ХАЙДИ ЧИИТТЕРГЕ ТОҒЫС ТААП АЛАРҒА?
20.04.2022
Статья
Форум. Киҷее ХГУ-ның педагогика ӱгредиинің, информатика паза право колледжінде «С места в карьеру» форум ирткен. Аны «Знание» Россияның халых организациязы иртірген
Хайда тоғыс таап аларға? Пу сурығ техникум-вузтарны тоосхан чииттерні иң сағыссыратча полар, неке. Итсе, хайда даа нимес. Орта полар тиирге - «Хайди?» Хайди резюме орта пазарға? Хайди тоғыс пирчеткеннең чоох алызарға? Хайди посты орта тудынарға? Паза даа пасха хайди, хайди...
Пу сурығларға нандырығ таап алар ӱчӱн, тиксі Россияда «С места в карьеру» чарыдығлығ проект тоғынып пастабысхан. Аны иртірчеткен Москвадағы специалисттер пу наада Ағбанзар читкеннер. Оларны истіп алар ӱчӱн, форумға Хакас хазна университедінің улуғ курстардағы студенттері чыылысханнар. Анзы пілдістіг, нинӌе-де ай пазынаң олар диплом аларлар нооза.
Анаң оларның алнында тоғыс сурии турыбызар. Форумға ӱс трек кірген: компания-да карьера пастиры, стартап паза фриланс. Форумда спикер полғаннар Хакасияның хазна паза халых организацияларының кізілері, пос киреенең айғасчатхан идінӌектер, преподавательлер паза аймах отрасльларның «С места в карьеру» форумның араласчылары эксперттері.
«Карьера» тректе студенттер тоғыс пирчеткеннернең хайди чоох алызарға паза хынған тоғысха кіріп аларға ӱгренгеннер, резюме орта пазардаңар, компанияда тоғысты хайди пастирдаңар паза хайди анда ӧзердеңер піліп алғаннар.
«Фриланс» (ырахтын тоғынғаны) амғы туста чииттернің аразында сабланча. Кӧп кізі аймах компанияларға ырахтын тоғынарын таллапча. Фриланстың чахсы сари кӧп, че читпестері парох. Анзынаңар студенттер тирең піліп алғаннар чыылығда. Хакасиядағы фриланстар олардаңар алғыда чарыт пиргеннер.
«Стартап» тректе пос киреен азарға сағынчатхан чииттер чыылысханнар. Оларға пос киреенең айғасчатхан идінӌектер тоғысты хайди пастирға, аны хайди тилідерге паза даа пасха сурығларӌа тузалығ чӧптер пиргеннер.
- Пу мероприятиенің ӧӧн сағызы - чииттерге тоғыс тілирге полыс пирері. Университет тоосханнар чахсы тоғыс таап аларға хынадырлар алай пос киреен азарға сағынчалар, че олар аны хайди пастирын чахсы оңарбинчалар. Аннаңар піс, мындағ тоғазығларда студенттерні тоғыс пирчеткеннернең тоғастырып, опыттығ эксперттернең чоох алызып, чииттерге полысчабыс. Таныхтирға кирек, мындағ тоғазығлар соонаң олар постарын ізестіг тудынчалар, тоғыс тілирге чочынминчалар, - чоохтапча «С места в карьеру» интенсивтің специализі Юлия Серебрякова.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы