ЧОНҒА ИҢ КИРЕК НИМЕ-НОО ЫЗЫЛЧА
06.05.2022
Хабарлар
Донбассар гуманитарнай полызығ ызылчатханы хоостыра пайрамнығ митинг ирткен
Полызығ. Россияның прай регионнары, ол санда Хакасия, Донецк паза Луганск чон республикаларына гуманитарнай полызығ, чыып, ысчалар Украинадаң чара чуртапчатхан Донбасстағы чон республикаларынзар националисттернің войсколары чаанаң кірерге тимненібіскенде, Россия ол республикаларны пос алынҷа хазналарға санирдаңар чарадығ алыбысхан. Донбассха улуғ хорғыс полыбысханда, андағы республикаларның ӱлгӱлері, полызығ сурап, Россиязар айланғаннар. Ол сурыныс хоостыра Россия Украинаны нацизмнең позыдар паза аның тиріглерін чох идер, ідӧк Донбассты арачылир пӧгіннең ӧнетін чаа операциязын пастаан.
Украинаның войсколары Донбасстағы город-аалларны, орудиелердең паза минометтардаң атып, 8 чыл халтыратханнар. Ӧнетін чаа операциязы апарылчатханда даа, амыр чуртапчатхан чонҷа атыстар тохтабинча. Ағаа хоза ам ракеталарнаң, залпнаң атчатхан «Градтардаң» атчалар, чурттарны иңзерчелер. Андағ оңдайларда чуртапчатхан чонға хайди даа полызығ киректелче.
Пістің хазнаның халых чоны, тиксі Россияның чон фронты (ОНФ), политика партиялары, министерство-ведомстволар Донбасстағы чонға гуманитарнай полызығ, чыып, ыс сыхханнар. Чыылған полызығ таарлағларын МЧС тоғынңылары андар автомобильлернең читірчелер.
Хакасияда гуманитарнай полызығ чығҷаң пункттар прай городтарда паза аймахтар кіннерінде азылғаннар. Ағылған ниме-ноо чахсы чабылған, наа, этикеткалығ поларға кирек.
Алынҷа хайығ салылча ас-тамахха, аның тузаланңаң тузы иртпеен ползын.
Республикада чыылған гуманитарнай полызығның теестегі партиязын Донбассар ызарға тимнееннер тимір чолның Ағбандағы контейнерлер площадказында. Анда вагонзар электрокар поддонға салылған ниме-нооны таарлапча.
Хайди искірген Хакасияның сағыбаан саайлар полдыртпазынҷа паза аның салтарларын чох идерінҷе управлениенің пастығы Игорь Бохан, республикадаң Донбассар ызылчатхан гуманитарнай полызыға кирілгеннер: ас-тамах, кип-азах, гигиена ниме-ноозы паза пасха даа кирек ниме-ноо. Полызығ чыырында араласханнар идінҷектер, Хакасияның прай министерство-ведомстволары, халых пірігістері, организациялар паза олаңай чуртағылар.
МЧС-тың Хакасияҷа Ӧӧн управлениезі пӧлиинің пастығы Сергей Миначёвтың чооғынаң, гуманитарнай полызығлығ вагон тимір чолҷа Москвазар чидер. Анда ОНФ Россияның тимір чолынаң хада, прай регионнардаң чыылған полызығны піріктіріп, Ростовсар читірерлер. Аннаң андар прай таарлағ автомобильлернең Украиназар апарылар.
Пістің чоныбыс удур-тӧдір полызызарға сыбыра тимде полча, улам хыйалланчатханнарға хайди даа хабас пирчебіс. Хакасия правительствозы регионда гуманитарнай полызығ чыырына чахсы хабасхан. Амды Донбассар 35 тонна таарлағ ызылча, аның алнында 40 тонна ызылған.
Пу мероприятие хоостыра Ағбандағы тимір чол вокзалының перронында пайрамнығ митинг ирткен. Анда ӱлгӱ органнарының, халых пірігістерінің кізілері, тимірчолҷылар паза волонтёрлар араласханнар. Хакасия пазы таарлағ тимниріне хабасхан прай кізілерні алғыстаан.
- Піс Донбасс чуртағҷыларынаң хадабыс, оларны чобағда артыспаспыс, мыннаң мындар хабазарбыс. Хада-пірге ползабыс, піске пір дее санкциялар хорғыстығ нимес, піс Хакасияны паза Россияны тилідербіс. Пілчем, хада ползабыс, пісті пірдеезі чиң полбас. Нацизмні паза бандеровщинаны чиңіп аларына прай ниме идербіс! Чиңіс пісти полар! - теен Валентин Коновалов.
Автор :
Николай СУЛТРЕКОВ
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
