Пу чылда ведомство тоғынҷыларына тӱзімніг тоғынарға алғапчам.
Автор :
Виктория ТИТОВА, Хакасияның юстиция паза региондағы безопасность киректерінҷе министерствозының пресс-службазы
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде