КІЗІ ЧУРТАЗЫН АЛ ХАЛАРҒА ПОЛЫСЧАЛАР
22.04.2022
Хабарлар
Донорның чоннар аразындағы кӱні. Пу наада республиканың хан кінінде «Россияның аарластығ доноры» атха турысханнарны таныхтааннар
Республиканың 38 чуртағӌызын кізі чуртазын ал халарына пос кӧңнінең хан пирчеткені ӱчӱн чеестееннер. Олар кемге туза ағыларын пілбинчелер, че полған на кізее ханын пирерге тимделер. Танығлығ сыйыхты аларға прайзы кил полбаан, пілдістіг, неделя ортызында олар тоғынчалар. Чыылған донорларны алғыстап, «Россияның аарластығ доноры» удостоверениені паза кӧксіне хазанӌаң танығны читірерге Хакасияның хазых хайраллаӌаң министрінің полысчызы Людмила Макарова килген. Ідӧк аарластығ донорларға «Малинники» ООО-ның тадылығ сыйыхтары читірілген.
«Россияның аарластығ доноры» атха ханын 40 хати алай ханның плазмазын 60 хати пир салғаннар турысчалар.
- Пӱӱн Донорның чоннар аразындағы кӱні. Хазнада аны 20 апрельде 2010 чылдаң сығара таныхтапчалар. Аннаңар пу кӱнде аарластығ донорларға танығлығ сыйыхтар читірчебіс. Олар аймах-пасха тоғыста істенчелер, аймах киректернең айғасчалар, че піріктірче оларны кізі чуртазын ал халарына тимде полчатханы. Пӱӱн ӧткін чуртағҷыларға «Россияның аарластығ доноры» удостоверение, кӧксіне хазанҷаң танығ читірілген. Халғанҷызын республикада донорларны 2019 чылда таныхтаабыс. Пандемия тузында оларны сыйыхтирын тохтадыбысхабыс. Амды ковиднең палғалыстығ хатығластар нымзадылғанда, піс аарластығ донорларны чеестирге чаратхабыс.
Пандемия тузында олар хан пирерін тохтатпааннар, уламох кӧп пиргеннер тиирге чарир. Пістің республикадағы хан кінінде ковидтең тоғыр плазма тимнелче. Ол коронавируснаң сидік оңдайнаң ағырчатханнарға имненерге полысча. Имнег учреждениелері тимнелген плазманаң сыбыра тузаланғаннар.
Амғы туста хан чыындызы читкіҷе. Іди дее полза, донорларны піс хаҷан даа сағыпчабыс, - чоохтаан хан паза аның компонентін тимнирінӌе пӧлік устағӌызы Андрей Болотников.
«Россияның аарластығ доноры» атха турысханнарның аразында «Нымах» кӧклӧ театрының ӧӧн бухгалтері Марина Троякова полған. Аннаң хаӌан паза хайди донор полыбысханнаңар сурғам. Ол нандырған:
- Мин алты чыл мының алнында пастағызын на хан пирерге килгем. Че ол кӱн киліспеен. Хан пирерге мағаа косметологым чӧп пирген. Ол ханны паза плазманы пиргені ипчінің хазиина паза сілиине туза ағылча теен, аннаңар парғам. Сыннаң даа, хан пир сыхханы ит-ханыма чахсы теелчеткенін сизінгем. Пір чыл пазынаң на пілін сыххам, хан пирчеткені кемге-де туза ағылча тіп. Аннаң сығара донор поларына паза пір сылтағ хозылған. Минің ханым кізее полысчатханы поғдархастығ пілдірген. Мин «Россияның аарластығ доноры» полыбызарға пӧгін турғыспаам, че андағ аарластығ атха турызарға киліскенде, мағаа поғдархастығ пілдірче. Мыннаң мындар хан пирерін, тохтатпин, узарадарбын. Ханым кемге-де тузалығ полчатханы ӧріндірче.
Автор :
Наталья ЧЕБОДАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы