ПІР ЧОЛЗАР - ІКІНҶӀЗІН
20.04.2022
Статья
Чайаачыларыбыс. Альбина Арчимаева пӱӱл республика синінде ирткен «Чайаачылар тигір хуры» марығда сыйыхтығ орыннарға турысхан чиит кибелісчілернің пірсі полча
Альбина пастағы кибелістерін, 9-ӌы класста ӱгренчеткенде, чайаан. Андада ол оларны, алынӌа тетрадьха пазып, кӧӧленібіскен оолахха чарытчаң. Че чӱрее кӧӧреені сала амырап парғанда, ағаа хоза хазна сыныхтағларына тимненер тус чит килгенде, саарбах хоос сӧснең айғазарын тохтадыбызарға чаратхан. Андада школа тоосчатхан хыстың ӧӧн пӧгіні пӧзік ӱгредіг заведениезінзер кіріп алары полған.
Пӱӱнгі кӱнде Пии аймаандағы Чоғархы Киндірліг аалда тӧреен-ӧскен Альбина Арчимаева Н.Ф.Катановтың адынаң Хакас хазна университедінің филология паза культуралар аразындағы палғалыс институдының 2-ӌі курстағы студенті полча. Ол хакас филология кафедразында ӱгренче, анда хакас паза англия тіллері ӱгретчізінің специальнозын алча.
- Ӱгретчібіс Владислав Александрович Боргояков практика занятиелерінде піске кибеліс алай чоох пас саларға удаа чахығ пирче. Ана іди ол минің чайаачы оңдайымны кӧр салған, таң. Анаң мағаа Хакасияның Чайаа чылар туразында тӧстелген, Карина Кулумаева устапчатхан чиит литераторларның «Хакас сӧзінің чайағӌылары» пірігізінің араласчызы полыбызарға чӧп пирген. Мин тоғыр полбаам. 2021 чылның ноябрь айынаң сығара ол пірігіссер чӧр сыххам. Анда пісті, ам на пастапчатхан чииттерні, кибелістер чайирға кӧніктірчелер, тузалығ чӧптер пирчелер, - чоохтап пирген чайаачы кӧңніліг хыс.
Аны республика синіндегі «Чайаачылар тигір хуры» марығда аралазарға ідӧк институттағы ӱгретчізі кӧстеен. Хайди чарытхан Альбина, ол, ӧӧнінде, орыс тілінең кибелістер пасча. Пу марыға, тізең, ікі тілнең пазылған «Тағлығ-чазылығ чирде чурттығ чоннаңар» кибелізін ысхан.
- Амды мағаа хакас чирінің тархынынаңар пазарға хынығ - пурунғы чыллардаң сығара амғы тусха теере. Пу кибеліс минің ол тоғызымның пастағы чардығы полча. Анда хуннардаңар пазылча. Аннаңар узарааны хайди даа полар, - ӱлескен чиит кибелісчі.
Марығда Альбина Арчимаеваның пу пос оңдайлығ чайаачы тоғызының хакас тіліне тілбестелгені пӧзік паалалған. Іди ол позынаң тиң частығларға кӧрілген паза хакас тілінең чайалған кибелістер номинациязында II степеньніг лауреат полыбысхан!
Амды ағаа, чиңісчілер санында пол парғанда, чайғызын Асхыс аймаандағы Чоғархы Тӧӧ аалда иртер чиит чайаачыларның регионнар аразындағы Литература лагерьінзер чол азыл парды. Соонаң, тізең, анда араласханнарның чайаачы тоғыстарының чыындызы сығарылар.
Чоохтирға кирек, Альбина Арчимаеваның пу пастағы чидии. Сағынчабыс, амды ол чайаачы киректің «тадиин» хапты. Пір чолзар ікінӌізін кіргенде, паза аннаң хыйа парбас паза паар-чӱреенең сыхчатхан сӧстерін ах чаӌынға ипти салып, чирібістің кибелісчілері санын ол хайди даа хозар тіп ізеніс пар.
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы