АНИТА ЦОЙҒА - ТАЛҒАННЫҒ ПАЗА НЫМЫРТТЫҒ ТОРТ
28.01.2022
Хабарлар
Ӧткіннерібіс. Ағбан городтың чуртағҷызы Наталья Чаптыкова «Пятница» федеральнай телеканалның «Кондитер» шоузында араласхан
Кемеровтағы институтта технологка ӱгренген Наталья Чаптыкова торттар идерге паза оларны чазирға хынадыр. Аның позының пекарнязы полған. Че амды, ибде кічіг паланаң одырчатханда, аны чабысхан. Андағ даа полза, чиит ипчі туған-чағыннарына, ӧӧрелеріне сіліг торттар пызыр пирерге хаҷан даа тимде полча. Ідӧк, чииттерні торттар идерге ӱгредіп, мастер-класстар иртірче.
- Мин иткен иң аар торт 15 килограмм пасхан, - чоохтапча Наталья. - Пір чиит сӧбіре аны тойына тимнеп пирерге сурынған. Тортты хакас хоостарнаң чазап салғам, уғаа сіліг кӧрінген.
18 январьда «Пятница» телеканалда «Кондитер» кӧзідіг сығарылған. Пістің чир-суғҷыбысха анда аралазарға ӱлӱс тӱскен. Хайди тіпче Наталья, арғыс-ӧӧрелері аны ол шоуда аралазарға хаҷанох чӧптееннер. Анаң чиит ипчі передачаны иртірбин кӧр сыххан: араласчылар хайдағ торттар тимнеп килчеткенін, хайди чазапчатханын, постарын хайди тудынчатханын. Ӧӧнінде кӧзідігні апарчатхан Ренат Агзамовтың сизіндіріглеріне хайығ айландырған. Ол передачаны хайди апарчатханы Натальяның кӧңніне кірген. Пола-пола чир-суғҷыбыс телешоуда аралазарға сағыныбысхан.
Наталья передачазар айланыс пічиин ызыбысхан. Тӱрчедең Москвадаң нандырығ килген. Чиит кондитерге пастап онлайн чардыхтарны иртерге киректелген: тортты хайди тимнепчеткенін видеоға суурарға, аннаң пасха, «Ырчының тӧреен кӱні», «Ах чарых Валентиннің кӱні» паза «8 Март» темаларға торттар идіп, сомға суурарға. Ол ниме-нооны прай телепередачазар ызыбысхан. Ол онлайн чардыхтарны иртібіскенде, чир-суғҷыбыстың улуғ ӧрініс полған - аны январьның ортызында Москвазар хығыртыбысханнар.
- Чол ахчазын, гостиницадағы хоннаң орынны передача тӧлеп пирген, - тіпче Наталья. - Москвазар паза нандыра Хакасиязар самолеттығ учуххам. Гостиницада ӱс кӱн чуртаам. Чазырбин чоохтаза, тың чӱрексеем, Москвада пастағызын на полғам нооза. «Кондитер» телешоуда тиксі Россиядаң торт тимнеҷең устар аралазадыр. Пістің чир-суғҷыбыснаң хада Тамбов, Пенза, Санкт-Петербург, Брянск, Москва, Тюмень городтардаң кондитерлер полғаннар. Оларға Россияның саблығ ырҷызы Анита Цойның тӧреен кӱніне торт ит килерге чахығ пирілген.
Иң чапсыстығ, Наталья Чаптыкова тортты Ағбанда тимнеен. Анаң аны самолеттығ Москвазар читірген. Хазнабыстың ӧӧн городында чуртапчатхан ӧӧрелері тортты читіре чазирға ӧнетін кухня таап пиргеннер.
- Тортты мин тайға хузуғынаң, мактаң паза хойытхан сӱттең тимнеем, - чоохтапча Наталья. - Тастын талғаннаң паза нымырттаң иділген конфеттернең чазаам. Устӱнде чатханнығ хакас хыс ибіҷек тастында одырчатханын чарых сырларнаң хоостаам.
Андох Хакасиябыстың сіліг чир-чайаанын кӧзіт пирерге кӱстенгем. Хоостирға ӧӧрем Ада Татарова ӱгреткен.
«Хузухха айабиндырзар, кӧп аралаптырзар», - теен телешоуда Натальяның тортын амзапчатхан Россияның саблығ кондитері Ренат Агзамов. «Кӱстенгем», - кӱлініп ала нандырған Наталья. «Сірер чахсы хоостапчаттырзар», - теен телешоуның чарғыҷызы Ольга Вашурина. Хомзынысха, Наталья финалға сых полбаан. Итсе-де, шоуның чиңісчізіне пір миллион салковай пирілер. Че Наталья ачырғанминча. Чир-суғҷыбыс «Кондитер» передачаның студиязында полғанына, Ренат Агзамовнаң харахтаң харахха тоғасханына паза Анита Цойнаң танызып алғанына тың ӧрінче.
- Хығырзалар, пазох теле-шоуда аралазарбын, - тіпче Наталья Чаптыкова.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы