КІЧІГ ЧЕМПИОННАР
01.04.2022
Хабарлар
Спорт. Хакасия пазы Валентин Коновалов мини-футболҷа Россия первенствозында чиңіс тутхан кічіг спортсменнернең тоғасхан
Пӱӱлгі март футболға хынчатхан улустың сағызында ӱрге халар, неке. Хакасияның мини-футболӌа піріктірілген командазы Россия первенствозында пастағызын на чиңіс тутты нооза. 12 часха читкелек оолағастарның аразында марығ Индіркі Новгородта 9 -14 мартта ирткен. Пістің футболисттер 16 ӧме аразында артыхтарның артығы полыбысханнар.
Кічіг чемпионнарны 15 мартта «Ағбан» аэропортта республиканың спорт министрі Сергей Кочан удурлаан. Пу неделяда, тізең, спортсменнер Хакасияның пазы Валентин Коноваловнаң тоғасханнар. Мероприятие алғыстастарнаң азылған. Валентин Олегович, тренерлерге паза командаа чылығ сӧстер читіріп, теен:
- Піс сірерге поғдархапчабыс. Часха кічіг дее ползаңар, сірернің аттарың Хакасия спортының тархынында хаҷанға даа халар. Прайзын чиңіснең алғыстапчам. Чидігде тренерлернің паза паба-іҷелернің хозымы улуғ. Ізенчем, оларның хабазиинаң сірер наа чиңістер тударзар, тӧреен чирібісті ырахха сабландырарзар.
Алғыстастарға республиканың спорт министрі Сергей Кочан, пӱдіріг паза ЖКХ министрі, Хакасияның футболӌа спорт федерациязының кнезі Валерий Келин хозылғаннар. Сергей Владимирович первенствоны кӧрерге кӱстентір. Полған на тоғазығда олғаннар пик хылыхтарын кӧзіткеннер тіп таныхтаан. Ідӧк министр паба-іӌелерге палаларын спортнаң айғазарға кӧстепчеткен ӱчӱн алғызын читірген. Валерий Александрович, футболисттернің чиңізіне ӧрініп, федерация оларға мыннаң мындар полызарға оңдай табар тіп молӌаан.
Хакасияның піріктірілген командазына Ағбандағы ӱс клубтың олғаннары кірчеттір. Ӧӧн чардығы - 10 кізі - «Атлетик» клубта ойнапча. Анда палалар тренерлер Виталий Легачевтің паза Олег Рураның холында устарын таптапчалар. Ікі футболист «Ресурсы Сибири» клубтаң, оларның тренері Николай Сангаджиев полча. Ідӧк ікі пала «Спартак» клубтың спортсмені, тренерлер - Денис Козлов паза Денис Кученеков. Россия паза Сибирь первенстволарына олғаннарны В.А.Легачев, Д.М.Козлов паза Н.Н.Сангаджиев тимнептірлер. Оларға Валентин Олегович алғыстас пічіктерін читірген. Олғаннарны ідӧк сыйыхтарнаң таныхтааннар.
Пу тоғазығ официальнай нимес оңдайнаң ирткен тиирге чарир. Мероприятие араласчылары, стол кистінде чей ізіп, чоох алысханнар. Тренерлернің таниинаң, пастап Россия первенствозында аралазардаңар чоох парбаан даа. Команда Сибирьдегі федеральнай округтың мариинда позын турыстыра кӧзідерге пӧгінген. Олғаннар пӱӱл февральда Сибирьдегі первенствода чиңіс тутханда, кӧбізі чапсаан. Чидіг Хакасияның футбол ӧмезіне кӱс хостыр, итсе-де, чемпионнар поларына тренерлер дее, спортсменнер дее ізенмеен одырлар. Марығ тузында олғаннар аутсайдерлер тіп тітіртіп аларға маңнантырлар. «Ыырӌылары» кӧңнілерін тӱзірерге сағынған полбас па. Хакас спортсменнерге марығның тӧртінӌі чардығында паза чарым финалда хатығ чухтыр. Турнирнің иң кӱстіг ӧмелеріне «Тюмень» паза «Страта» (Ревда) командалар саналғаннар. Чир-суғӌыларыбыс тюменьдегілерні 1:0 саннаң чиңіп алғаннар, «Стратаны» - 4:3 саннаң. Ревда - Свердловск облазындағы город, анда 60 муң артиинаң кізі чуртапча. Кічіг городта кӱстіг команда парын піліп аларға чапсых полған.
Азах меетте хакасиядағылар «Кристалл» ӧменең (Радужный город, Владимир облазы) ойнааннар. Пістіңнер «ыырӌының» хаалхазынзар ӱс меспек кирібіскеннер. Ікі голның авторы капитан Павел Чаптыков полча. Ойын 3:0 саннаң тоозылған. Россия первенствозына футбол ӧмезін республика ахчазына ысханнар. 600 муң артиинаң салковай чолға, азыранарына, гостиницада чуртирына, форма садызарына парыбысхан.
Республиканың піріктірілген командазында ӱс хакас оолах: Павел Чаптыков, Сергей Кызласов паза Дмитрий Арчидаев. Прайзы Ағбанның 26 № школазында 5-ӌі класста ӱгренче. Олғаннар - «Атлетик» футбол клубының спортсменнері. Тренировкалар неделяда ӱс хати иртчелер.
Хомзыныстардаңар чоохтаза, Ағбанда футбол секцияларына паба-іӌелер палаларын ахча тӧлеп чӧргісчеттірлер. «Спартак» клуб ла муниципалитеттің командазы полча. Анда секция тикке тоғынча. Ағаа хоза Хакасияда футбол ойнаӌаң стадионнар чидіспинче. Спорт министерствозы пу сурығларны хайығда тудар.
Футболисттерібісті «Виктор Петрович Астафьевтің кубогы» азых турнирге хығырғаннар. Ол Хызылчарда 27 апрельде иртер. Хакасия правительствозы командаа ахчанаң полыс пирерге тимде.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы