ЧИҢІС ТУДАР ТУС ЧИТТІ
08.04.2022
Хабарлар
Сомда: тренер Вадим ТОЛМАШОВ ӱгренҷілері Давид МАЙНАГАШЕВНЕҢ паза Вероника АСОЧАКОВАНАҢ хада
Спорт. Ағбанда суғда чӱзерінҷе регионнар аразындағы марығ иртті. Анда 500 артиинаң спортсмен кӱзін сынаан.
Хакасияның ӧӧн городында суғда чӱзерінең айғасчатханнар арға-мӧрійлерге удаа чыылысчалар. Н.Г.Булакиннің адынаң спорткомплекстің бассейнінде Сибирь, республика марығларын тӧреміл иртір турадырлар. 5 - 7 апрельде, тізең, «Чиңіс тузы» регионнар аразындағы марығ пастағызын на полды. Анда 9 - 17 частығлар устарын кӧзіткеннер. Чон чахсы чыылысхан. Араласчыларның санында Хызылчар крайының, Новосибирск, Кемеров областьтарының паза Хакасияның спортсменнері полғаннар.
Арға-мӧрійні пайрамни азарында Хакасияның спорт министрінің орынҷызы Елена Краснова, Ағбанның пазы Алексей Лёмин араласханнар. Олар олғаннарға паза саарбахтарға наа рекордтар турғызарға алғааннар. Ідӧк Алексей Викторович «Чиңіс тузы» марығ, кибірге кір парып, Россия синіне ӧс парарына ізенізінең ӱлескен. Алғыстастар соонаң спортсменнер пас меетке сыхханнар.
Чоохтирға кирек, пу спорт кӧрімінде тӧрт стиль: брасс, баттерфляй, пос оңдайлығ стиль паза учада чӱзері. Дисциплина саны илееде. Кӧзідімге, Токиода ирткен Олимпиадада 35 медальлар чыындызы ӱчӱн харбазығ парған. Спортсменнер 50, 100, 200, 400, 800, 1500 метрге чӱскеннер, эстафеталарда араласханнар. Ідӧк Олимп ойыннарының программазына комплекс чӱзері кірче. Пу дисциплинада спортсменнер тӧрт аймах оңдайнаң чӱсчелер, дистанция узуны - 200 алай 400 метр.
Регионнар аразындағы марығзар айланза, аны тӧстегҷілер троеборье оңдайынаң иртірерге чаратханнар. Спортсменге ӱс кӱн изере пір оңдайнаң, че аймах дистанциялар чӱзерге киректелче. Полған на марығда олар саннар чыыпчалар. Иң кӧп сан чыып алған спортсмен чиңіс тутча. Ідӧк программада эстафеталар полғаннар. Олғаннарны частары хоостыра тӧрт ӧмее чарыбысханнар. Ағаа хоза, оолағастар паза хызыҷағастар алынҷа марығласханнар.
Хакасия ӱчӱн Ағбанның, Саяногорсктың, Абазаның, Сорығның, Нымырттығ поселоктың паза Асхыстың кічіг спортсменнері турысханнар. Тренер Вадим Толмашов марыға 9 ӱгренҷізін ағылтыр. Чир-суғҷыбыстың таниинаң, Асхыста суғда чӱзерінҷе секция пизінҷі чылы тоғын парир. Аның холында 70 артиинаң пала чӱзерге ӱгренче. Вадим Петрович чоохтапча:
- Позым олаңай кӱреснең айғасхам, спорт узына кандидат полчам. Пастап ыңааҷахтарны чӱзерге ӱгредерінҷе курстар тоосхам, пілдістіг, анзы читкіҷе нимес, амды Хакас хазна университедінде физкультура ӱгретчізі специальность алчам. Мындағ улуғ марығда пастағызын на араласчабыс. Чахсы спортсменнер кӧп. Сыйыхтығ орынға сых поларбыс па? Ікінҷілестіг, че кӱстенербіс. Ӱгренҷілерімнең Вероника Асочакованы таныхтирҷыхпын, аның II спорт разряды.
Сизінгенде, халғанҷы чылларда хакастарның аразында суғда чӱзерінең айғасчатханнарның саны ӧс партыр. 5 апрельде ікі чир-суғҷыбыс - Андрей Кускунаков паза Валерия Конгарова - постарын турыстыра кӧзіткеннер. Андрейге 11 час, ол Ағбанның 29 № школазында 5-ҷі класста ӱгренче. Кічіг спортсмен тренер Максим Лео-нидович Бурмаганың холында узын таптапчаттыр. Оолағас Россияның спорт узына нормативті толдырыбызарға пӧгінче. Амды аның III спорт разряды. Андрей 50 метр учада чӱзіп ікінҷізі полыбысхан.
Андағох салтарларға 15 частығ Валерия Конгарова читкен. Саарбах - Ағбанның 20 № школазының ӱгренңізі. Ол спорт узына кандидат. 2019 чылда Лера Сибирь кубогында чиңіс тутхан. Хайди таныхтаан хакас хызыҷах, тренировкалар неделяда 6 хати иртчелер. Программада кӱс хосчаң тренировкалар пар.
Ізестіг спортсменнернің санында хайди даа Хакас гимназияның ӱгренҷізі Сергей Астанаевті адирға кирек. Андрейнең Валерия учада чӱзерге хынчатсалар, Сергей комплекс чӱзерінде кӱзін сынапча. Ідӧк саарбахха пос оңдайлығ стильнең 800 метрге чӱзерге кӧңніне кірче. Аның I спорт разряды. Килер неделяда Санкт-Петербургта «Кӧгліг дельфин» тиксі Россиядағы марығ иртер. Анда Сергей спорт узына кандидат нормативін толдырыбызарға пӧгінче. «Чиңіс тузы» турнирдеңер чоохтаза, 14 частығ саарбах пос оңдайлығ стильнең 200, 400 метрге чӱскен паза комплекс чӱзерінде араласхан.
Регионнар аразындағы марығлар тузында спортсменнер 14 медальлар чыындызы ӱчӱн харбасханнар. Турнирнің салтарларын килер номерде искірербіс.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде