ПОС ХОНИИН ТИЛІДЕРІНЕ - ЧАХСЫ ХАБАЗЫҒ
01.04.2022
Хабарлар
Социальнай чӧптезіг. Ирткен чылдаң сығара хоза хазна хабазии пирілче. Социальнай полызығны чуға чуртапчатхан сӧбірелер алай чуға чуртапчатхан чалғыс кізілер ал поларлар
Ол тиксі хазна чуртағҷыларының чуртас синін чахсыландырарына кӧстелген. Таныхтирға кирек, социальнай чӧптезігдеңер пӱӱнгі кӱнде телевидение, газеталар паза социальнай сетьтер пастыра искірілче. Аннаңар чуртағҷылар ол хабазығнаң ӧткін тузаланчалар. Хакасияда социальнай чӧптезігні чииттер дее, улуғлар даа итчелер. Аннаңар ол хазна хабазиинаңар испеен кізі чох таа полар, неке. Андағ полызығны алғаннарның пірсі Юрий Тороков. Асхыс аймаандағы Кызлас аал чуртағҷызы хығырығҷыларнаң социальнай чӧптезігні хайди иткеннеңер ӱлесче.
- Юрий Макарович, нименең айғасчатханнарыңны чарыт пиріңер.
- Мин хаҷаннаң мал-хус тутчам. Амды хоныхта інектер ле артыс салғам. Аалда чуртапчатса, хайди мал ӧскірбес? Хонғаным Римма Васильевнанаң пос хониин тилідерге сағыс тутчабыс.
- Социальнай чӧптезігдеңер хайдаң истіп алғазар? Хайдағ чӧптезіг иткезер?
- Ол хазна хабазиинаңар кізілердең, таныстарымнаң истіп алғам. Анаң Асхыс аймаандағы чонға социальнай хабазығ пирҷең управлениезер айланғам. Анда мағаа хайдағ социальнай чӧптезіглер парын паза оларны хайди идерін толдыразынаң чарыт пиргеннер. Іди 2021 чылда кӱскӱзін ол контракттаңар піліп алғам, пічіктерні чыып, чӧптезіг иткем.
Мин чуға чуртапчатхан сӧбірее саналчам, хайзының парызы айда чуртап парыбысчаң синнең тӧбін категорияа кірче. Социальнай чӧптезігҷе пос хониин тилідеріне 100 муң салковай алғам.
- Хайдағ пічіктер чыырға киректелген?
- Социальнай чӧптезіг санға алылған орында иділче. Асхыс аймаандағы чонға социальнай хабазығ пирҷең управлениезер паспорт, СНИЛС, чурт паза чир пічіктері паза аал чӧбінең пічіктер аларға киректелген. Ідӧк банк картамның счедын пиргем. Кирек пічіктерні, чыып, управлениезер апарғам. Оларны пир салып, чарымҷа ай ирт парғанда, чӧптезіг иділ парғаннаңар сығдыратханнар. Банк картамның счедына 100 муң салковай кірген.
- Ахчаны нимее хоратхазар?
- Ол ахчаа хонғанымнаң герефорд тӧлліг маллар алғабыс. Итке ӧскірілчеткен андағ маллар тударға сағыныбысхабыс. Піс пір часха чағдабысхан ӱс пызо алып алғабыс. Пір пасты 30 муң салковайға садыбысханнар. Ікі іргек паза пір тізі мал алғабыс. Ӱс пас 90 муң салковайға турған, халған 10 муң салковайға ол малларға от садызып алғабыс.
- Сірернің пос хонииңар пар полған, амды нинҷе пас мал прай пол парды?
- Прай 27 пас полған. Ам пу пызоларнаң хада 30 пол парды. Малларны хазаада тутчабыс, иртен чазызар сӱрчем, алған пызоларны ам даа сығарбинчам. Ибдегі малларға ӱгрен парыбыссыннар, анаң хада позыдарбын.
- Мал азиин садысчазар алай постарың пилетепчезер?
- От пилетирге трактор пар. Чайғы тооза от тоғынчабыс. Трактор пар даа полза, от тоғызы кӱскӱзіне теере парча. Хысхы узун, малға илееде азырал парыбысча.
- Мыннаң мындар пасха социальнай чӧптезіглер идерге пӧгін тутчазар ба?
- Мин пос хониин тилідеріне социальнай чӧптезіг иткенімде, чонға социальнай хабазығ пирҷең управлениенің специализі пу чӧптезіглердеңер чарытхан. Соонаң хатап чӧптезіг идерге чарир теен. Кӧзідімге, ікі чыл пазынаң тракторға киректелчеткен тиріглер алып аларға чарир. Косилка, тырбос паза даа пасха ниме-ноо. Хонғанымнаң чоохтасхабыс, хазых ла ползабыс, пазох таа чӧптезіг ит кӧрербіс.
Анаң Юрий Тороков алған пызоларын кӧрерге хазаазар хығырған. Позы оларға суғ апарған. Суғ урғандох, пызолар сах андох ізіп пастааннар. Ээзі, малларын сыйбап, теен: «Пу Мишка, мынзы тізі Машка». Іди чоохтасчатхан арада Юрий Тороков малы туубысханын кӧр салған. Мал ээзіне маң чох полыбысхан, піс, харығ полбасха тіп, чӧрібіскебіс.
СӦС СОО: Маллар ӧскірчеткен Юрий Тороков мыннаң мындархы хай пірее пӧгіннерінеңер чоохтаан. Пу чағында малларына таңма идерге сағынча. Іди мал аразында кӱн тооза хайын салча, тынағ кӱннері паза отпуск чох. Хайди таныхтаан Юрий Макарович, мал тутса, хайынарға, хыймыранарға кӧп килісче. Анзы ирігерге пирбинче паза кізі хазиина чахсы теелче.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде