АҒЫРЧАТХАННАР САНЫ СИНЧЕ
11.03.2022
Хабарлар
Штаб чыылии. Республикада коронавируснаң ағырчатханнарның саны кӧӧлҷе синче.
Аннаңар чоохталған коронавирустаң тоғыр кӱрезерінҷе оперштабтың чыылиинда Оперштабтың теестегі чыылии 9 мартта ирткен. Ол кӱнге пирілген танығлардаң, республикада халғанӌы суткада наа чуғынӌахты 114 кізі хаптырып алған, оларның 22-зі ковид пӧліктерінзер имненерге чатырылған. Пӱӱн ковидтең имненчеткеннернің тиксі саны - 1889 кізі, оларның 1299-зы ибде хазыхтанып аларға кӱстенче. Пӱӱл ковидтең 40694 чуртағӌы хазыхтанып алған. 232 чуртағӌы пу ағырыға сыдабин парған, халғанӌы суткада - 3 кізі.
Хакасияның хазых хайраллаӌаң министрі Олег Ананьевскийнің чооғынаң, ам пістің регионда коронавирусты чухтырчатханнарның саны кӱннің кӧӧлӌе синіп одырча. Сах ідӧк кискек паза пневмония ағырығларының тарапчатханы синче. Аннаңар ковид пӧліктерінде орғаннар саны ӱлӱкӱн алнындох илееде хызырылған. Ам министерствода чарадығ алылған, Харатастағы пала тапчаң турадағы ковид пӧлиинзер ағырчатханнарны паза чатырбастар. Пу имнег туразы пазағы неделяда позының кӧстеенӌе имнег полызиин пир сығар. Анаң теес чидер А.И.Лебедьтің адынаң Харатастағы хазых пиктеӌең социальнай кінге, республиканың имнег туразына, хайзында хирургия корпузын позыдарға пӧгінчелер.
Пу кӱнге ковид пӧліктерінде 730 орынның 140-ы (19 %) пос турча. Кислородтығ орғаннар саны - 621, оларның 140-ы (23 %) - пос, ИВЛ-да - 30 пациент. Республикада кислород читкіӌе, ам ол суткада ортымахти 3 тонна тузаланылча. Пу неделяда Ағбан пилтірі аймааның ӧӧн имнег туразындағы кислород станциязының трубалары тооза салыл парар теен министр. Алынӌа кислород станциязы пу килчеткен тынағ кӱннерінде тузаланысха киріл сығарға кирек. Ідӧк кислород станциязы тимнелче республиканың чуғынӌах ағырығлар имнег туразында паза Харатастағы имнег туразында. Че пу ӱр тусха кӧрілген проект полча.
Коронавирустаң тоғыр вакцина прай имнег учреждениелерінде читкіӌе полтыр. Пу неделяда республиказар саарбахтарға кӧрілген вакцинаның 248 дозазын читірерін сахтапчалар. Алында коронавирустаң тоғыр прививка Хакасияда 480 палаа турғызылған. Улуғларның аразында ковидтең тоғыр вакцинаның пастағы чардығын 298285 чуртағӌы турғыстырып алған, ікінӌізін - 205249 чуртағӌы. Ревакцинацияны 69023 кізі иртібістір.
Часхы кӱннерде кискектепчеткеннернің саны тӧбін пол сыххан даа полза, че эпидемия сині ам даа 20 %-ті асча тіп искірілген. Чыылығда республиканың істеніс паза социальнай арачыланыс министерствозы штабха пирілген сурыға нандырған. Саяногорсктағы хазии уйан палаларға кӧрілген реабилитация кінінде олғаннарнаң тоғазарға килген паба-іӌелерге анда хараазына хона халарға хаӌан чарат сығарлар тіп сурығнаң чуртағӌылар Хакасиядағы кізі праволарынӌа уполномоченнайзар айлантырлар. Сағам, регионда COVID-19 ағырығ ам даа тарапчатханда, пу кіннің тоғызына алызығлар кирілбес. Эпидемия тохтадылза ла, паба-іӌелерге анда хона халарға чарадарлар.
Республиканың ӧӧн санитарнай имӌізі Татьяна Романова таныхтаан, пістің регион ковидтең позып алған чирге ам даа саналбинча. Ам полған на 100 муң чуртағӌының 416-зы аны чухтырча. Андағ сан 30-ха ла тиңнелзе, кирек чахсаа санал сығар. Пӱӱн «Омикрон» наа штамм хайынарын ам даа тохтатпинчаттыр. Пӱӱл январьда ол 261 кізіде сығысхан, оларның 93,7 %-і - пасха чирзер пір дее чӧрбиндір. Аннаңар чон аразында хайди даа маскалығ чӧрерге кирек.
Хакасия пазы Валентин Коновалов, республикада ковид ағырығның тарапчатханы кӧӧлӌе синіп пастапчатханда, оперштаб чыылии пазағы неделядаң пір хати иртірілер тіп искірген.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы