ЧИИТ ООЛ-ХЫСТАР УСТАРЫН КӦЗІТЧЕЛЕР
16.02.2022
Статья
«Чиит устар»-2022. Пу кӱннерде Хакасияда WorldSkills стандарттарында «Чиит устар» регион синіндегі чемпионат иртче. Республика пу марыға алты чыл мының алнында хозылған
Марығның ӧӧн пӧгіні - чииттернің аразында тоғысчы профессияларны сабландырары, оол-хыстарны андар тартары. Россия чемпионатта 2012 чылдаң араласча. Ол хазнаның прай регионнарында иртірілче. Хакасия, тізең, «Чиит устарда» 2016 чылдаң араласча. Таныхтирға кирек, чылдаң чылға марығның сині ӧзіп ле одырча паза араласчыларның саны хозылча. Пӱӱл пістің регионда 250 азыра кізі 29 кӧстегҷе 11 ӱгредіг площадказында узынаң сынасча. Араласчыларның санына ортын профессиональнай ӱгредіг учреждениелерінің студенттері, ӱгренҷілер паза 50 час ас парған специалисттер кірче. Оларның тоғызын Хакасиядағы паза пасха регионнардаң килген 250 эксперт паалапча.
Пӱӱл пастағызын на марығда ӱгренҷілер араласчалар. Чемпионаттың ӧӧн чардығы пасталар алнында, Ағбанның паза Хызылчар крайының 14 - 16 частығ олғаннары Ағбандағы пӱдіріг техникумында «Сухое строительство и штукатурные работы» паза «Малярные и декоративные работы» кӧстегҷе кӱстерінең сынасханнар.
«Сухое строительство и штукатурные работы» кӧстегдегі площадкада алты олған араласхан: Айзар Аалиев (Асхыс аймаандағы Индіркі Тӧӧ аал), Азим Давлатов (Ағбандағы 22 № школа), Матвей Логирос (Харатастағы гимназия), Могилат Ростислав (Саяногорсктағы 6 № школа), Лев Бурлаченко (Хызылчардағы Покровский комплекс школазы). Олғаннар тимір каркастар, чыып, турғысханнар, оларны пӱдіріг плиткаларынаң чапханнар, сыбааннар паза даа пасха чахығлар толдырғаннар. Чемпионат полған на араласчаа узын кӧзіт пирер оңдай пирген. Олар ағаа ӱр тимненгеннер, чӱрексееннер.
Чемпионаттың ӧӧн чардығы 14 февральда пасталған. Аның пайрамни азылғанында Хакасия правительствозының кізілері, муниципалитет пастары, ортын профессиональнай ӱгредіг учреждениелерінің устағ-пастаа Харатастағы отрасльлар технология техникумында чыылысханнар. Чииттерні пандемия пір орында чыырға пирбеен. Аннаңар олар профессиялары хоостыра иртірілчеткен марығ орыннарында полғаннар. Че полған на площадканаң интернет пастыра палғалыс тудылған. Хакасия техникумнарында чемпионат «Мода технологиялары», «Чарытхы тартары», «Сантехника паза чылығ пирері», «Пӱдіріг», «Монтаж» паза даа пасха кӧстеглерҷе иртче. Хакасия пазы Валентин Коновалов, студенттерзер паза эксперттерзер айланып, республикаа марығның кирексінізін искірген.
- Амғы туста Россияның істеніс рыногында тоғысчы профессиялар улуғ кирексіністелер. Мындағ чемпионаттар, тізең, чиит оол-хыстарны ортын профессиональнай ӱгредіг организацияларын таллирға кӧӧктірче. Марығда араласхан студенттер анаң хазна синінде пӧзік пілістер кӧзітчелер. Аннаң пасха, «Чиит устар» чемпионат республиканың ортын профессиональнай ӱгредіг учреждениелерінің материально-техническай базазын нааҷылирға оңдай пирче паза преподавательлернің устарын тилітче, - таныхтаан чооғында Валентин Олегович.
«Чиит устар» чемпионатта Хакасияның прай даа муниципалитеттері араласчалар. Таштып аймааның 16 № училищезі пу марыға студенттерін сыбыра тимнепче. Пӱӱл аймахтың паза ӱгредіг организациязының адын Алдина Боргоякова арачылапча. Студент аймах ниме-нооны, хоостап, сырлирға ікінҷі чылы ӱгренче. «Чиит устар» чемпионатта ол «Малярные и декоративные работы» кӧстегҷе араласча. Чахығ хоостыра ағаа паза марығда араласчатхан тӧрт студентке алты чахығны толдыр саларға кирек полған. Ол обойлар чапсырары, килістіре ӧңнер таллиры, ізіктер сырлиры паза даа пасха тоғыстар. Чемпионатха студентті преподавательі Елена Билялова тимнеен. Ирткен чылда Елена Сергеевнаның ӱгренҷізі Майя Бурнакова пу марығда ӱзінҷі орынға турысхан. Пӱӱл дее Таштыптағы училище сыйыхтығ орын алып аларына ізенче.
«Малярные и декоративные работы» кӧстегнің ӧӧн эксперті Никита Родионов полча. Хайди ол чоохтапча, пирілген тоғыстарны эксперттер баллар пиріп паалирлар. Иң кӧп балл чыып алған студент чиңісчі полыбызар. Иң улуғ балл - 20.
- «Чиит устар» чемпионатта араласханы студенттерге алнынзар хаалағ идерге оңдай пирче. Пастағы орын алған чииттер Россия синіне сыхчалар. Анда оларның устарын уламох опыттығ эксперттер паалапчалар. Анаң олар Европа синінде араласчалар, - чоохтапча Никита Николаевич. Таныхтирға кирек, «Чиит устар» чемпионат пістің республикада иң пастағызын ирткенде, Никита Родионов анда «Сухое строительство и штукатурные работы» кӧстегҷе араласхан. Пастағы орын алып, ол Хакасия адын Россия синінде арачылаан. Андада техникумның студенті ідӧк позын чахсы саринаң кӧзіт пирген.
- Улуғ марығлар чииттерні ӧменең тоғынарға ӱгретче, опыт, піліс пирче, - тіпче эксперт.
Хазна синіндегі чемпионатта араласхан соонаң пӱдіріг техникумының устағ-пастаа чиит оолны позынзар тоғынарға хығырған. Пис чыл изере Никита Николаевич пасха студенттерні аймах кӧстеглерҷе устарын чітідерге ӱгретче, амды, тізең, марығның ӧӧн эксперті полча. Андағ пӧзік статус алып аларға оой ла нимес. Сертификат алар ӱчӱн кӧп чидіге чидерге кирек. Піреезі сағынча, ӧнетін ӱгредіг иртібіскен кізее сах андох сертификат пирілче. Сыннаң чоохтаза, «Чиит устарның» положениезі хоостыра сертификат алып алар ӱчӱн, пастап кізее кӧзідігліг сыныхтағның эксперті поларға кирек, соонаң регион синінде иртірілчеткен чемпионаттың эксперті полып тоғынарға. Анаң на сертификаттығ эксперт полыбызар оңдай пирілче.
Харатастың отрасльлар технология техникумында, тізең, пасха кӧстеглерҷе марығлар иртче. Учреждениенің студенті Надежда Мишакова модельерге ікінҷі курста ӱгренче. Позы ол Пии аймаандағы Табат аалдаң. Марығда «Технология моды» кӧстегҷе араласча.
-«Чиит устар» чемпионат - ол хазна синіндегі марығ. Анда кӧп студент аралазарға хынадыр. Ол чииттерге кӧп ізік асча нооза. Пістің техникумда студенттернің аразында хатығ таллағ ирткен. Преподавательлер, артыхтарын таллап, оларны ӱгредіг чылы пасталғаннаң иртеннең иирге теере ағаа тимнееннер. Піс марығда чиит хыстарға комбинезон тігерге кирекпіс, - чоохтапча Надежда Мишакова.
Техникум соонаң чиит хыс ӱгредиин Н.Ф.Катановтың адынаң Хакас хазна университедінде узарадарға пӧгінче. Марығ салтарынҷа студенттернің аразында иң кӱстіглер табылар. Хайзылары анаң «Чиит устар» чемпионаттың халғанҷы чардығында аралазарлар.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы